جەتىمدەردى جىلاتپادى

قارقارالى اۋدانىنداعى قايناربۇلاق اۋىلىندا تۇ­راتىن ايگۇل نۇرحاسەنوۆا بەس بالانىڭ اناسى. كۇيەۋى قايتىس بولىپ, قيىندىقتىڭ زارىن ەرتە تارتقان جان. «جۇت – جەتى اعايىندى» دەگەن ەمەس پە, ازاماتىنان ايىرىلىپ, ازا تۇتىپ جۇرگەنىندە ءۇيى ورتەنىپ كەتىپ, قايعىسىنىڭ ۇستىنە قايعى جامالدى. ءسويتىپ, ءبىر كۇننىڭ ءىشىن­دە بەس بالاسىمەن دالادا قالعان جايى بار ەدى... بارار جەر, باسار تاۋى قال­ماعان ايگۇل امالدىڭ جوق­تىعىنان قارقارالى اۋدانىنىڭ اكىمى حالەل ماق­سۇتوۆ قايناربۇلاققا, تۇر­عىندار الدىندا ەسەپ بەرۋگە كەلگەندە ءوز باسىنداعى جايتتى جايىپ سالعان بولاتىن. بۇل ماسەلەنى اۋدان اكىمى اياقسىز قالدىرماي, جاماعاتقا قولدان كەلگەنشە كومەك كورسەتۋلەرىن ءوتىنىپ, ءۇن تاستاعان ەدى. جەتىمى مەن جەسىرىن جىلاتپاعان ەل ەمەس پە, ايگۇلدىڭ باسىنداعى اۋىر جاعدايعا بەيجاي قاراماعان اۋدان حالقى جىلۋ جيىپ, از عانا ۋاقىتتىڭ ىشىندە ورتاعا قوماقتى قارجى ءتۇسىردى. ءوز كەزەگىندە بۇل اقشا اۋىلداعى بەس بولمەلى ەڭسەلى ءۇيدى ساتىپ الۋعا مۇمكىندىك بەردى. ءسويتىپ, بىرلىگى جاراسقان ەلدىڭ ارقاسىندا ايگۇل نۇرحاسەنوۆا ءبىر كۇننىڭ ىشىندە باسپانالى بولىپ شىعا كەلدى. اۋىل تۇرعىندارىنىڭ اتىنان ارداقتى انا قاپيزا ومار­بەكقىزى اتقا مىنگەن ازا­ماتتارعا شىن جۇرەكتەن العىس ايتتى. «وسىنداي يگى شار­انى جۇزەگە اسىرۋعا مۇ­رىندىق بولعان اۋدان اكىمى حالەل مۇقاتاي ۇلىنا, اۋىل اكىمى قيزات جاۋكەن ۇلىنا, قولدان كەلگەنشە كومەكتەسكەن حالايىققا انالىق العىسىمدى بىلدىرەمىن. ايگ ۇلىمىزدىڭ شا­ڭىراعى قۇتتى بولىپ, ءىشى شات­تىققا تولسىن, باق-بەرەكە قون­سىن!» – دەپ العىس جاۋدىردى ارداقتى انا. قايرات ءابىلدينوۆ, «ەگەمەن قازاقستان». قاراعاندى وبلىسى, قارقارالى اۋدانى.