اقتوبەگە ۇلتتىق بانك توراعاسى كەلدى

اقتوبە. 17 ناۋرىز. اقتوبەگە ەلىمىزدىڭ باس بانكيرى كەلدى. بۇل تۋرالى egemen.kz ءتىلشىسى حابارلادى. وڭىرگە جۇمىس ساپارىمەن كەلگەن ۇلتتىق بانكتىڭ توراعاسى دانيار اقىشەۆ «اقتوبە اقپارات» ورتالىعىندا وتكەن ءباسپاسوز كونفەرەنتسياسىنا قاتىسىپ, ەلىمىزدەگى ەكونوميكالىق دامۋ جانە وعان قارجى ينستيتۋتتارىنىڭ ىقپالى, تەڭگەنىڭ تەگەۋرىندىلىگىن ارتتىرۋ سىندى ماسەلەلەرگە توقتالدى. ول سونداي-اق, تەڭگەنىڭ ەركىن اينالىم ساياساتىنىڭ تاياۋ ۋاقىتتا وزگەرمەيتىنىن تىلگە تيەك ەتتى. اقشا ايىرباستاۋ قىزمەتىندەگى وزگەرىستەردى دە اينالىپ وتپەدى. قازىرگى تاڭدا تەڭگەنى شەتەل ۆاليۋتاسىنا اۋىستىرۋشىلاردان جەكە باسىن كۋالاندىراتىن قۇجات تالاپ ەتۋ شەگىنىڭ بۇرىنعى 2 ميلليون تەڭگەدەن 1 ميلليون تەڭگەگە دەيىن تومەندەتىلگەنىنىڭ نەلىكتەن ەكەنىن ءتۇسىندىردى. تەڭگەنى تۇراقتاندىرۋ باعىتىنداعى باسقا دا ماسەلەلەرگە قاتىستى ۇلتتىق بانك ۇستانىمدارىن تاراتا باياندادى. ول مەملەكەت باسشىسىنىڭ تاپسىرماسىمەن جۇزەگە اسىرىلىپ جاتقان يپوتەكالىق نەمەسە يپوتەكالىق تۇرعىن ءۇي زاەمدارىن قايتا قارجىلاندىرۋ باعدارلاماسىنا ايرىقشا توقتالدى. «2016 جىلدىڭ 1 ناۋرىزىنداعى جاعداي بويىنشا قازاقستاندىقتار يپوتەكالىق زاەمداردى قايتا قارجىلاندىرۋ باعدارلاماسى اياسىندا 19 مىڭنان استام ارىز بەردى. ولاردىڭ ىشىندە سوماسى 76 ميلليارد تەڭگە بولاتىن 12 421 ارىز ماقۇلداندى. ارىز قابىلداۋ جالعاسۋدا. ۇلتتىق بانك بولىنگەن قاراجاتتى يگەرۋ قارقىنىن ارتتىرۋ ءۇشىن بىرقاتار شارالاردى قولعا الىپ جاتىر. اقتوبە وبلىسى بويىنشا 1136 ارىز بەرىلگەن. سونىڭ سوماسى 3,7 ميلليارد تەڭگە بولاتىن 760-ى ماقۇلداندى», – دەپ حابارلادى قارجىلىق رەتتەۋ قۇرىلىمىنىڭ باسشىسى. ول ۇلتتىق بانكتىڭ تۇرعىنداردىڭ يپوتەكالىق قارىزىن وتەۋگە ىقپال ەتۋ ءۇشىن جۇمىستى كۇشەيتەتىنىن دە اتاپ ءوتتى. وتكەن جىلى وبلىستىڭ بانكتەردەگى دەپوزيتتەرىنىڭ كولەمى 56 پايىزعا ارتىپ, 390 ميلليارد تەڭگە قۇراعانىن دا ايتىپ ءوتتى. زاڭدى تۇلعالاردىڭ سالىمدارى 83,2 پايىزعا ارتىپ, 208 ميلليارد, جەكە تۇلعالاردىڭ سالىمدارى 33,4 پايىزعا ارتىپ, 181,6 ميلليارد تەڭگەگە جەتكەن. دانيار اقىشەۆ قازاقستاندىقتاردىڭ كوبىنە تەڭگەلىك دەپوزيتتەردى تاڭدايتىنىن جەتكىزدى. ول باق وكىلدەرىنىڭ ەلىمىزدەگى قارجى ساياساتى, نەسيە ستاۆكاسى, التىن-ۆاليۋتا قورى جانە باسقا ماسەلەلەرگە بايلانىستى بىرقاتار ساۋالدارىنا جاۋاپ بەردى. جۇمىس ساپارى بارىسىندا باس بانكير وبلىس اكىمى بەردىبەك ساپارباەۆتىڭ قاتىسۋىمەن وتكەن ەكىنشى دەڭگەيدەگى بانكتەردىڭ, ساقتاندىرۋ كومپانيالارىنىڭ جانە اقشا ايىرباستاۋ پۋنكتتەرىنىڭ وكىلدەرىمەن كەزدەسۋگە قاتىستى. ساتىبالدى ءساۋىرباي. دەرەك, سۋرەت: egemen.kz.