«اتىراۋ جارىق» ءجاسوسپىرىمنىڭ 17 549 703 تەڭگە شىعىنىن وتەيدى

اتىراۋ. 16 ناۋرىز. اتىراۋ قالالىق سوتى قورشاۋسىز پودستانسانىڭ اۋماعىندا ەلەكتر توعىنان زارداپ شەككەن ءجاسوسپىرىمنىڭ ەمدەۋ شىعىندارىن ەنەرگەتيكتەردەن وندىرۋگە ۇيعارىم جاسادى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. «سوتقا تالاپ قويۋشى تالاپ ارىزبەن جۇگىنىپ, كامەلەت جاسىنا تولماعان بالاسىنىڭ «اتىراۋ جارىق» اق قىزمەتكەرلەرىنىڭ جاۋاپسىزدىعىنان توققا سوعىلىپ, دەنساۋلىعىنا زاقىم كەلگەنىن كورسەتىپ, وزدەرىنىڭ قىزمەتتىك مىندەتتەرىنە نەمقۇرايلى قاراعان «اتىراۋ جارىق» اق-نان ماتەريالدىق شىعىندى ءوندىرۋدى سۇرادى. ويتكەنى, 2014 جىلدىڭ 19 ساۋىرىندە كامەلەت جاسىنا تولماعان ۇلى قورشالماعان ەلەكترلىك پودستانسانىڭ اۋماعىندا ەلەكتر توعىنا سوعىلىپ, اۋىر كۇيىكتەرىمەن اۋرۋحاناعا جەتكىزىلگەن. دارىگەرلەر بالانى امان الىپ قالۋ ءۇشىن ونىڭ ەكى قولىن بىردەي كەسۋگە ءماجبۇر بولدى. بالانىڭ اتا-اناسىنا قازىرگى زامانعى مەديتسينالىق كومەك كورسەتۋ ءۇشىن ىستامبۇل قالاسىنداعى (تۇركيا) MEDICAREINTERNATIONAL مەديتسينالىق ورتالىعىنا جۇگىنۋگە تۋرا كەلگەن. تالاپ قويۋشى ۇسىنعان دالەلدەمەلەرىنە سايكەس بالانى شەتەلدە ەمدەۋ شىعىنى 142 600 اقش دوللارىن قۇرادى. سوت ءىستىڭ بارلىق ءمان ءجايىن زەردەلەپ, جاۋاپكەر «اتىراۋ جارىق» اق-نان ك.-نىڭ پايداسىنا بالانى ەمدەۋگە جۇمسالعان شىعىن 17 549 703 تەنگەنى ءوندىردى», – دەپ حابارلادى اتىراۋ وبلىستىق سوتىنىڭ ءباسپاسوز حاتشىسى بورانباي عاليەۆ. سوت شەشىمى زاڭدى كۇشىنە ەندى. جولداسبەك شوپەعۇل. دەرەك: اتىراۋ وبلىستىق سوتىنىڭ ءباسپاسوز قىزمەتى. سۋرەت: mng.adilet.gov.kz.