بىرلىگى مەن تىرلىگى جاراسقان ەل ەكەنسىزدەر

ارينە, ەلىمىزدە ءوتىپ جاتقان سايلاۋدى قاداعالاۋ ءۇشىن شەتەلدەن كوپتەگەن بايقاۋشىلار كەلدى. سولاردىڭ ءبىرى – تاۋەلسىز مەملەكەتتەر دوستاستىعى بايقاۋشىلار ميسسياسى ۇيىمىنىڭ وكىلى, رەسەيدىڭ لەنينگراد وبلىسىنان كەلگەن ەلەنا ليۋبۋشكينامەن از-كەم تىلدەسۋدىڭ ءساتى ءتۇستى. – ەلەنا ۆيكتوروۆنا! «سىرت كوز – سىنشى» دەگەن. ساي­لاۋ­شىلاردىڭ بەلسەندىلىگى قالاي؟ – اشىعىن ايتۋ كەرەك, قا­زاقستاندا سايلاۋشىلاردىڭ جو­عارى بەلسەندىلىگى بىردەن بايقالدى. جانە سايلاۋشىلاردىڭ داۋىس بەرۋىنە بارلىق جاعداي جاسالعان. تاعى ءبىر ۇناعانى – بۇكىل وتباسىمەن كەلىپ داۋىس بەرىپ جاتقانداردى ءجيى كوردىم. جانە ءبارىنىڭ وسىناۋ ناۋقانعا اتسالىسقاندارىنا قۋانىشتى ەكەندىكتەرى بال-بۇل جانعان ءجۇز­دەرىنەن بايقالىپ تۇر. بۇل ارينە, قازاقستاندىقتاردىڭ ساياسي ناۋقانعا وتە جاۋاپكەرشىلىكپەن قاراعاندارىن بىلدىرەدى. شى­نىندا, ەلدىڭ بولاشاعى, دامۋى, وركەندەۋى وتباسىنىڭ بەرەكەسى, بىرلىگىنە تىكەلەي بايلانىستى ەمەس پە؟!. اسپانىندا بەيبىت كۇنى جارقىراعان دامىعان ەلدىڭ تىرەگى – باقىتتى وتباسى. سونداي-اق, عالامتورداعى اق­پاراتتار ارقىلى قازاقستاننىڭ قاي ازاماتى بولماسىن, سىرتتا جۇرسە دە, جارقىن بولاشاق ءۇشىن داۋىس بەرىپ, ەلدىڭ دامۋىنا اتسالىسىپ جاتقانىن بايقادىم. بۇل – وتە قۋانىشتى جاعداي. مەنىڭ­شە, بۇل ەلدىڭ بىرلىك-ىنتىماعى, ۇيىم­شىلدىعىنىڭ مول ەكەنىن بىلدىرسە كەرەك. ءتىپتى, داۋىس بەرۋگە كەزەككە تۇرعان جانداردىڭ اراسىندا جاستاردىڭ كوپ بولۋى بىزگە دە, كەلۋشىلەرگە دە مەرەكەلىك كوڭىل-كۇي سىيلاپ, كۇش-قۋات, سەرپىلىس بەرگەندەي. – ارينە, سايلاۋدى باي­­­قاۋ­­شىلارمەن اڭگىمەلەسە قالساق, «قانداي دا ءبىر زاڭ­بۇزۋ­شىلىق بايقادىڭىز با؟» دەگەن سا­ۋال­دىڭ ءتىلىمىزدىڭ ۇشىن­دا تۇراتىنى انىق... – ساۋالىڭىزدىڭ توركىنىن ءتۇسىندىم. ءبىزدىڭ باستى مىندەتىمىز – سايلاۋدىڭ دەموكراتيالىق تالاپتارعا ساي اشىق تا ءادىل ءوتۋىن باقىلاۋ. وسى ماقساتتا قانشاما شەتەلدىك باقىلاۋشىلار سايلاۋ ناۋقانىن باقىلادى. ءبىز, لەنينگراد وبلىسىنان 4 ادام كەلدىك. ونىڭ ەكەۋى وسى تاراز قالاسىنا تۇستىك. كۇنى بويى بىرنە­شە سايلاۋ ۋچاسكەلەرىندە بولىپ, ءتىپتى, الىستاۋ اۋىلدارداعى سايلاۋ ۋچاسكەلەرىنە دە سوعىپ, ناۋ­قاننىڭ ءادىل وتكەنىنە كوز جەتكىزدىك. ەشقانداي زاڭبۇزۋشى­لىق ورىن العان جوق. – قازاقستاندا بۇرىن بولعان با ەدىڭىز؟ – بۇرىن-سوڭدى قازاقستاندا بولعان ەمەسپىن. مەنىڭ وسىناۋ ۇلان-عايىر جەرى بار, تاۋەلسىز ەلگە العاشقى ساپارىم. ارينە, ءبىزدىڭ لەنينگراد وبلىسىندا وسى ەلدەن قونىس اۋدارعان ورىس ۇلتتارى بار. ولار ۇنەمى قازاق­ستاندى سا­عىنىشپەن ەسكە الىپ وتىرادى. شىنىندا, ءبىز قازاق ۇلتىن ىن­تىماعى جاراسقان, بىرلىگى مىقتى, ەڭبەكقور حالىق رەتىندە بىلەمىز. بۇل سايلاۋ ناۋرىز مەرەكەسىمەن قاتار كەلىپ جاتىر ەكەن. ەرتەڭ وسى ۇلىق مەرەكەگە قاتىسىپ, قازاق­ستاندى جانە وسى ەلدى مەكەندەپ جاتقان ءتۇرلى ۇلتتاردىڭ تىنىس-تىرشىلىگىن جاقىنىراق بىلە تۇسەمىز دەگەن ويدامىن. – اڭگىمەڭىزگە راحمەت.  اڭگىمەلەسكەن ورالحان ءداۋىت, «ەگەمەن قازاقستان». جامبىل وبلىسى.