بىرلىگىمىز – بيىگىمىز!

قوستانايدا «بىرلىك» ساياسي پارتياسىنىڭ كوشباس­شىلارى جەرگىلىكتى ەتنومادەني بىرلەستىكتەردىڭ وكىل­دەرىمەن جانە جاستارمەن كەزدەسۋلەر وتكىزدى. سولاردىڭ ءبىرى – پارلامەنت ءماجىلىسى دەپۋتاتتىعىنا پارتيا ۇسىنعان كان­ديدات مۇرات قوجامقۇلوۆ. م.قوجامقۇلوۆ وزىمەن كەزدەسۋگە كەلگەندەرگە پارتيانىڭ سايلاۋالدى باعدارلاماسى تۋرالى اڭگىمەلەدى: – «بىرلىك» ساياسي پارتياسىنىڭ سايلاۋالدى باعدارلاماسىندا نەگىزىنەن ءۇش ماسەلە قامتىلعان. الەۋمەتتىك ادىلەتتىلىك, رۋحاني دامۋ جانە قورشاعان ورتانىڭ تازالىعى – پارتيا ۇستانعان تەمىرقازىق. وسى جۇمىستاردىڭ قاي-قايسىسىن دا جۇزەگە اسىرۋ ءۇشىن ەلىمىزدە, ەڭ باستىسى, دوستىق, بىرلىك بولۋى ءتيىس. ءبىزدىڭ ەلىمىزدە قازاقتارمەن قاتار كوپتەگەن ۇلىستار تۇرادى. ءار ۇلىستىڭ مادەنيەتىن, سالت-ءداستۇرىن دامىتۋعا, ءتىلىن ۇمىتپاۋعا مەملەكەت تاراپىنان بارلىق جاعداي جاسالعان. سوندىقتان بۇگىندە قازاقستاندىق مادەنيەت پايدا بولدى. ونىڭ ەرەكشەلىگى بارلىق ۇلتتار مادەنيەتىمەن بايىتىلعاندىعىندا بولسا كەرەك. وعان بۇكىل دۇنيەجۇزىندەگى مەملەكەتتەر قىزىعۋشىلىقپەن قارايدى, – دەدى ول. كەزدەسۋگە كەلگەندەر ساياسي پارتيا اتى­نان سايلاۋعا تۇسكەلى وتىرعان كاندي­داتقا سۇراقتار بەردى, پىكىرلەرىن ورتاعا سالدى. – مەن ۋكراين ۇلتى وكىلدەرىنىڭ ەتنومادەني بىرلەستىگىنەنمىن. ەلىمىزدەگى ناۋرىز ايىندا وتەتىن سايلاۋعا تەك «بىرلىك» ەمەس, بىرنەشە ساياسي پارتيا ءتۇسىپ وتىر. ەلىمىزدى بىرلىگىنەن ايىرماسىن دەپ تىلەيمىن. قانشا پارتيا بولسا دا ولاردىڭ ءبىر-ءبىرىن جامانداۋى, جالا جابۋى, ايقاسۋى جوق. ولاردىڭ بارلىعى دا قازاقستاننىڭ دامۋى ءۇشىن, حالقىمىزدىڭ قۋاتتى تۇرۋى ءۇشىن ءتۇرلى پروبلەمالاردى كوتەرىپ جاتىر. مىنە, رۋحاني دامۋ دەپ وسىنى ايتادى. ءبىز سوعىستان كەيىنگى اۋىر جىلداردى كورگەن ۇرپاقپىز, تىنىشتىقتىڭ قادىرىن بىلەمىز. حالقىمىزدىڭ بىرلىگىنەن اسقان باقىت, الار بيىك جوق. قازاقستانعا جاس كەزىمدە تىڭ كوتەرۋگە كەلگەنمىن. سودان قالدىم, مەنىڭ بارلىق باقىتىم, تاعدىرىم تەك قازاقستانمەن بايلانىستى, – دەدى ۆالەنتينا سۆيريدەتسكايا. م.قوجامقۇلوۆقا جاستار جاعى دا سۇراق قويدى. ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ ءبىرىنشى كۋرس ستۋدەنتتەرى پارتيانىڭ جاس­تار قاناتى تۋرالى بىلگىسى كەلدى. كەزدەسۋ قوناعى ولارعا پارتيانىڭ جاستار قاناتى بار ەكەندىگىن, ول تۋرالى وبلىستىق فيليالدان ءبىلىپ, پارتيا وتكىزەتىن اكتسيالارعا, باسقا دا شارالارعا قاتىسۋىنا, كەرەك دەسە, پارتياعا مۇشەلىككە وتۋىنە دە بولاتىندىعىن ايتتى. اكتسيا دەمەكشى, «بىرلىك» پارتياسى قازاقستان سۋرەتشىلەرىنىڭ بايقاۋىن وتكىزىپ, ودان جەڭىپ شىققان جۇمىستاردى ساتىپ, ونىڭ قارجىسىن اق قان اۋرۋىمەن اۋىراتىن بالالار ءۇشىن اۋداردى. سونىمەن قاتار, تاۋەلسىزدىك جىلدارى ومىرگە كەلگەن جاس اقىندار ءمۇشايراسىن وتكىزدى. «بىرلىك» پارتياسى ۇلتارالىق بىرلىك, دوستىق, تاتۋلىق بولۋى ءۇشىن رۋحانياتتى دامىتۋ كەرەك دەگەن ۇستانىمدى ۇستانادى. پارتيا بەلسەندىسى م.قوجامقۇلوۆ قوستانايلىق سايلاۋشىلارعا وسى ماسەلەنى ەرەكشە ايتىپ ءتۇسىندىردى. ءنازيرا جارىمبەتوۆا, «ەگەمەن قازاقستان». قوستاناي.