تاربيە بالاباقشادان باستالادى

بۇگىنگى كۇننىڭ ءبىر تالابى – مەم­لەكەت-جەكەمەنشىك ارىپتەستىگىن دامىتۋ بارىسىندا الماتى وب­لى­سىنىڭ اكىمى اماندىق باتالوۆ 2015 جىلدىڭ باسىندا, مەكتەپكە دەيىنگى تاربيەمەن قامتۋدى جەتىسۋ جەرىندە 77%-عا جەتكىزۋ تۋ­رالى مەملەكەتتىك قىزمەتكەرلەر مەن كاسىپكەرلەرگە تاپسىرما بەرگەن ەدى. ناتيجەسىندە ءبىر جىلدىڭ ىشىندە وبلىستىڭ بالا­باقشامەن قامتۋ كورسەتكىشى 13,3%-عا ارتتى. بۇل رەتتە سۇبەلى ۇلەسىن قوسىپ جۇرگەن كاسىپكەرلەر بارشىلىق. «ءبىلىم سالاسىنا 2009 جىلدان بەرى ينۆەستيتسيا تارتىپ جۇرگەن كاسىپكەرمىن. تالعار اۋدانى, گۇل­دالا اۋىلدىق وكرۋگىندەگى جا­­ڭا قۋات ەلدى مەكەنىندە 500 با­لاعا ارنالعان ەكى بالاباقشا, 350 ورىندىق مەكتەپ قۇرىلىسىن سالىپ, 156 ادامدى جۇمىسپەن قامتىپ وتىرمىن. مەملەكەت قا­زىناسىنا جىل سايىن 30 ملن.تەڭگەگە جۋىق سالىق تولەنۋدە. ءبۇ­گىنگى كۇنى مەملەكەت-جەكەمەن­شىك ارىپتەستىگىن جانداندىرۋ ماق­­سا­تىندا قاپشاعاي قالاسىنان 59 سوتىق جەر تەلىمىن ساتىپ الىپ, ءبىرىنشى قاباتىندا 250 ورىندىق بالاباقشاسى بار تۇرعىن ءۇي كە­شە­نىنىڭ قۇرىلىسىن سالۋدى جوس­پارلاپ وتىرمىن. وسى الەۋمەتتىك نىساندى مەملەكەت-جەكەمەنشىك ارىپتەستىگى نەگىزىندە بيلىك قولداسا نۇر ۇستىنە نۇر بولار ەدى. بۇل جوبا وبلىس باسشىسىنىڭ 2016 جىلى بالاباقشامەن قامتۋدى 87%-عا جەتكىزۋ تۋرالى بەرگەن تاپسىرماسىن دەر كەزىندە ورىنداۋعا وزىندىك ۇلەسىن قوسپاق. وسىنداي جەتىستىكتەرمەن قاتار, شەشىمىن تاپپاي تۇرعان ماسەلەلەر دە بار. بىراق قاي پروبلەما بولماسىن, قازىرگى تاڭدا ەلباسىمىزدىڭ كا­سىپ­­كەرلەرگە دەگەن قامقورلىعى ار­قاسىندا شەشىمىن تابادى دەگەن سەنىمدەمىن. مەنىڭ مەكتەپ پەن بالاباقشانى تۇرعىزعان اۋىلىم الماتى قالاسىنىڭ جانىندا ورنالاسقان. وكىنىشكە قاراي, وسى مەكەن جايدىڭ ءالى اكىمشىلىك مارتەبەسى بولماعاندىقتان, مەكتەپ قۇرىلىسىنىڭ ينفراقۇرىلىمىن – سۋدى دا, ەلەكتر جارىعىن دا ءوز قاراجاتىممەن وتكىزدىم. ءبى­راق, مەكتەپكە بارار جولدى اس­فالتتاۋعا مەنىڭ مۇمكىنشىلىگىم جەتپەدى. بۇگىنگى كۇنى 450 مەتر جە­رىنە ەسكى اسفالت پەن قيىرشىق تاس توسەپ, قارا جول سالىپ قويىپ وتىرمىن. مەكتەپكە بارار جولدا قاراۋسىز جاتقان بوس جەرلەرگە كوپشىلىك دەمالاتىنداي سكۆەر جاساپ, كوگالداندىرىپ, شامدار ور­ناتىپ, سپورت كەشەندەرى مەن ۆەلوسيپەدشىلەرگە ارنالعان جول سالسام با دەگەن ويىم بار», دەدى كاسىپكەر كۇلاندا باتىربەكوۆا. وتكەن جىلى قازان ايىندا اتالعان كاسىپكەردىڭ باس­شى­لى­عى­مەن «دانا» مەكتەبىنىڭ اشىلۋى سالتاناتتى تۇردە وتكەن ەدى. از ۋاقىت ىشىندە بالالارى ءتۇرلى حالىقارالىق, رەسپۋبليكالىق, بايقاۋلار مەن وليمپيادالاردىڭ جەڭىمپازدارى اتانۋدا. مەك­تەپ­تەگى باسسەينگە بىلتىر اشىل­عان ينكليۋزيۆتى ەكى توپتىڭ بالالارى قاتىسىپ, حالىقتىڭ ري­زاشىلىعىنا بولەنۋدە. سو­نىمەن قاتار, مەك­تەپتىڭ زاماناۋي جابدىقتالعان با­زاسىندا اۋىل بالالارىن جاپپاي سپورتپەن شۇعىلدانۋعا, قو­سىمشا ءبىلىم بەرۋمەن قامتۋ ءۇشىن مەملەكەت-جەكەمەنشىك ارىپتەستىگى نەگىزىندە ءتۇرلى ۇيىرمەلەر اشۋعا ءوز ۇلەسىن قوسۋعا كاسىپكەر دايىن. سونىمەن قاتار, كۇلاندا با­تىربەكوۆا تەك كاسىپكەرلىكپەن شەك­­تەلىپ قالماي, قوعامدىق جۇ­­مىستارعا دا بەلسەنە ارالاسا بىلەتىن ورەلى جان. وزىندىك ويى بار. ەڭ باستىسى, مىنا جۇ­مىس تەك ەر-ازاماتتارعا عا­نا ءتان ەكەن دەپ ىركىلمەيدى. ءسوي­تىپ, قاي­تا سايلانعان وڭىرلىك كا­سىپ­كەرلەر پالاتاسىنا تالعار اۋدا­نى بويىنشا مۇشەلىككە ءوتىپ, جاۋاپكەرشىلىگىن ارتتىرا تۇسۋدە. سوندىقتان ەلىمىزدىڭ كاسىپكەرلەرىن ءوز ينۆەستيتسيالارىن الەۋمەتتىك-ەكونوميكالىق ماسەلەلەردى شەشۋگە, ۇلتتىڭ ۇرپاعىنا ۇلاعات ءنا­رىن سىڭىرۋگە شاقىرۋدا. تاعى ءبىر ايتا كەتەر جايت, كاسىپكەردىڭ ءوتىنىشىن ءوڭىر باسشىسى ەستىسىمەن بىردەن تالعار اۋدانىنىڭ اكىمىنە مەملەكەت-جەكەمەنشىك ارىپتەس­تى­گى اياسىندا اتالعان كاسىپكەرگە قولداۋ كورسەتۋ جونىندە ءدۇيىم جۇرتتىڭ الدىندا نۇسقاۋ بەردى. نۇربول الدىباەۆ, «ەگەمەن قازاقستان». الماتى وبلىسى.