سولتۇستىك كورەيانىڭ سۇڭگۋىر قايىعى جوعالىپ كەتتى

استانا. 12 ناۋرىز. سولتۇستىك كورەيا اسكەريلەرى وسى اپتانىڭ باسىندا ءوزىنىڭ سۇڭگۋىر قايىقتارىنىڭ ءبىرىن جوعالتىپ الدى. بۇل تۋرالى ras.kz-كە سىلتەمە جاساعان egemen.kz ءتىلشىسى حابارلادى. CNN تەلەارناسىنىڭ حابارلاۋىنشا, مۇنى امەريكانىڭ وسىنىڭ جايىنان حابارلارى بار ءۇش لاۋازىمدى تۇلعاسى جەتكىزگەن. اقش اسكەريلەرى وسى ۋاقىتتاردا سولتۇستىك كورەيانىڭ شىعىس جاعالاۋىنان سۇڭگۋىر قايىقتىڭ ءجۇزىپ شىققانىن باقىلاۋدا ۇستاپ وتىرعان. ءبىر كەزدە سۋ استى كەمەسى وزىنەن ءوزى توقتاپ قالعان. وسىدان كەيىن اقش-تىڭ تىڭشى سپۋتنيكتەرى, ۇشاقتارى مەن كورابلدەرى كحدر فلوتىنىڭ جوعالعان ءسۋبماريندى قالاي ىزدەگەنىن بىرنەشە كۇن بويى باقىلاپ تۇرعان. قۇراما شتاتتار جوعالعان قايىقتىڭ تاعدىرى جونىندە ناقتىلى مالىمەت بىلمەيدى. ونىڭ درەيفكە تاپ كەلگەنى نە سۋ استىنا باتىپ كەتكەنى ازىرگە بەلگىسىز. امەريكا اسكەريلەرىنىڭ بولجامى بويىنشا, جاتتىعۋ كەزىندە سۇڭگۋىر قايىق تەحنيكاسى ىستەن شىعىپ قالعان بولۋى دا مۇمكىن. ايماقتا قازىرگى كۇندەرى اقش پەن وڭتۇستىك كورەيانىڭ كەڭ اۋقىمدى اسكەري جاتتىعۋلارى ءجۇرىپ جاتىر. وسىعان بايلانىستى پحەنيان مۇنىڭ الدىندا ءوز قاۋىپسىزدىگىنە زالال كەلەتىن بولسا, سەۋل مەن ۆاشينگتونعا پرەۆەنتتى يادرولىق سوققىلار بەرەتىنىن مالىمدەگەن بولاتىن. تالعات رايىمبەك. دەرەك: ras.kz. سۋرەت: serke.org.