قازاقستان رەسپۋبليكاسى ۇلتتىق بانكىنىڭ رەسمي حابارى
الماتى 2011 جىلعى 15 قاڭتار
«قازاقستان رەسپۋبليكاسىنىڭ ۇلتتىق بانكى تۋرالى» قازاقستان رەسپۋبليكاسىنىڭ 1995 جىلعى 30 ناۋرىزداعى № 2155 زاڭىنا سايكەس قازاقستان رەسپۋبليكاسىنىڭ ۇلتتىق بانكى 2011 جىلعى 17 قاڭتاردان باستاپ 2011 جىلعى قازاقستانداعى VII ازيا ويىندارىنا ارنالعان 2011 جىلعى ۇلگىدەگى نومينالى 2000 تەڭگەلىك ەسكەرتكىش بانكنوتالاردى اينالىسقا شىعارادى.
2011 جىلعى ۇلگىدەگى نومينالى 2000 تەڭگەلىك ەسكەرتكىش بانكنوتانىڭ سيپاتتاماسى
تارالىمى: 20 000 000 دانا
ولشەمى: 139ح73 مم
باسىم ءتۇسى: كوكشىل-جاسىل
بەت جاعى
باسىم بەينەسى – تىگىنەن. ورتالىق بولىگىندە «استانا-بايتەرەك» مونۋمەنتى بەينەلەنگەن. بانكنوتانىڭ ورتاسىندا قويۋ جاسىل جانە كوك جولاقتاردا قازاقستان رەسپۋبليكاسىنىڭ مەملەكەتتىك ءانۇرانى نوتالارىنىڭ فراگمەنتتەرى اق تۇسپەن بەينەلەنگەن, وسى جەرگە نومينالدىڭ ساندىق بەلگىسىنىڭ كونتۋرى اق سىزىقتارمەن جۇرگىزىلگەن. «بايتەرەك» مونۋمەنتىنىڭ سول جاعىندا قازاقستان رەسپۋبليكاسىنىڭ مەملەكەتتىك ەلتاڭباسى التىن تۇسپەن بەينەلەنگەن. جوعارعى وڭ جاق بولىكتە قازاقستان رەسپۋبليكاسىنىڭ مەملەكەتتىك تۋى بەينەلەنگەن. بانكنوتانىڭ تومەنگى جاعىندا اشىق الاقان جانە وزگەرمەلى بوياۋمەن ورىندالعان قار ۇشقىنى بەينەلەنگەن. تومەنگى سول جاعىندا نومينالدىڭ مەملەكەتتىك تىلدەگى ارىپتىك بەلگىسى ورنالاسقان. «قازاقستان ۇلتتىق بانكى» جازۋى تومەندە وڭ جاعىندا تىگىنەن ورنالاسقان, ونىڭ ۇستىندە جالعان اقشا جاساۋ جاۋاپكەرشىلىگىن ەسكەرتەتىن «بانكنوتتاردى قولدان جاساۋ زاڭمەن قۋدالانادى» دەگەن مەملەكەتتىك تىلدەگى جازۋ ورنالاسقان.
سىرت جاعى
باسىم بەينە – كولدەنەڭ. نەگىزگى بەينە: تاۋ اياسىنداعى شاڭعىشى جانە VII ازيا ويىندارىنىڭ سيمۆوليكاسى. تومەنگى سول جاق بولىگىندە بانكنوتا نومينالىنىڭ ساندىق بەلگىسى, ال تومەندە ورتادا ورىس تىلىندەگى ارىپتىك بەلگى ورنالاسقان. جوعارىدا ورتاسىندا «قازاقستان ۇلتتىق بانكى» جازۋى جانە ەميتەنت بانكتىڭ لوگوتيپى باسىلعان. جالعان اقشا جاساۋ جاۋاپكەرشىلىگىن ەسكەرتەتىن «پوددەلكا بانكنوت پرەسلەدۋەتسيا پو زاكونۋ» دەگەن ورىس تىلىندەگى جازۋ اشىق جەردىڭ جوعارعى سول جاق بۇرىشىندا ورنالاسقان. بانكنوتانىڭ ءبۇكىل ءونبويىندا اشىق ورىندارعا قازاقتىڭ ۇلتتىق ويۋ-ورنەگىنىڭ ءموتيۆى پايدالانىلعان.
جاسا, قازاقستان! جەلبىرە, قازاق بايراعى!
ازيادا الاۋى – شىمكەنتكە 13 قاڭتار كۇنى شام جامىراعان شاقتا ۇشاقپەن جەتتى. الاۋ ەستافەتاسىن شىمكەنت قالاسىندا وتكىزىلۋى بويىنشا ۇيىمداستىرۋ كوميتەتىنىڭ توراعاسى, وبلىس اكىمىنىڭ ورىنباسارى ءا.بەكتاەۆ, توراعا ورىنباسارلارى – شىمكەنت قالاسىنىڭ اكىمى ا.جەتپىسباەۆ پەن وبلىستىق تۋريزم جانە سپورت باسقارماسىنىڭ باستىعى بولات قىرىقباەۆ جانە “قازاقستاننىڭ حالىق بانكى” اق وبلىستىق فيليالىنىڭ توراعاسى ءا.ماقۇلباەۆ باستاعان دەلەگاتسيا قارسى الىپ, اۋەجايدا باق وكىلدەرىمەن ءباسپاسوز-ءماسليحاتى ءوتتى. 14 قاڭتار. ا.اسقاروۆ اتىنداعى يپپودروم ماڭايى قاراعۇرىم جۇرت. سالتاناتتى كونتسەرت. بىرەر اپتادان بەرى تۇماندى البيون سەكىلدى تۇنەرىڭكىرەپ تۇرعان شىمكەنت اسپانىنان قىلاۋلاپ قار جاۋدى. اقشا قار جانە قارداي اپپاق كيىم كيگەن الاۋ ەستافەتاسىنا قاتىساتىن ادامدار قالانىڭ ءتۇندىگىن سەرپىگەندەي كۇيگە ءتۇسىردى. ازيا ويىندارى وليمپيا ويىندارى سياقتى ءتورت جىلدا ءبىر-اق رەت بولاتىن سپورت مەرەكەسى. ونى وتكىزۋ قۇرمەتىنە دۇنيە جۇزىندە ءباسى بولەك, وزىندىك ورنى بار, الەۋەتى كۇشتى مەملەكەتتەر عانا يە بولادى. وسىنداي قۇرمەت قازاقستانعا كورسەتىلدى. جينالعان جۇرتقا وبلىس اكىمى اسقار مىرزاحمەتوۆ وسىنى ايتتى. كەشە عانا قىتايدىڭ گۋانچجوۋ قالاسىندا وتكەن جازعى ازيا ويىندارىندا وبلىستار اراسىنان ءبىرىنشى ورىن العان ايماقتىڭ باسشىسى قىسقى ازيا ويىندارىن وتكىزۋ مارتەبەسىنە يە بولۋ ەلباسىمىزدىڭ ارقاسى ەكەندىگىن ايتىپ, ەندى سپورتتاعى دەرجاۆا مەملەكەتتەردىڭ بىرىنە اينالامىز دەدى. م.اۋەزوۆ اتىنداعى وقمۋ ۋنيۆەرسيتەتىنىڭ رەكتورى, اكادەميك ءۋاليحان بيشىمباەۆ زيالى قاۋىم اتىنان اق تىلەۋ ايتتى. ساعات 12-دە الاۋ ەستافەتاسى ديرەكتسياسى باسشىسىنىڭ ورىنباسارى س.قۇرمانبەك پەن الاۋ ساقشىلارى ساحناعا شىعىپ, وتتىقتان ءبىرىنشى الاۋ قۇتىنى تۇتاندىرىپ, وبلىس اكىمى ا.مىرزاحمەتوۆكە تاپسىردى. الاۋ الىپ جۇگىرگەن وبلىس باسشىسىن حالىق قۇتتىقتادى. “العا, قازاقستان!” دەيدى جۇزدەرى الاۋلاعان جانكۇيەرلەر, وقۋشىلار. وبلىس اكىمى ەستافەتانى مۇحتارحان دىلدابەكوۆكە تاپسىردى. ون سەگىز جاسىندا بوكسقا كەلىپ, اينالدىرعان ءتورت-بەس جىلدىڭ ىشىندە كەيبىر بوكسشىلاردىڭ قيالىنا سىيمايتىن جەڭىستەرگە جەتكەن, وليمپيا ويىندارى مەن الەم چەمپيوناتىنىڭ اقتىق سىنىندا ونەر كورسەتكەن وعلان الاۋدى الىپ بايدىبەك بي كوشەسىمەن جۇگىردى. ءبىز كاراتەدەن حالىقارالىق ءدارەجەدەگى سپورت شەبەرى, قازاقستاننىڭ بىرنەشە دۇركىن چەمپيونى, ازيا چەمپيوناتى مەن ازيا ويىندارىنىڭ جۇلدەگەرى, قازاق دالاسىنىڭ باتىرى – قاجىمۇقان مۇڭايتپاسوۆتىڭ نەمەرەسى شاتتىق قاجىمۇقانمەن تىلدەستىك.
