ەلەكتروندى بيبليوگرافيا

– قايىم مۇحامەدحانوۆتىڭ 100 جىلدىعىنا تارتۋ ا.پۋشكين اتىنداعى شىعىس قازاقستان وبلىستىق كىتاپحاناسىندا كورنەكتى عالىم, ابايتانۋشى قايىم مۇحامەدحانوۆتىڭ 100 جىلدىعىنا وراي, عالىمنىڭ ەلەكتروندى بيبليوگرافيالىق كورسەتكىشىنىڭ تۇساۋكەسەرى ءوتتى. اتالعان شاراعا جوعارى جانە ارنايى وقۋ ورىندارىنىڭ وقىتۋشىلارى مەن ستۋدەنتتەرى, كىتاپحاناشىلار, مادەنيەت سالاسىنىڭ قىزمەتكەرلەرى جانە ادەبيەت ءپانىنىڭ مۇعالىمدەرى قاتىستى. جارتى عاسىرعا جۋىق شىر­قالعان قازاق كسر-ءىنىڭ جانە تاۋەلسىزدىك جىلدارىنداعى ەلى­مىزدىڭ تۇڭعىش ءانۇرانىنىڭ اۆتورلارىنىڭ ءبىرى قايىم مۇحامەدحانوۆتىڭ ءومىرى مەن شىعارماشىلىعىن كەڭىنەن قام­تىعان بيبليوگرافيالىق كور­سەتكىشتىڭ قۇندىلىعى جوعارى. بۇعان دەيىن سەمەي قالاسىنداعى اباي اتىنداعى كىتاپحانا قىز­مەتكەرلەرى عالىمنىڭ العاشقى بيبليوگرافيالىق كورسەتكىشىن شىعارعان بولاتىن. سەمەيلىك كىتاپ­حاناشىلار باستاعان بيب­ليو­گرافيالىق جۇمىستى تو­لىقتىرىپ, زاماناۋي ينتەرنەت تىلىنە تۇسىرگەن ا.پۋشكين اتىنداعى وبلىستىق كىتاپحانا ۇجىمى بولىپ وتىر. سوندىقتان, ەلەكتروندى بيبليوگرافيانى شىعىس وڭىرىندەگى ەكى ءىرى كىتاپحانانىڭ بىرلەسكەن جوباسى دەۋگە بولادى. سونداي-اق, جاقىندا سەمەيدەگى كىتاپحانادا عالىم مەرەيتويىنا ارنالعان «ادام. قايراتكەر. تۇلعا» اتتى كورمە ۇيىمداستىرىلسا, وسكەمەندىك كىتاپحاناشىلار تۇ­ساۋكەسەر اياسىندا «قايىم الە­مى» اتتى كورمە وتكىزدى. وسى كور­مەلەردە ۇسىنىلعان كىتاپتار مەن جاريالانىمداردىڭ بارلىعى ەلەكتروندى كورسەتكىشتە بار. كىتاپحانا قىزمەتكەرلەرىنىڭ ايتۋىنشا, عالىمنىڭ ەلەكتروندى بيبليوگرافياسىمەن http://kray.pushkinlibrary.kz سايتى ارقىلى تانىسىپ, پايدالانۋعا بولادى. وندا عالىم ەڭبەكتەرىنىڭ ەلەكتروندى كاتالوگى ءتۇزىلىپ, دەرەكتەر حرونولوگيالىق تارتىپپەن ۇسىنىلعان. 1937 جىلى 20 جاسىندا وبلىستىق «ەكپىندى» گازەتىندە جاريالانعان العاشقى ولەڭ-جىرلارىنان باستاپ, بارلىق عىلىمي جيناقتارى مەن تۋىندىلارى, عالىم جايلى ەستەلىكتەر مەن زەرتتەۋلەر, دەرەكتەر, ءتىپتى جاقىندا الماتىدان جارىق كورىپ, وقىرمان قولىنا ءالى تيە قويماعان «قايىم مۇحامەدحانوۆ: حاتتار سويلەيدى» اتتى ەپيستوليارلىق جيناق جونىندە دە بىلە الاسىز. كورسەتكىشتە 47 كىتاپ, 600-دەن استام ماقالا, عالىم تۋرالى 500-دەن استام جاريالانىم دەرەگى توپتاستىرىلعان. ۋفالىق عالىم روزا گافاروۆنا قايىم مۇحامەدحانوۆتىڭ پات­شالىق رەسەي كەزىندەگى مۇ­سىل­ماندار اراسىنان شىققان اتاقتى باسپاگەر يلياس بورا­گانسكيدىڭ تاريحي ەسىمى مەن ەڭبەگىن ورالتۋعا سىڭىرگەن قىز­مەتى جونىندە تۇششىمدى دەرەكتەر ايتسا, تۇرسىن جۇرتباي قايىم مۇ­حامەدحانوۆتىڭ 10 تومدىق شى­عارمالار جيناعىن شىعارۋعا بۇرىنعى مادەنيەت جانە اقپارات ءمينيسترى مۇحتار قۇل-مۇحاممەد پەن سول كەز­دەگى ءمينيستردىڭ ورىنباسارى الىبەك اسقاروۆتىڭ ۇيىتقى بولىپ, قولداۋ كورسەتكەنىن, قولجازبالاردى جيناقتاپ, ءتۇ­سىنىگىن جازعان شاكىرتى ەربول ىرگەباەۆتىڭ ەڭبەگى ەرەكشە ەكەنىن اتاپ ءوتتى. ابايتانۋ عىلىمىنىڭ نەگىزىن قالاۋشىلاردىڭ ءبىرى, سەمەي قالاسىنداعى اباي مۇرا­جايىنىڭ اشىلۋىنا تۇرتكى بولعان اقىن, جازۋشى, دراماتۋرگ, عالىم قايىم مۇحامەدحانوۆ – ءومىر جولىنىڭ بۇرالاڭى مول, تاعدىركەشتى قالامگەر. مۇحتار اۋەزوۆتىڭ سەنىم ارتقان شاكىرتى رەتىندە ستاليندىك قۋعىن-سۇرگىن كەزەڭىندە زاڭعار جازۋشىنى تۇقىرتۋ ءۇشىن جاس قايىمنىڭ دا قۋدالاۋدىڭ اششى ءدامىن تاتۋىنا تۋرا كەلدى. سوندىقتان, كەش بارىسىندا جاستاردىڭ عالىمنىڭ سۇرگىنگە تولى سۇراپىل جىلدارى اباقتىدا جازعان جىرلارىن وقۋى دا اسەرلى بولدى. دۋمان اناش, «ەگەمەن قازاقستان». وسكەمەن.