فوتو: اقوردا
مەملەكەتتەر باسشىلارى ءبىر-بىرىنە دەلەگاتسيا مۇشەلەرىن تانىستىرعان سوڭ قۇرمەت قاراۋىلىنىڭ باستىعى راپورت بەرىپ, ەكى ەلدىڭ ءانۇراندارى ورىندالدى.
اقوردادا موڭعوليا پرەزيدەنتىن قارسى الۋ ءراسىمى ءوتىپ جاتىر
ء«بىز – تاريحى ورتاق, تامىرى ءبىر باۋىرلاس ەلدەرمىز, كوشپەندى حالىقتاردىڭ ۇرپاعىمىز. قازاق پەن موڭعول – عاسىرلار بويى ىرگەسى بولىنبەگەن كورشىلەر. حالىقتارىمىزدىڭ ءومىر سالتى, ادەت-عۇرپى وتە ۇقساس. قازىر دە وسى ماڭگى قۇندىلىقتاردى ارقاۋ ەتىپ كەلەمىز. بۇگىندە ىقپالداستىعىمىز ستراتەگيالىق سەرىكتەستىك رۋحىندا دامۋدا. مەملەكەتارالىق, پارلامەنتارالىق جانە ۇكىمەتارالىق بايلانىستارىمىز نىعايۋدا. قۇرمەتتى پرەزيدەنت مىرزا, ءسىز ەكىجاقتى قارىم-قاتىناسىمىزدى جاڭا دەڭگەيگە كوتەرۋگە زور ۇلەس قوسىپ كەلەسىز. مۇنى جوعارى باعالايمىز. قاجىرلى ەڭبەگىڭىزدىڭ ارقاسىندا موڭعوليادا كوپتەگەن وڭ وزگەرىس بولىپ جاتىر. بىلتىر ەلىڭىزدىڭ ەكونوميكاسى 6,8 پايىزعا ءوستى. بۇل ءسىزدىڭ ساليقالى باسشىلىعىڭىزدىڭ جەمىسى ەكەنى ءسوزسىز. ءسىز حالقىڭىزدىڭ ءال-اۋقاتىن جاقسارتۋ ءۇشىن ماڭىزدى باستامالاردى جۇزەگە اسىردىڭىز. موڭعوليادا مەملەكەتتى دامىتۋعا ارنالعان «Vision-2050» كەشەندى جوسپارى قولعا الىنعانىن بىلەمىز. سونداي-اق قاراقورىم اتتى جاڭا قالا سالۋدى باستاپ كەتتىڭىزدەر. بىرەگەي جوبالاردىڭ تابىستى بولۋىنا تىلەكتەسپىز. سارابدال ساياساتىڭىزدىڭ ارقاسىندا موڭعوليانىڭ حالىقارالىق بەدەلى ارتا ءتۇستى. ءبىز باۋىرلاس ەلدىڭ بارلىق جەتىستىگىنە قۋانامىز», دەدى مەملەكەت باسشىسى.
ءوز كەزەگىندە ۋحنااگين حۋرەلسۋح موڭعول-قازاق قارىم-قاتىناسىنىڭ ماڭىزىنا توقتالدى.
«اراعا جيىرما جىل سالىپ قازاقستانعا مەملەكەتتىك ساپارمەن كەلگەنىمە قۋانىشتىمىن. ءسىزدىڭ وسىدان ەكى جىل بۇرىن ءبىزدىڭ ەلىمىزگە جاساعان مەملەكەتتىك ساپارىڭىز موڭعول-قازاق قارىم-قاتىناستارىن ستراتەگيالىق سەرىكتەستىكتىڭ جاڭا دەڭگەيىنە كوتەردى. بۇل ۋاقيعا ەكىجاقتى بايلانىستار تاريحىنا التىن ارىپپەن جازىلاتىنى ءسوزسىز. قۇرمەتتى پرەزيدەنت مىرزا, ءسىزدىڭ كورەگەن, پاراساتتى جانە جوعارى كاسىبي باسشىلىعىڭىزدىڭ ارقاسىندا قازاقستان ەكونوميكالىق جانە الەۋمەتتىك سالالاردى دامىتۋدا ايتارلىقتاي تابىسقا جەتتى. موڭعول حالقى ەلىڭىزدىڭ جەتىستىكتەرىن ءجىتى باقىلاپ وتىر. 2024 جىلعى موڭعولياعا ساپارىڭىز بارىسىندا وننان استام قۇجاتقا قول قويىلدى. بۇگىن دە بىرقاتار ماڭىزدى قۇجاتتار قابىلدانادى», دەدى موڭعوليا پرەزيدەنتى.
