سۇلۋ كوكشە. ول كىمدى دە بولسىن وزىنە تارتادى دا تۇرادى. قولى قالت ەتسە وسىندا كەلىپ ءبىر كەۋدە كەرىپ دەم الىپ كەتۋ ءار استانالىق ءۇشىن ارمان. ماشينەمىز «وقجەتپەس» شيپاجايىنىڭ الدىنا توقتاي قالىسىمەن-اق ەسىك الدىندا تۇرعان ورتا بويلى, جىلى ءجۇزدى, اققۇبا كىسى كوزىمە وتتاي باسىلدى. بىلتىر بىرگە دەمالعانبىز.
– و, رايىس اعا, ءبىزدى توسىپ تۇرسىز با؟, – دەيمىن قالجىڭداپ.
– ساۋلەبەك, باۋىرىم, امانسىڭ با, – دەپ جاتىر ول كىسى دە جىلى جىميىپ. اتىمدى ۇمىتپاپتى.
مەن بۇل كىسىمەن وسىمەن ءۇشىنشى رەت كەزدەسىپ وتىرمىن. ءاۋ باستا ەرعالي دەگەن كورشىمنىڭ ۇيىندە تانىسقانمىن. ونىڭ سالتانات دەگەن ءسۇپ-سۇيكىمدى كەلىنشەگىنىڭ قايتىس بولعان اكەسىنىڭ دوسى ءارى ۇستازى ەكەن. ماماندىعى دارىگەر كورىنەدى. ول جولى جارقىلداسىپ اڭگىمەلەسىپ, سونداي سىر الىسا قويمادىق. تەك بىلتىر وسى شيپاجايدا كەزدەسىپ, بىرگە دەمالعاندا سوڭعى كۇندەرى عانا اڭگىمەمىز جاراسا باستاعان. سول سەزىم سۋىماپتى, بايىرعى تانىستارداي قۇشاقتاسىپ امانداستىق.
رايىس اعامىز بىرتوعا, مىنەزى جۇمساق, بويىنان مادەنيەتى ەسىلىپ تۇرعان سونداي ءبىر ءسۇيكىمدى ادام بولىپ شىقتى. «ءشىركىن-اي, مەنىڭ اكەم بولسا عوي دەيتىن جان ەكەن», دەگەنى بار ءبىر دەمالۋشى ول كىسىنىڭ مىنەزىنە ايرىقشا ءسۇيسىنىپ. شىنىندا دا ۇزاماي بۇل كىسى بۇكىل شيپاجايدىڭ سۇيىكتى اعاسىنا اينالىپ جۇرە بەردى. بىلمەيتىنى جوق, قانداي اڭگىمە ايتىلسا دا ءدانىن سول كىسى شاعىپ, ءتۇيىنىن ءوزى تارقاتىپ وتىرعانى. بارعان سايىن ءبىر قىرى كورىنەدى دە تۇرادى. جاتقان ءبىر قازىنا. سويتە جۇرە قاراپايىمدىلىعى كەرەمەت. دەمالۋشىلاردىڭ كوڭىلدى كەشتەرىنىڭ بىرىندە ول كىسى قۇيقىلجىتىپ بايان تارتىپ, مەن ءان سالىپ, بايگە الدىق.
– ءسىز بۇل كىسىنى كوپتەن بەرى بىلەسىز بە؟ – دەدى بىردە شيپاجاي باسشىسى ستانيسلاۆ پشەنيچنىي. مەن ەندى عانا تانىسىپ جۇرگەنىمدى ايتتىم.
– بۇل كىسى ۇلكەن ۇستازىمىز. وسى قازاقستانداعى لور دەپ اتالاتىن دارىگەرلەردىڭ كوبىسى مىنا اعاڭىزدىڭ شاپانىنان شىققان. ناعىز اكادەميك, – دەدى سونسىن ايرىقشا ءبىر ماقتانىشپەن. – مىنا كىتاپشانى وقىساڭىز ءبىراز ماعلۇمات الاسىز.
ول بەرگەن كىتاپشا اعامىزدىڭ قىسقاشا ومىرباياندىق وچەركى ەكەن. ەڭ ءبىرىنشى تاڭ قالعانىم رايىس قاجكەن ۇلى ءتولەباەۆ عىلىم دوكتورلىعى مەن پروفەسسورلىعىن بىلاي قويعاندا, شىنىمەن دە قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى ەكەن! سونىمەن بىرگە ول حالىقارالىق وتورينولارينگولوگيا اكادەمياسىنىڭ, نيۋ-يورك عىلىم جانە ەۋروپا اكادەميالارىنىڭ دا اكادەميگى كورىنەدى. كەمبريدج حالىقارالىق ينستيتۋتىنىڭ قۇرمەتتى پروفەسسورى دەگەن اتاعى تاعى بار.
ءارى قاراي وقىساق, قويشى ايتەۋىر, اعامىزدىڭ ءوز سالاسىندا بىتىرمەگەن ءىسى, تىندىرماعان جۇمىسى, شىقپاعان شىڭى قالماپتى. ونىڭ قولىمەن بەس جۇزگە تارتا عىلىمي ەڭبەك, 16 مونوگرافيا جازىلعان. ولاردىڭ كوبى تاياۋ شەتەلدى بىلاي قويعاندا, اقش, گەرمانيا, يسپانيا, جاپونيا, اۆستريا, ەگيپەت سياقتى وزىق ەلدەردە جارىق كورىپ, جوعارى باعاسىن الىپتى.
جيىرماعا جۋىق كادىمگىدەي زاڭداستىرىلىپ, پاتەنتتەلگەن ونەرتابىستارى تاعى بار. ونىڭ جەتەكشىلىگىمەن 14 دوكتورلىق جانە 37 كانديداتتىق ديسسەرتاتسيا قورعالعان. الگى باس ءدارىگەردىڭ: «بۇل كىسى ءبارىمىزدىڭ ۇستازىمىز», دەگەنىنىڭ ءجونى بار ەكەن. تۇتاس ءبىر عىلىمي ارميا عوي بۇل دەگەنىڭىز!
بىلاي قاراعاندا «بەتەگەدەن بيىك, جۋساننان الاسا» وسى ءبىر سىپ-سىپايى اعامىز ەندى كوز الدىمدا اسقار تاۋداي الىپقا اينالىپ شىعا كەلدى. جەتىم قوزىداي تۇرتىنشەكتەپ ءجۇرەتىن جۋرناليست ەمەسپىز بە, بۇل كىسىنىڭ ومىرىنە ەندى قىزىعايىن دەدىم. قالاي دەگەنمەن دە كوكىرەك قازىناسىن اقتارا تۇسكەنىم ءجون. ۇزاماي ونىڭ دا رەتى كەلە كەتتى. «قىدىرىپ, تازا اۋا جۇتايىق», دەپ ءنومىرىمىزگە اعامىزدىڭ ءوزى كەلدى. زايىبىمىز ەكەۋىمىز اپىل-عۇپىل كيىنىپ ەرىپ جۇرە بەردىك.
شيپاجايدىڭ جانىنداعى ايناكولدىڭ جاعاسىن جيەكتەي تارتىلعان قىدىرما جولدار بار. رەكەڭ سونىڭ ۇزاقتاۋ بىرىنە ءتۇسىپ, «ماعان ەرىڭدەر» دەگەندەي بىزگە ءبىر قاراپ, جورتا ءجونەلدى. قاۋساپ تۇرعان قاريا بولماسا دا ەگدە تارتقان, كادىمگى «دونەن شال». بىراق جەتكىزەر ەمەس. ودان ەداۋىر كىشى ءبىز ءا دەگەندە-اق القىنىپ قالدىق.
– ءسىزدىڭ كىم ەكەنىڭىزدى ءبىراز بىلدىك. اسىرەسە, ۇلىبريتانيادان شىعاتىن ءالەمدىك عىلىم بيىگىنە قول جەتكىزگەندەر عانا ىلىگەتىن «ءححى عاسىردىڭ اسا كورنەكتى عالىمدارى» ەنتسيكلوپەدياسىنا ەنگەنىڭىز كەرەمەت ەكەن. مۇنداي تىزىمگە قازاق بالاسىنىڭ ىلىگۋى بارىمىزگە ماقتانىش قوي, – دەيمىن ول كىسىنى اڭگىمەگە تارتىپ.
ساۋمال اۋا. سىڭسىعان ورمان. سىلق-سىلق كۇلگەن كول.
سىلقىم تابيعات. وسىنىڭ ءبارى اسەر ەتتى مە, اعامىز بۇل جولى اعىتىلىپ قويا بەردى.
– حالىقارالىق عۇمىرنامالىق ورتالىق شىعاراتىن بۇل باسىلىم ەكى جىلدا ءبىر جارىق كورەدى ەكەن. ونىڭ بەتىنە زامانىمىزدىڭ ەڭ كورنەكتى عالىمدارى, ونىڭ ىشىندە مەديتسينا سالاسىنا دا ۇلكەن ۇلەس قوسقان عۇلامالار ەنگىزىلەتىنىنەن بۇرىننان قۇلاعدار ەدىم. شىنىمدى ايتسام, وسىنداي بۇكىل عىلىمي الەمگە تانىمال ەنتسيكلوپەديالىق باسىلىمنان حات العانىمدا ءوزىم دە تاڭ-تاماشا بولدىم. «ءبىز ءسىزدىڭ ءومىربايانىڭىزبەن جەتە تانىستىق, – دەپ جازىلىپتى ول حاتتا. – ءسىز تەك عىلىممەن عانا اينالىسىپ قويماي, ەمدەۋمەن دە, پەداگوگيكالىق جۇمىسپەن دە شۇعىلدانىپسىز. ءومىربايانىڭىزدى باسىلىمىمىزعا ەنگىزسەك, قالاي قارايسىز؟»
جاڭا ءوزىڭ ايتقانداي ولاي بولىپ جاتسا ەلىمىزدىڭ اتى شىعىپ, ابىرويى بيىكتەي بەرمەي مە, ارينە, كەلىستىم.
– ال ەندى, اعا, گرەكياداعى باياعى ءدۇنيەدەگى جەتى كەرەمەتتىڭ ءبىرى – الىپ ءمۇسىن تۇرعان رودوس ارالىنان الىپ قايتقان التىن مەدالىڭىز تۋرالى ايتىڭىزشى؟
– ءيا, باس پەن مويىن حيرۋرگياسى وتورينلارينگولوگتەرىنىڭ 5-ءشى ەۋروپالىق كونگرەسى جاڭاعى سەن ايتقان اتاقتى رودوس ارالىندا ءوتتى. ءتورت جىلدا ءبىر بولاتىن بۇل جيىنعا سول جولى دۇنيەجۇزىنەن 4,5 مىڭ دەلەگات قاتىستى. وندا مەديتسينانىڭ ءوزىمىز اينالىسىپ ءجۇرگەن سالاسىنىڭ قازىرگى زامانداعى ادامزات بالاسى قول جەتكىزىپ وتىرعان جەتىستىكتەرى مەن ءتاجىريبەلەرى ورتاعا سالىندى. ال كىلەڭ وسىنداي مىقتىلاردىڭ ورتاسىنان سۋىرىلىپ شىعىپ, مىناداي جوعارى ماراپات الامىن دەپ ءوزىم دە ويلاعان جوق ەدىم. مەن مۇنداي اتاققا يە بولعان تمد ەلدەرى ىشىندەگى ءتورتىنشى ادام ەكەنمىن. سايىپ كەلگەندە بۇل دا ەلدىڭ ابىرويى عوي, قاراعىم. ماعان سول قاناعات. شەتەلدە جاڭا تانىلىپ كەلە جاتقان تاۋەلسىز وتانىمىزدىڭ اتىن اتاتىپ, جاقسىلىق تۋىن جەلبىرەتۋگە سەپتەسىپ جۇرسەك, باسى جۇمىر پەندەگە بۇدان ارتىق قانداي باقىت كەرەك؟ مەنىڭ كوڭىلىمدى مارقايتاتىن دا وسى.
– اعاسى, ءوزىمىزدىڭ ەلىمىز بار, شەتەلدىكتەر بار, وسىنشاما اتاقتار مەن ماراپاتتاردى تەگىننەن تەگىن بەرمەيتىنى بەلگىلى عوي. وسى جاعىن اشىڭقىراپ ايتساڭىزشى.
– ەندى ونىڭ ءبارىن سانامالاپ ايتىپ شىعۋدىڭ قاجەتى جوق شىعار. جانە ونى وسى عىلىمنىڭ ارنايى مامانى بولماسا تۇسىنە قويۋ دا قيىن. مەنىڭ 20-عا جۋىق ونەرتابىستىق پاتەنتىم دە بار ەكەنىن ءوزىڭ دە ءبىلىپ تۇرسىڭ عوي. سولاردىڭ ءبارى دە قۇلاق, مۇرىن, تاماق اۋرۋلارىنىڭ الدىن الۋعا جانە جازۋعا, وسى عىلىمنىڭ دامۋىنا قوسىلعان ازدى-كوپتى ۇلەس ەكەنىن دۇنيەجۇزى عالىمدارى مويىنداعانى راس.
وتكەن جىلى كۇزدە ەلىمىزدە تۇڭعىش رەت 8 ادامعا كوحلەارلىق يمپلانتاتسيا جاسالعانىنان قۇلاعدار بولارسىڭ. مۇنى «عاسىر جاڭالىعى» دەپ باسپاسوز بەتىندە دە, عىلىمي ورتادا دا ۇلكەن باعا بەرىلدى. راسىندا دا بۇل وپەراتسيا ءتىپتى وسىدان ونشاقتى جىل بۇرىنعى دەڭگەيمەن پارىقتاعاننىڭ ءوزىندە فانتاستيكا ءتارىزدى كورىنەتىنى راس. مەن ساعان وسىنى عانا تۇسىندىرۋگە تىرىسىپ كورەيىن.
جالپى قازاقتا «تاسكەرەڭ» دەگەن ءسوز بار عوي. ورىسشاسى – «گلۋحونەموي». بەتىن اۋلاق قىلسىن, بۇل قازىرگى كۇنى ءبىرتالاي باۋىرلارىمىزدى ءمۇساپىر كۇيگە ءتۇسىرىپ وتىرعان كەسەلدىڭ ءبىرى. مۇنداي جارىمجان ادامداردىڭ كوبەيگەنى سونداي, ءتىپتى تەلەديدارلاردىڭ وزىندە ولارعا ارناپ ارنايى سۋردواۋدارما جاساۋعا ءماجبۇر بولىپ وتىرمىز ەمەس پە؟ جانە بۇل جالعىز ءبىزدىڭ ەلىمىزدە ەمەس, الەمنىڭ كوپشىلىك ەلدەرىنە ورتاق قاسىرەت.
جالپى مۇنداي وپەراتسيالار رەسپۋبليكامىزدا, اتاپ ايتقاندا الماتىدا بىرنەشە جىلدان بەرى جاسالىپ كەلگەنى راس. بىراق ولاردىڭ ءبارىن شەتەلدىك ماماندار جاسايتىن. ءوزىمىزدىڭ دارىگەرلەر بولسا مىقتاعاندا وعان اسسيستەنت بولىپ قانا قاتىساتىن.
ال استانا قالاسىنداعى ءوزىم قازىر قىزمەت اتقارىپ ءجۇرگەن №1 اۋرۋحانادا جاسالعان مىنا وپەراتسيانى مەديتسينا عىلىمدارىنىڭ دوكتورى گۇلميرا مۇحاماديەۆا مەن وعان اسسيستەنت بولعان وتولارينگولوگيا كافەدراسىنىڭ دوتسەنتى تالاپبەك اجەنوۆ ەكەۋى اتقارىپ شىقتى. جانە اتقارعاندا قانداي, زەرگەرلىك ەپتىلىكتى قاجەت ەتەتىن وسى ءبىر جۇمىستى ولار نەبارى ەكى ساعاتتا اياقتادى. ال شەتەلدە مۇنداي قيىن وپەراتسياعا ءتورت ساعاتقا دەيىن ۋاقىت كەتەدى. بۇل وتاشىلار يزرايل, اۆستريا سيياقتى ەلدەردە بولىپ, شەبەرلىكتەرىن شىڭداعان اسا تاجىريبەلى ادامدار, وپەراتسيانىڭ وتە ءساتتى ءوتۋى دە سوعان بايلانىستى بولسا كەرەك. ولاردىڭ ەكەۋى دە ءوزىمنىڭ ءشاكىرتتەرىم ەكەنىن ماقتانىشپەن ايتا الامىن.
– سوندا الگى وپەراتسيادان كەيىن ادام بىردەن ەستىپ, سويلەپ كەتە مە؟
– جوق, ولاي ەمەس, ارينە. ەڭ الدىمەن, ادام اعزاسىنا ەنگىزىلەتىن الگى كوحلەارلىق يمپلانتانت دەگەننىڭ نە ەكەنىن ايتايىن. قازىرگى ەستۋ قۇرالىن كەيبىرەۋلەردىڭ قۇلاعىنان تالاي رەت كورگەن بولارسىڭدار. سول كەزدەرى ونىڭ ءوزى ۇلكەن جاڭالىق بولىپ ەسەپتەلەتىن. ال ءبىز ايتىپ وتىرعان ساندىق اپپاراتتىڭ ودان ايىرماسى جەر مەن كوكتەي. ەڭ باستىسى ول داۋىستى كۇشەيتىپ قانا قويمايدى, ءىس جۇزىندە ادام اعزاسىنداعى سەمىپ قالعان ەستۋ رەتسەپتورلارىن الماستىرادى. كىشكەنتاي عانا چيپ تۇرىندەگى ول قۇلاق ىشىنە اسقان ەپتىلىكپەن ەنگىزىلەدى دە ەلەكترلىك تولقىندار ارقىلى ەستۋ جۇيكەسىنە بىلايشا ايتقاندا «جان بىتىرەدى», سونىڭ ارقاسىندا ادام ەستۋ قابىلەتىنە قايتادان يە بولادى. ونىڭ ۇستىنە بۇل اپپارات بۇرىنعىداي ەمەس, وتە قولايلى, ءتىپتى كورىنبەيدى دە جانە ءبىر سالىنعان سوڭ ادامعا ءومىر بويى قىزمەت ەتەدى.
ال ەندى سەنىڭ: «وپەراتسيا جاساعان ادام بىردەن سويلەپ كەتە مە؟» دەگەن سۇراعىڭا كەلەيىك. نەگىزىنەن قولى جاتتىققان ادامعا ادام اعزاسىنا يمپلانتانت ەندىرۋ ەستۋ قابىلەتىن قايتارۋ جولىنداعى ودان كەيىنگى جۇمىستاردان كۇردەلى ەمەس دەر ەدىم. ءيا, ودان كەيىن ادامدى قالىپتى ومىرگە قايتارۋ قيىن. الگى ىسكە قوسىلعان ءچيپتىڭ قۇلاق كۇيىن ونىڭ يەسىنە قولايلى دىبىس دياپوزونىنا كەلتىرۋدىڭ ءوزى وڭاي شارۋا ەمەس. ودان كەيىن ول اداممەن سۋردوپەداگوگتار مەن فونوپەدتەر اينالىسىپ, ونى قالىپتى ەستۋگە جانە سويلەۋگە جاتتىقتىرادى. ءالبەتتە ادام كوبىنە تۇك ەستىمەگەننەن كەيىن بارىپ كەرەڭ بولادى. بۇل ءبىرشاما ۋاقىتتى قاجەت ەتەتىن كۇردەلى جۇمىس. ءبىر قۋانارلىعى قازىر ەلىمىزدە وسى شارۋانى باسىنان باستاپ اياعىنا دەيىن اتقارىپ شىعا الاتىن ماماندار بار.
شەتەلدە مۇنداي وپەراتسيالار 40-50 مىڭ ەۆرو تۇرادى. ال بىزدە ول بۇدان بەس ەسەگە دەيىن ارزانعا تۇسپەك. ونىڭ ۇستىنە كۆوتا ارقىلى ءتىپتى اقىسىز جاساتۋعا دا بولادى. ال ەگەر بۇل شارۋانى قالىپتى جولعا قويىپ الساق, قانشاما جاننىڭ العىسىن الار ەدىك. ءوزىڭىز قاراڭىز, الەمدە ءاربىر بەسىنشى ادامنىڭ قۇلاعى ناشار نەمەسە مۇلدەم ەستىمەيدى ەكەن. بۇل اقپاراتتىڭ ءبىزدىڭ ەلىمىزگە دە قاتىسى بار. قازىرگى مالىمەتتەر بويىنشا, استانا مەن اقمولا وبلىسىندا عانا 400-دەن استام ادام وسىنداي وپەراتسيانى قاجەتسىنىپ وتىر, سوندىقتان مۇنداي وتالاردىڭ ەلىمىز كلينيكالارىندا ءورىس الۋىنىڭ پايداسى, ادامدارعا دەگەن شاراپاتى زور بولماق.
قازىر وسى وپەراتسيا جاسالعان ەكى ادامنىڭ ەكەۋى دە ەستيدى دە, سويلەيدى دە. بۇرىن ءومىرى ەستىپ كورمەگەن بىرەۋى: «ويپىرىم-اي, مىناۋ مۋزىكا دەگەن, ءان دەگەن كەرەمەت ەكەن عوي», دەپ ءتىپتى العىسىن اۋىزبەن ايتىپ جەتكىزە الماي ءجۇر.
وسى ارادا مەن رايىس اعانىڭ جۇزىنەن ايرىقشا ءبىر ماقتانىش تابىن تۇڭعىش رەت اڭعاردىم. ادەتتە ءبىز لور دەپ اتالاتىن (وتورينولارينگولوگ دەگەننىڭ قىسقارعان اتاۋى) قۇلاق, مۇرىن, تاماق اۋرۋلارىنىڭ دارىگەرلەرىنە قوراشسىنا قارايمىز عوي. ال الەمدىك اۋقىمدا بۇعان كوزقاراس باسقاشا كورىنەدى. ويتكەنى, دۇنيەجۇزىلىك دەنساۋلىق ساقتاۋ ۇيىمىنىڭ ەسەبى بويىنشا بۇل ادامدار اراسىندا اۋرۋدىڭ ەڭ كوپ تاراعان تۇرىنە جاتادى ەكەن. ءتىپتى تىنىس الۋ ورگاندارى پاتولوگياسىمەن ءاربىر ءتورتىنشى ادام زارداپ شەگەتىن كورىنەدى. بۇل كورسەتكىش جەرىنىڭ استى-ءۇستىنىڭ استاڭ-كەستەڭى شىعىپ جاتقان ءبىزدىڭ ەلىمىزدە ودان كوپ بولماسا از ەمەس, ارينە. وسىعان قاراماستان رەسپۋبليكامىزدا مەديتسينانىڭ وسى سالاسى بويىنشا ءالى كۇنگە عىلىمي كلينيكالىق ورتالىق قۇرىلماعان. بۇرىنعىلارى وداق ىدىراعاندا رەسەي مەن ۋكراينادا قالىپ قويعان. وسىعان قاراماستان بۇل سالادا باسقا ەلدەردەن كەم قالماي, ءتىپتى كوبىسىنەن وزا شاۋىپ, وسىنداي بيىكتەردى باعىندىرعان قازاقستان دارىگەرلەرىنىڭ جەتىستىكتەرى رايىس قاجكەن ۇلى سياقتى بىلىمىنە بىلىگى ساي مايتالمان جانداردىڭ ارقاسى ەكەندىگى داۋسىز. ەندەشە بۇل رەتتە اعامىز قالاي ماقتانسا دا, مارقايسا دا ورىندى-اۋ.
ءبىز رەكەڭنىڭ اسەرلى اڭگىمەسىنەن ارىلا الماي ءبىر ءسات ءۇنسىز قالدىق.
– وسى قىزمەتىمنىڭ ارقاسىندا تالاي جەردە, تالاي ەلدە بولدىم. تالاي تاڭعاجايىپتى كورىپ تامسانعان كەزدەرىم بار, – دەپ اعامىز قايتىپ كەلە جاتقاندا تاعى ءبىر سىردىڭ ۇشىعىن شىعاردى. – الايدا سولاردىڭ ارقايسىسىنان ەلىمە ساعىنىشپەن ورالامىن. ءوزىڭدى ءوز ەلىڭنىڭ بولىنبەس ءبىر ءبولشەگى رەتىندە سەزىنۋ قانداي باقىت دەسەڭىزشى!
ول بۇل سوزدەردى كوكشەنىڭ تامىلجىعان تابيعاتىنا قاراپ تۇرىپ, ەرەكشە ءبىر تولعانىسپەن اقتارىلا ايتتى.
...ءبىز استاناعا شيپاجايدان ول كىسىدەن بۇرىنىراق قايتتىق. رايىس اعا ءبىزدى وسىدان ون كۇن بۇرىن قارسى العان جەرىنەن قايتادان شىعارىپ سالدى. ءماشينەنىڭ اينەگىنەن وعان قيماستىقپەن قارايمىن. ءبىر ءسات ول ماعان ارتىندا تۇرعان «وقجەتپەس» شىڭىمەن بوي تالاستىرىپ تۇرعانداي بولىپ كورىندى. ەلىمىزدىڭ اسپانىنا تىرەۋ بولىپ, بيىكتە ۇستاپ تۇرعان وسىنداي ابىز اعالارىمىز بەن ابزال ازاماتتارىمىز ەكەنى راس-اۋ,ءوزى!
ساۋلەبەك جامكەن ۇلى, جۋرناليست.
