قۇپيا تسەح قۇرىققا ءىلىندى

قازىرگى ۋاقىتتا سالىق زاڭناماسىنا ءتيىستى وزگەرىستەر ەنگىزىلىپ, سالىق تولەۋشىلەردىڭ جۇمىسىن جەڭىلدەتۋ ماقساتىندا كوپتەگەن رەفورمالار جاسالىپ جاتقانى بەلگىلى. سوعان قاراماستان, سالىق تولەۋدەن جالتارىپ, كولەڭكەلى ەكونوميكانىڭ ىقپالىنان شىعا الماي جۇرگەن سۋبەكتىلەر سانى ءالى دە ازايار ەمەس. اتاپ ايتساق, جۋىردا الماتى قالالىق مەملەكەتتىك كىرىستەر دەپارتامەنتى ەكونوميكالىق قىلمىستاردى تەرگەۋ قىزمەتى وكىلدەرىنىڭ جۇرگىزگەن رەيدى بارىسىندا زاڭسىز كاسىپكەرلىكپەن اينالىسقان قۇپيا تسەح اشكەرە بولدى. اتالمىش تسەح بىرنەشە جىل بويى جاسىرىن تۇردە ەسەپتىك باقىلاۋ ماركاسىن شىعارۋمەن اينالىسقان. بۇعان قوسا شەتەلدەردەن كونتراباندالىق جولمەن قىمبات «ماكاللان», «چيۆاس», «ابسوليۋت», «ەلتسين» ماركالى ۆيس­كي مەن اراق جانە «مالبورو», «پارلامەنت», «مەۆيۋس» سياقتى تەمەكى ونىمدەرىن اكتسيزدىك ماركاسىز اكەلىپ وتىرعان. سودان كەيىن جالعان جولمەن اكەلگەن تاۋارلارعا وزدەرى شىعارعان اكتسيزدىك ماركالاردى جاپسىرىپ ساتۋمەن اينالىسقان. تاۋارلار الماتى قالاسى مەن بىرقاتار وبلىس ورتالىقتارىنىڭ كوڭىل كوتەرەتىن تۇنگى كلۋبتارىندا, كازينولاردا, كاراوكي-بارلاردا جانە مەيرامحانالاردا تاراتىلعان. قۇپيا تسەحتى اشكەرەلەۋ بارىسىندا الىنعان جەدەل اقپاراتتار بويىنشا انىقتالعان 4 كۇدىكتىنىڭ ءۇيىن ءتىنتۋ بارىسىندا قۇنى 70 مىڭ دوللاردان اساتىن ءسپيرتتى ىشىمدىكتەر مەن 2000 دانادان ارتىق جالعان ەسەپتىك باقىلاۋ ماركاسى جانە سونى باسىپ شىعاراتىن ارنايى اپپارات تابىلدى, دەپ حابارلايدى الماتى قالالىق مەملەكەتتىك كىرىستەر دەپارتامەنتىنىڭ ءباسپاسوز قىزمەتى. اتالمىش وقيعا بويىنشا ءسپيرتتى ءىشىم­دىكتەردىڭ ساپاسى مەن ەسەپتىك باقىلاۋ مار­كاسىنىڭ جالعاندىعىن انىقتاۋ ماقساتىندا سوت-تاۋارلىق جانە تەحنيكالىق ساراپتاما تاعايىندالدى. سونىمەن قاتار, قازاقستان رەسپۋبليكاسى قىلمىستىق كودەكسىنىڭ 233, 214-باپتارى بويىنشا №157500121001940 قىلمىستىق ءىس قوزعالدى. تەرگەۋ بارىسىندا تاعىلعان ايعاقتار بۇلتارتپاستاي بولعاندىقتان, ۇستالعانداردىڭ ءوز كىنالارىن تولىقتاي مويىنداماۋعا امالدارى قالمادى. ايناش ەسالي, «ەگەمەن قازاقستان». الماتى.