تارازدىڭ تويدان كەيىنگى تىرلىگى قانداي؟

توي جاساۋدىڭ ءبىر جاقسى جەرى – تام-تاسىڭدى تۇزەپ, جوندەپ, اكتەپ-كوكتەپ, ەسكى-قۇسقى دۇنيەدەن قۇتىلىپ, جاڭادان جاسانىپ, ءبىر سىلكىنىپ قالاسىڭ. ءدال سول سياقتى كونە تاراز قالاسى قازاق حاندىعىنىڭ 550 جىلدىق تويى قارساڭىندا توتىداي تارانىپ, تۇرلەنىپ, ەڭسەسىن ءبىر تىكتەپ الدى. ەندى, مىنە, جاس ۇرپاققا بەرەر تاعىلىمى مول بولعان ءدۇبىرلى توي ءوتتى. «كەلگەنشە قوناق ۇيالادى, كەلگەن سوڭ ءۇي يەسى ۇيالادى» دەگەندى جادىلارىنا جاقسىلاپ تۇيگەن جامبىلدىق شەنەۋنىكتەردىڭ توي قارساڭىنداعى قاربالاس قي­مىل­دارى دا بىرتە-بىرتە سايابىر­سىپ, ماڭدايلارىن ءسۇرتىپ, ارقانى كەڭگە سالعانى دا انىق. ايتسە دە تارازدىڭ تىرشىلىگى تويدان كەيىن, توقىراپ قالعان جوق. جام­بىل وبلىسىنىڭ اكىمى كارىم كوكىرەك­باەۆ ءدۇبىرلى توي وتىسىمەن-اق بارلىق اۋداندار مەن تاراز قالا­سىنىڭ جۇمىسىن ءبىر ساتتە بوساڭسىتپاي, اكىمدەرگە ءۇستى-ۇستىنە تاپسىرمانى ءۇيىپ, تىپتەن شيراتا ءتۇستى. سونىمەن, حاندىقتىڭ مەرە­كەسى حالىقتىڭ بەرەكەسىنە اينالىپ, كونە شاھاردىڭ باسشىلىعى شارۋاسىن دوڭگەلەتىپ اكەتتى. – «جالعىز ادام قورعان بولمايدى, جالعىز اعاش ورمان بولمايدى» دەگەن بار عوي, – دەيدى تاراز قالاسىنىڭ اكىمى نۇرجان كالەندەروۆ. – وسى جەرگىلىكتى حا­لىق­تىڭ قولداۋىمەن كوپ ءىس بىتەدى. سونىڭ ءبىرى – تازالىق جۇ­­مىس­تا­رى. قالانىڭ سىرتقى كەل­بەتى مەن ىشكى تازالىعىن جاساۋ بار­لى­­عى­مىز­دىڭ ورتاق مىندەتىمىز. تازا­­لىق جۇمىستارى جىل ون ەكى اي بو­­يىنا جۇرگىزىلۋدە. شىنىن ايتۋ كەرەك, قازاق حاندىعىنىڭ تويى كونە قا­لا­نىڭ سىرتقى كەلبەتىنە عانا ەمەس, ءتىر­شىلىگىنە دە ۇلكەن سەرپىن بەردى. قازىر قالادا 22 431 كاسىپكەرلىك سۋبەكتىسى تىركەلگەن. ونىڭ 17 288-ءى جەكە كاسىپكەر, 5107-ءسى شا­عىن جانە 36-سى ورتا كاسىپورىن سۋبەك­تىلەرى. شاعىن, ورتا بيزنەس سۋبەكتىلەرىمەن وندىرىلگەن ءونىم كولەمىنىڭ ۇلەسى 21 ملرد. 864 ملن. تەڭگەنى قۇراپ, جالپى ونەركاسىپ كاسىپورىندارىمەن وندىرىلگەن ءونىمنىڭ 12 پايىزىن قۇراپتى. – سوڭعى جىلدارى بيزنەستى دامىتۋ ءۇشىن اكىمشىلىك كەدەرگىلەردى جويۋ, مەملەكەتتىك ساتىپ الۋ ءرا­سىم­دەرىن جەتىلدىرۋ, ەركىن باسە­كەلەس­تىكتى ىلگەرى دامىتۋ, سونداي-اق, «بيزنەستىڭ جول كارتاسى-2020» باعدارلاماسى اياسىندا, قولداۋ كورسەتۋ بويىنشا ۇلكەن جۇمىستار اتقارىلۋدا, – دەيدى بۇل جونىندە تاراز قالاسىنىڭ اكىمى نۇرجان كالەندەروۆ. – اتاپ ايتار بولساق, «بيزنەستىڭ جول كارتاسى-2020» باعدارلاماسى اياسىندا, 2015 جىلى 3 ملرد. 438 ملن. تەڭگەگە 69 جوبا قارجىلاندىرىلدى. ونىڭ ىشىندە جەڭىلدەتىلگەن نەسيە بەرۋ تەتىكتەرى بويىنشا 3 ملرد. 303 ملن. تەڭگەگە 62 جوبا, وندىرىستىك ينفراقۇرىلىمدى دامىتۋ تەتىگى بويىنشا 123,5 ملن. تەڭگەگە 3 جوبا جانە جاڭا بيزنەس باستامالارعا گرانت ءبولۋ تەتىگى بويىنشا 11,7 ملن. تەڭگەگە 4 جوبا ىسكە اسىرىلۋدا. بۇل جوبالار ارقىلى قوسىمشا 300 جاڭا جۇمىس ورىندارى اشىلدى. وسى جوبالار اياسىندا «اۋليە-ا­­تاترانسپاسس» جشس «Donfeg» ماركالى 17 اۆتوبۋس ساتىپ الۋعا 71 ملن. تەڭگە, «ياسلي-ساد» انەت-ا» جشس 250 ورىندىق بالاباقشا قۇرىلىسىنا جانە «زەربۇلاق» اۋماعىندا دەمالىس ورتالىعىن سالۋعا ەكى بانكتەن جەڭىلدەتىلگەن 265 ملن. تەڭگە, «اراي-لوگيستيك» جشس قوناقۇي كەشەنى بار بيزنەس ورتالىعىنىڭ قۇرىلىسىن جۇرگىزۋگە 900 ملن. تەڭگە جەڭىلدەتىلگەن نەسيە الدى. سونداي-اق, جەكە كاسىپكەر «ناۋات» مەتالل بۇيىمدارىن حروممەن جانە التىنمەن قاپتاۋدى ۇيىمداستىرۋ, «جەڭىسبەك» جك وتىن بريكەتىن دايىنداۋ, «Exclusive art» جشس تسەلليۋلوزدى جىلىتقىش ءوندىرۋ, «R & L Company» جشس بيزنەس پورتالىن قۇرۋ بويىنشا جاڭا بيزنەس باستامالارعا گرانت ءبولىندى. ارينە, وبلىس ورتالىقتارىنىڭ قانشالىقتى دامىپ كەلە جاتقانى قۇرىلىس قارقىنىنا دا بايلانىستى. سوڭعى كەزدەرى تاراز قالاسىندا زاماناۋي ساۋدا ورتا­لىقتارىن سالۋ بەلسەندى تۇردە جۇرگىزىلۋدە. مىسالى, جامبىل داڭعىلى بويىندا 6 مىڭ شارشى مەتردى قۇرايتىن 5 قاباتتى ساۋدا ءۇيى عيماراتىنىڭ جانە تاشكەنت كوشەسىنىڭ بويىندا اۋماعى 2 مىڭ شارشى مەتر بولاتىن 3 قاباتتى ساۋدا ءۇيىنىڭ عيماراتى سالىنۋدا. بۇرىنعى «كاراۆان» بازارى اۋماعىندا كولەمى 55,3 مىڭ شارشى مەتر بولاتىن «MART» ءىرى ساۋدا ويىن-ساۋىق ورتالىعى قالا تىرشىلىگىن قىز-قىز قايناتاتىنى انىق. ارينە, بۇل نىساندار قالانىڭ ءساۋ­لەتتىك كەلبەتىن كوركەيتىپ, جاڭا جۇمىس ورىندارىن اشىپ, بەي-بەرەكەت ساۋدا ماسەلەلەرىن شەشۋگە ەلەۋلى ۇلەسىن قوسادى دەگەن سەنىم بار. ءيا, كونە تارازدا وتكەن بۇل تويدىڭ تاريح تورىنەن الار ءوز ورنى بار. ەڭ باستىسى, حالقىمىزدىڭ وتكەنىن ۇمىتپاي, بۇگىنىن باعالاپ, بولاشاققا نىق سەنىممەن قاراۋعا ۇندەپ, ەلدىڭ رۋحىن كوتەرىپ كەتتى. مىنە, جاڭا كەلبەتتى تارازدىڭ تىرلىگى وسىنداي, اعايىن. ورالحان ءداۋىت, «ەگەمەن قازاقستان». جامبىل وبلىسى.