استانا. 17 ناۋرىز. استانادا العاش رەت قازاقستان رەسپۋبليكاسى ۇلتتىق وليمپيادالىق كوميتەتىنىڭ كەزەكتەن تىس سەزى ءوتتى. بۇل تۋرالى egemen.kz ءتىلشىسى حابارلادى.
جيىندا كوميتەتتىڭ جاڭا جارعىسى بەكىتىلىپ, جاڭا مۇشەلەرى تاعايىندالدى. ۇوك پرەزيدەنتى تيمۋر ق ۇلىباەۆتىڭ جەتەكشىلىگىمەن وتكەن جيىنعا مادەنيەت جانە سپورت ءمينيسترى ارىستانبەك مۇحامەدي ۇلى, ۇلتتىق سپورتتىق فەدەراتسيالاردىڭ جەتەكشىلەرى, تانىمال سپورتشىلار قاتىستى. القالى جيىننىڭ ماڭىزدىلىعى تۋرالى وليمپيادا چەمپيونى جاقسىلىق ۇشكەمپىروۆ ءوز ويىمەن ءبولىستى.
«القالى جيىن وتە جاقسى ءوتتى. ەلىمىزدىڭ ۇلتتىق وليمپيادالىق كوميتەتى حالىقارالىق تالاپتارعا ساي بولۋ ءۇشىن ۇيىمنىڭ جاڭا جارعىسىن قابىلدادى. ارينە, حالىقارالىق وليمپيادالىق كوميتەتتىڭ سۇرانىس-تالابىنا بارلىق جاعىنان ساي بولۋىمىز كەرەك», دەدى جاقسىلىق ۇشكەمپىروۆ.
سەزد بارىسىندا سپورتشىلار كوميسسياسىنىڭ قۇرامى بەكىتىلدى. تۇڭعىش رەت جاساقتالعان كوميسسياعا مانەرلەپ سىرعاناۋشى دەنيس تەن, زىلتەمىرشى يليا يلين, پالۋان گيۋزەل مانيۋروۆا, تاەكۆوندوشى ارمان چيلمانوۆ كىردى. ال, بوكسشى, وليمپيادا چەمپيونى سەرىك ساپيەۆ وسى كوميسسسيانىڭ توراعاسى بولىپ سايلاندى.
داستان كەنجالين.
دەرەك: egemen.kz
سۋرەت: مادەنيەت جانە سپورت مينيسترلىگى سپورت جانە دەنەشىنىقتىرۋ ىستەرى كوميتەتى, سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى.
