بەلسەندىلىك تانىتۋعا شاقىردى

سايلاۋ كۇنى جاقىنداعان سايىن ايماقتاردا پار­تيا­لاردىڭ بەلسەندىلىگى ارتا تۇسۋدە. سولاردىڭ ءبىرى – جالپى­ۇلتتىق سوتسيال-دەموكراتيالىق پارتيا. جسدپ اتىنان پارلامەنت ءماجىلىسى دەپۋتاتتىعىنا كانديداتتار ايدار الىباەۆ پەن «وبششەستۆەننايا پوزيتسيا» گازەتىنىڭ رەداكتورى باقىتكۇل ماكيمباي جامبىلدىق سايلاۋشىلارمەن كەزدەستى. جيىنعا قالا تۇرعىندارى مەن بىرنەشە اۋداننان كەلگەن پارتيا وكىلدەرى قاتىستى. وبلىس ورتالىعىنداعى «ساۋلە» ءدامحاناسىندا وتكەن كەزدەسۋدى جسدپ جامبىل وبلىستىق فيليالىنىڭ توراعاسى گريگوري تەن اشىپ, بۇگىنگى كۇنى سايلاۋشىلارمەن جۇرگىزىلىپ جاتقان ۇگىت-ناسيحات جۇمىستارى تۋرالى ايتىپ بەردى. سونداي-اق, ول جينالعانداردى پارتيانىڭ قازىرگى باستامالارى, بولاشاق جوسپارلارى مەن مىندەتتەرى تۋرالى دا حاباردار ەتتى. – راس, ءبىز ءۇشىن ماڭىزدىسى – كوپشىلىكتىڭ سايلاۋعا كەلۋى. تاڭداۋ وزدەرىندە. دەگەنمەن, ۇمىتكەرلەر تاراپىنان ۇگىت-ناسيحات جۇمىستارىن جۇرگىزۋدە بەلسەندىلىك تانىتىپ, پارتيانىڭ باعدارلاماسىنداعى باسىمدىقتاردى كوپشىلىككە جەتكىزۋ دە پارىز. ساياسي ناۋقان كەزىندە سايلاۋشىلار ءۇشىن بارىنشا تۇسىنىكتى دە قولايلى ناسيحات قاعازدارىن تاراتىپ, جۇمىس جۇرگىزۋدەمىز. سوڭعى ون جىل كولەمىندە فيليال قوعامداعى ماسەلەلەرگە ءۇن قاتىپ كەلەدى, – دەدى گريگوري تەن. بۇدان كەيىن ءسوز العان كانديداتتار ايدار الىباەۆ پەن باقىتكۇل ماكيمباي سايلاۋشىلارعا جسدپ-نىڭ سايلاۋالدى باعدارلاماسىن تانىستىردى. «ءبىزدىڭ ۇسىنىستارىمىز شاعىن جانە ورتا كاسىپكەرلىك سالاسىن دامىتۋ توڭىرەگىندە قاراستىرىلعان. سونىمەن قاتار, جۇمىس ورىندارىن اشۋ, جۇمىسسىزدىقپەن كۇرەس, ت.ب. ماڭىزدى ماسەلەلەر بار. سوتسيال-دەموكراتتار, سونداي-اق, پارتيانىڭ ۇستانىمدارى مەن نەگىزگى قاعيدالارىن تىلگە تيەك ەتىپ, ءماجىلىس سايلاۋىنا سايلاۋشىلاردىڭ سەنىمىنەن شىعۋ ءۇشىن قاتىسىپ جاتقاندارىن جەتكىزدى. كانديداتتاردىڭ ايتۋىنشا, پارتيانىڭ قازىرگى مەجەسى سايلاۋ ناۋقانىندا وسىلايشا جەر-جەرلەردە القاسوزدەر, فلەش-موبتار وتكىزىپ, سايلاۋشىلارمەن كەزدەسۋ, پارتيا قاتارىنا جاڭا مۇشەلەردى قابىلداۋ ەكەن. جالپىۇلتتىق سوتسيال-دەموكرا­تيالىق پارتيانىڭ وكىلدەرى ۇگىت-ناسيحات ناۋقانى كەزەڭىندە بۇعان دەيىن استانا, قاراعاندى جانە الماتى قالالارىندا بولعاندارىن ايتتى. جوعارىدا اتاپ كورسەتىلگەندەي, ءالى دە ەلىمىزدىڭ ءبىراز ايماقتارىن, ونىڭ ىشىندە ءىرى قالالارىن ارالاۋدى جوسپارلاپ وتىرعان كورىنەدى. ال تارازداعى كەزدەسۋ بارىسىندا پار­تيانىڭ جەرگىلىكتى فيليالىنىڭ توراعاسى گريگوري تەن سايلاۋعا دايىندىق جۇمىستارى تۋرالى كەڭىنەن اڭگىمەلەپ بەردى. كەزدەسۋ سوڭىندا پارتيا وكىلدەرى جيىنعا كەلگەندەرگە الداعى ساياسي ناۋقاندا بەلسەندىلىك تانىتىپ, سايلاۋعا جاپپاي قاتىسۋعا شاقىردى. ورالحان ءداۋىت, «ەگەمەن قازاقستان». جامبىل وبلىسى.