عاسىردان دا ۇزاق ءومىر

وتكەن 8 ناۋرىزدا ءنازيپا وسپانوۆا اجەي ءۇشىن قوس قۋانىش قاتار كەلدى. ايىرتاۋ اۋدانىنىڭ ساۋمالكول اۋىلىندا تۋىپ, بۇگىندە پەتروپاۆل قالاسىندا تۇراتىن كەيۋانا ءدال وسى كۇنى ءجۇز جاسقا تولدى. ءبىز ىزدەپ بارعاندا عاسىر جاساعان تىل ەڭبەككەرى توردە ۇلكەن ۇلى داۋلەتبايمەن, نەمەرە-شوبەرەلەرىمەن جاراسىپ وتىر ەكەن. باسىندا قىزىل-جاسىل گۇلدى اق ورامال, قولىندا تاسبيح. كارىلىكتەن شوگىڭكىرەپ قالعان دەمەسەڭىز, سويلەسە كەلە بويىنان قازاق اناسىنا ءتان قاسيەتتەر جارقىراپ سالا بەردى. ادەمى جۇزىندە ءارلى-بەرلى تارتىلعان قاتپار-قاتپار اجىمدەر وتكەن كۇندەردىڭ بەلگىسىندەي ساقتالىپ قالعان. قولىمدى جىبەرمەي ۇستاپ, بەتىمە ۇڭىلە قارادى. «كوپ نەمەرەلەرىنىڭ ءبىرى مە دەپ شىرامىتا الماي تۇرعان بولار, شاماسى», دەدى قىزى ءمارزيا. جانىندا «اجە-اجەلەپ» يىعىنا اسىلىپ, قوينىنا تىعىلعان كوگەنكوزدەردى شاتاستىرىپ السا, ايىپ تاعۋدىڭ ءوزى ورىنسىز. جانارى ءسال سىر بەرگەنى بولماسا, ءسوزى نىق, ويى سەرگەك. اۋىلداعى تانىستارىنىڭ ءبىرىن ايتىپ قالساق, جەتى اتاسىنا دەيىن تاراتىپ بەرەدى, دەدى اڭگىمەگە ارالاسقان ورتانشى قىزى ءرازيا. – بالالىقتىڭ نە ەكەنىن بىلمەي وستىك. اشارشىلىق ناۋبەتى تالاي شاڭىراقتى كۇيرەتىپ سالدى, – دەپ باستادى اڭگىمەسىن كەيۋانا. – اكە-شەشەمىز ءبىزدى جەتەكتەگەن كۇيى باسى اۋعان جاققا كوشتى. ءسويتىپ جۇرگەندە انامىز, باۋىرلارىم وپات بولدى. اكەم حامزا, مەن جانە ءىنىم قاراتاي ۇشەۋىمىز زار ەڭىرەپ قالدىق. ودان گەرمان سوعىس اشىپ, ءىنىم مايدانعا الىندى. ول سول كەتكەننەن ورالمادى. قاريانىڭ باسىنان وتكەرگەن اۋىرت­پالىعى مۇنىمەن اياقتالمايدى ەكەن. قۇداي قوسقان العاشقى قوساعى دا قولىنا قارۋ الىپ, وتان قورعاۋعا اتتانىپتى. تاڭ اتقاننان قاس قارايعانشا تىزە بۇكپەستەن ەڭبەك ەتىپ, جەڭىستى جاقىنداتۋعا تىربانىپ ۇلەس قوسقانداردىڭ ءبىرى ەكەنىن جازباي اڭعاراسىڭ. ءۇي ەگەسى مەن ءىنىسىن زارىعا, ساعىنا كۇتىپ, تالاي ءتۇندى ۇيقىسىز اتىرعان. ولارعا ءبىر ۋىس توپىراق جات جەردەن بۇيىر­عانىنا كوپكە دەيىن سەنبەي جۇرگەن. كەلمەسىنە كوزى انىق جەتىپ, كۇدەرىن ابدەن ۇزگەننەن كەيىن قازىرگى ۇل-قىزدارىنىڭ اكەسى, وزىنەن 16 جاس ۇلكەندىگى بار قۇسايىن دەگەن ازاماتقا تۇرمىسقا شىققان. – ونىڭ العاشقى ايەلىنەن ءۇش بالاسى بار ەكەن, ولاردى ءبولىپ-جارعان جوقپىن. ءبارىن تۋعانىمداي كوردىم. ءوزىم جەتى قۇرساق كوتەرىپ, ۇشەۋى جەر باسىپ ءجۇر. وسى كۇنگە جەتكەنىمە شۇكىرشىلىك ەتەمىن, – دەپ اڭگىمەنى ءبىر قايىرعان انا ءۇيدىڭ ۇلكەنى داۋلەتبايدىڭ بۇگىندە 73-كە كەلگەنىن, ەلۋگە جاقىنداعاندا كوتەرگەن كوپەيى جۇلدىزدىڭ 52-دە ەكەنىن ايتتى. كۇن وتكەن سايىن ءال-دارمەنى ازايىپ, قۋاتى كەمىپ بارا جاتقان كەيۋانانىڭ ءبىر ارمانى بار: ول– ءۇشىنشى توپتاعى مۇگەدەك قىزى ءمارزيا ەكەۋىنىڭ جەكە باسپانادان جايلى پاتەرگە كوشسەك دەگەن تىلەگى. بۇگىنگە دەيىن تىل ەڭبەككەرى رەتىندە ءۇي كەزەگىندە تۇرماعان ءوتىنىشىن قالا باسشىلارى ەسكەرسە دەگەن قۇلاققاعىسىن ايتۋدى ۇمىتپادى. الەمدىك قوعامداستىقتا ءوز ورنى بار تاۋەلسىز قازاق­ستاننىڭ اماندىعىن تىلەپ, عاسىردان اسقان مۇنداي انالارعا قانداي قۇرمەت كورسەتىلسە دە, ەش ارتىقتىق ەتپەيدى عوي. سونى شەنەۋنىكتەر ەسكەرسە دەيمىز.  ەرباقىت امانتاي ۇلى, جۋرناليست. پەتروپاۆل.