بوران

ناۋرىز ايى ورتا بەلىنەن اسقان كەزدە باتىسقازاقستاندىقتار اياق استىنان كوزدى اشتىرمايتىن اقتۇتەك بوران سوعادى دەپ ويلاماعان ەدى. ىشقىنعان جەلدىڭ ەكپىنى اتان تۇيەنى جىعارداي تىم قاتتى بولدى. ۇيتقي سوققان بورانىمەن جارىسىپ جاۋعان قار ورال ءوڭىرىنىڭ قالاسىن دا, دالاسىن دا ءبىر دەمدە اق كورپەگە ورادى دا تاستادى. جويقىن جەلدىڭ اسەرىنەن قالادا جانە وبلىستىڭ بىرقاتار جەرىندە ەلەكتر جەلىلەرى ءۇزىلىپ, كوشە بويلارىنداعى بيلبوردتاردىڭ ماتا تەكتەس ماتەريالدارى جىرتىلىپ جاتتى. 15 ناۋرىز كۇنى كەشكى ساعات 21:00-ءدىڭ شاماسىندا باستالعان بوران تاڭ اتا ءبىر-اق سايابىرلادى. ادەتتە توتەنشەلىكتەر قاتتى بوراننىڭ بولاتىنىن, جەلدىڭ جىلدامدىعى كۇشەيەتىنىن الدىن الا حابارلاۋشى ەدى. ءسىرا, اتالعان قىزمەت وكىلدەرى مەن اۋا رايىن انىقتاۋشىلار بۇل جولى كۇتپەگەن جەردەن, وتكەن قىس ايلارىنىڭ وزىندە بولماعان بوراننىڭ باستالىپ كەتەتىنىن بولجاي الماي قالعان سەكىلدى, دەيدى ورال قالاسىنىڭ تۇرعىندارى. شالعايداعى قازتالوۆ جانە بوكەي ورداسى اۋداندارىنان جەتكەن حابارلارعا قاراعاندا, الاعاي دا بۇلاعاي قاتتى جەل, بوران كە­زىندە كوكتەن تۇسكەن قاردى ءۇر­لەپ, ەلدى مەكەندەردىڭ ىرگەسىنە ءۇيىپ تاستاعان. قاردىڭ ۇيلەر مەن اكىمشىلىك عيماراتتاردىڭ ەسىك, تەرەزەلەرىن باسىپ قالعانى سونشالىق,تاڭەرتەڭ سىرتقا شى­عاتىن ەسىكتەردى اشۋدىڭ ءوزى قي­ىنعا تۇسكەن. ال ىشىنە ەمەس, سىرت­قا قاراي اشىلاتىن ەسىكتەردى اشۋ ءتىپتى مۇمكىن بولمادى, دەپ حابارلادى قازتالوۆ اۋدانىنداعى ارىپتەسىمىز سەرىك جۇماعاليەۆ. مىنە, ءسويتىپ, كەشەگى كۇنى ناۋ­رىزدىڭ قارى اقجايىق اتىرابىن بەلۋاردان كەلەتىن اق كورپەگە ورادى دا تاستادى. ءارى بۇل قۇبىلىس جىلدىڭ جاقسى بولاتىنىنىڭ ءبىر حابارشىسى, دەپ جاتتى وڭىردەگى كونەكوز قاريالار. تەمىر قۇسايىن, «ەگەمەن قازاقستان». باتىس قازاقستان وبلىسى.