اسا قۇرمەتتى نۇرسۇلتان ءابىش ۇلى!
ءبىز, ءسىزدىڭ وكىلەتتىگىڭىزدى 2020 جىلعا دەيىن ۇزارتۋ جونىندەگى رەسپۋبليكالىق رەفەرەندۋمنىڭ باستاماشىلارى, سىزگە, قازاقستان رەسپۋبليكاسىنىڭ تۇڭعىش پرەزيدەنتى – ەلباسىنا ۇندەۋ جاساپ وتىرمىز.
ءبىزدىڭ باستامامىز قوعامدا ايرىقشا سەرپىلىس تۋعىزدى جانە بەس ميلليوننان استام قازاقستاندىقتار, ياعني سايلاۋشىلاردىڭ 55 پايىزى رەفەرەندۋم وتكىزۋدى قولداپ, ءوز قولدارىن قويدى. بۇل ءسىز جۇرگىزىپ وتىرعان ساياسي باعىتتىڭ بۇكىلحالىقتىق قولداۋعا يە ەكەنىن بارىنشا ايقىندىلىقپەن دالەلدەيدى!
رەسپۋبليكا كونستيتۋتسياسىنا سايكەس, بيلىكتىڭ جالعىز قاينار كوزى حالىق بولىپ تابىلادى جانە سول حالىق ءسىزدى الداعى ونجىلدىقتا ەلىمىزدى ءومىر ءسۇرۋ دەڭگەيى جوعارى سانالاتىن الەمنىڭ دامىعان مەملەكەتتەرى قاتارىنا قوسۋعا قابىلەتتى كوشباسشى رەتىندە سانايدى.
سايلاۋشىلاردىڭ ءوز ەرىك-قالاۋىن ءبىلدىرۋى – مەملەكەتىمىزدىڭ تاۋەلسىزدىگىن نىعايتۋعا, ونىڭ ىلگەرى دامۋىنا جانە ازاماتتارىمىزدىڭ ءال-اۋقاتىنىڭ ارتۋىنا باعىتتالعان ءسىزدىڭ قاجىرلى قىزمەتىڭىزگە بەرىلگەن شىنايى باعا.
تاۋەلسىزدىكتىڭ وتكەن ون توعىز جىلى ىشىندە ەلدىڭ ىشكى جالپى ءونىمىنىڭ 16 ەسەدەن استام وسكەنىن اتاپ ايتۋدىڭ ءوزى جەتكىلىكتى. جالاقى, زەينەتاقى جانە وزگە دە الەۋمەتتىك تولەمدەر ۇدايى ءوسىپ كەلەدى. جاڭا مەكتەپتەر, اۋرۋحانالار مەن مادەنيەت ۇيلەرى بوي كوتەرۋدە.
كەڭ اۋقىمدى باعدارلامالار, سونىڭ ىشىندە قازاقستاننىڭ يندۋستريالىق الەۋەتىن تۇپكىلىكتى جاڭارتۋعا جانە مىڭداعان جاڭا جۇمىس ورىندارىن اشۋعا مۇمكىندىك بەرەتىن ەلدىڭ ۇدەمەلى يندۋستريالىق-يننوۆاتسيالىق دامۋ باعدارلاماسى ىسكە اسىرىلۋدا.
ءوزىنىڭ ءدال بۇگىنگىدەي حالىقارالىق زور بەدەلگە يە بولۋىندا قازاقستان ناقتى سىزگە, الەمدىك دەڭگەيدەگى كوشباسشىعا قارىزدار. بۇعان سەمەي سىناق پوليگونىن جابۋ مەن يادرولىق قارۋدان باس تارتۋ, قازاقستاننىڭ ەقىۇ-عا توراعالىق ەتۋى, ينتەگراتسيالىق باستامالارىڭىز بەن وزگە دە قولعا العان ىستەرىڭىز ىقپال ەتتى.
ءسىزدىڭ كوشباسشىلىعىڭىزدىڭ ارقاسىندا قازاقستان ايتۋلى جەڭىستەرگە قول جەتكىزدى. الايدا الدىمىزدا اتقارار ءىس ءالى كوپ. جانە دەم بەرۋشىسى ءوزىڭىز بولىپ وتىرعان بارلىق باستامالار ناق ءسىزدىڭ باسشىلىعىڭىزبەن جالعاسىن تاپقانى اسا ماڭىزدى. ءسىزدىڭ باعا جەتپەس تاجىريبەڭىز بەن قايسار مىنەزىڭىز, مەملەكەتشىل تۇلعاڭىز جانە ەشبىر داعدارىستار مەن سىناقتارعا بوي الدىرماي ەلدەگى بارلىق ىستەردىڭ تىنىس-تىرشىلىگىن ءاردايىم سەزىپ-ءبىلىپ وتىراتىن قابىلەتىڭىز ولاردى ىسكە اسىرۋدىڭ كەپىلىنە اينالعان.
بەيبىت ءومىر, قوعامداعى تۇراقتىلىق پەن وتباسىنداعى بەرەكە, ەلى ءۇشىن ماقتانىش سەزىم جانە كەلەشەككە دەگەن سەنىم رەفەرەندۋم وتكىزۋ يدەياسىن بۇكىل حالىق بولىپ قولداۋدىڭ العىشارتى بولدى. بۇل – ازاماتتاردىڭ ءوزىڭىزدىڭ باسشىلىعىڭىزبەن قازاقستاننىڭ قول جەتكىزگەن مول تابىستارىنا دەگەن ريزاشىلىق سەزىمى مەن ولاردىڭ جاڭا جەڭىستەرگە دەگەن ءۇمىتى.
قازاقستاننىڭ ميلليونداعان تۇرعىندارى اتىنان باستاماشىل توپ سىزگە, قۇرمەتتى نۇرسۇلتان ءابىش ۇلى, ۇندەۋ جاساپ, رەفەرەندۋم وتكىزۋگە كەلىسىم بەرۋىڭىزدى سۇرايدى.
حالىقتىڭ ەرىك-قالاۋى ءسىز ءۇشىن قاسيەتتى سانالادى جانە ءسىز ەشكىمگە دە حالىق پىكىرىمەن ساناسپاۋعا, ەلەپ-ەسكەرمەۋىنە جول بەرمەيسىز. ءسىز بار عۇمىرىڭىزدى حالقىڭىزعا جانە وتانىمىزعا قىزمەت ەتۋگە ارناپ كەلەسىز.
حالىق مەملەكەتىمىزدىڭ قالىپتاسۋىنىڭ وسىناۋ قيىن-قىستاۋ جىلدارىندا ءسىزدى ءاردايىم قولداپ, بۇلجىماي سوڭىڭىزدان ەردى. بۇگىن دە, ياعني ەلىمىز ءۇشىن وسىناۋ تاعدىرشەشتى ساتتە ءسىز ءوز حالقىڭىزدىڭ باستاماسىن قولدايدى دەپ سەنەمىز.
قازاقستان رەسپۋبليكاسىنىڭ پرەزيدەنتى –
ەلباسى ن.ءا.نازارباەۆتىڭ پرەزيدەنتتىك وكىلەتتىگىن
ۇزارتۋ جونىندەگى رەفەرەندۋمنىڭ باستاماشى توبى.
2011 جىلعى 12 قاڭتار.
قازاقستان رەسپۋبليكاسى
پارلامەنتىنىڭ دەپۋتاتتارىنا
قۇرمەتتى دەپۋتاتتار!
ءبىز, قازاقستان رەسپۋبليكاسىنىڭ پرەزيدەنتى – ەلباسى ن.ا.نازارباەۆتىڭ پرەزيدەنتتىك وكىلەتتىگىن 2020 جىلعا دەيىن ۇزارتۋ ءجونىندەگى رەفەرەندۋمنىڭ باستاماشى توبىنىڭ مۇشەلەرى, سىزدەرگە جوعارى زاڭ شىعارۋشى بيلىكتىڭ وكىلدەرى رەتىندە ۇندەۋ جاساپ وتىرمىز.
رەفەرەندۋم وتكىزۋ جونىندەگى ءبىزدىڭ باستامامىزدىڭ ءتۇرلى ۇلتتار مەن دىندەر وكىلدەرى, بارلىق جاستاعى بۋىندار مەن الەۋمەتتىك توپتار تاراپىنان بۇكىلحالىقتىق قولداۋعا يە بولۋى مەملەكەتىمىزدىڭ باسشىسىنا دەگەن اسا جوعارى سەنىمدى ايعاقتايدى.
بۇل قولداۋ – ەلىمىزدىڭ تۇڭعىش پرەزيدەنتىنىڭ مەملەكەتتىلىكتى نىعايتۋ, قازاقستاننىڭ سەرپىندى الەۋمەتتىك-ەكونوميكالىق دامۋىن قامتاماسىز ەتۋ جانە ونىڭ حالىقارالىق بەدەلىن ارتتىرۋعا باعىتتالعان كورەگەن ساياساتىن ءشۇباسىز مويىنداۋ بولىپ تابىلادى.
ءبىز بەلسەندى ازاماتتىق ۇستانىمى مەن ەل كەلەشەگىنە دەگەن جاناشىرلىعى ءۇشىن بارشا وتانداستارىمىزعا ريزاشىلىعىمىزدى بىلدىرەمىز. ءبىز, سونداي-اق, باستامامىزدى بەلسەندى ءارى جان-جاقتى قولداعان پارلامەنت دەپۋتاتتارىنا العىسىمىزدى ايتامىز.
رەفەرەندۋم يدەياسىنا قولداۋ كورسەتكەن بەس ميلليوننان استام قازاقستاندىقتاردىڭ اتىنان سىزدەردەن پارلامەنت پالاتالارىنىڭ بىرلەسكەن وتىرىسىنىڭ قاراۋىنا «قازاقستان رەسپۋبليكاسىنىڭ پرەزيدەنتى – ەلباسى ن.ءا.نازارباەۆتىڭ پرەزيدەنتتىك وكىلەتتىگىن رەسپۋبليكالىق رەفەرەندۋمدا 2020 جىلعا دەيىن ۇزارتۋ مۇمكىندىگىن كوزدەيتىن قازاقستان رەسپۋبليكاسى كونستيتۋتسياسىنا وزگەرىس ەنگىزۋ تۋرالى» ماسەلەنى شىعارۋلارىڭىزدى سۇرايمىز.
بۇل – بۇكىلحالىقتىق رەفەرەندۋمدى قولداۋعا قولدارىن قويىپ, وزدەرىنىڭ بولاشاعى مەن ەلىمىزدىڭ كەلەشەك دامۋىن قازاقستاننىڭ تۇڭعىش پرەزيدەنتىمەن بايلانىستىراتىن رەسپۋبليكا سايلاۋشىلارىنىڭ جارتىسىنان استامىنىڭ تىكەلەي ەرىك-قالاۋى.
قازاقستان رەسپۋبليكاسىنىڭ پرەزيدەنتى –
ەلباسى ن.ءا.نازارباەۆتىڭ پرەزيدەنتتىك وكىلەتتىگىن ۇزارتۋ جونىندەگى
رەفەرەندۋمنىڭ باستاماشى توبى.
2011 جىلعى 12 قاڭتار.
