بەس مىڭ ميلدىك قاشىقتىق (ۆيدەو)

قۇتقارۋشىسىنا ريزا پينگۆين سونشاما جەردەن ءجۇزىپ كەلدى برازيليادا زەينەتكەر جواو پەرەيرا مەن دين-ديم دەگەن لاقاپ اتتى پينگۆيننىڭ اراسىندا كورگەن جۇرتتىڭ جۇرەگىن تەبىرەنتەتىن كەزدەسۋ بولدى. ماسەلەنىڭ ءمان-جايى مىناداي. بۇل كىسى 2011 جىلى مۇحيتتىڭ جاعاسىنداعى جارتاستاردىڭ اراسىندا اشتان ولگەلى جاتقان كىشكەنتاي قۇستى كورەدى. سول كەزدە پينگۆيننىڭ دەنەسىن ماي مەن مازۋت تۇتاس باسىپ قالعان ەكەن. ال قاناتى ءتىپتى كورىنبەيدى. ونى كورىپ, اياپ كەتكەن قاريا قولىنا الىپ, ۇيىنە اكەلەدى. جانۋاردى تۋرالاپ كەلگەن اجالدان انىق اراشالاپ قالعان جواو اقساقال ءبىراز ۋاقىت ونى ۇيىندە ماپەلەپ باعادى. كەيىن قۇس ءبىرجولا بەكىپ, ورنىنان تۇرعان كەزىندە وعان «دين-ديم» دەگەن ات بەرەدى. سوڭىنان ابدەن جەتىلىپ, قاتارعا قوسىلعان كەزىندە باياعى جاعاجايعا اكەلىپ, ەن مۇحيتىنا قايتا جىبەرەدى. ال ارادا بار-جوعى جارتى جىل وتكەننەن كەيىن دين-ءديمنىڭ وسى جاعالاۋعا قايتا ورالعانىن كور­گەندە, پە­رەي­رانىڭ تاڭ قالىسىندا شەك بولمادى. ءبىر قىزىعى, پينگۆين ءوزىن قۇتقارۋشىعا العىس ايتۋ ءۇشىن كەلگەنىن بىردەن ءبىلدىرىپ, انادايدان قاريانى كورگەننەن وعان تۇرا ۇمتىلىپتى. مىنە, سودان بەرى پينگۆين مەن ادامنىڭ اراسىنداعى وسى ءبىر نازىك تە ەرەكشە دوستىقتىڭ سيپاتىن جاعالاۋدا جۇرەتىن مىڭداعان ادام ءاردايىم سىرتتاي باقىلاپ تۇرادى ەكەن. سۋدا جۇزەتىن قۇس وسىدان باستاپ ءوزىن قۇتقارۋشىعا كەلىپ تۇرۋدى داعدىعا اينالدىرىپتى. سودان كەيىن ول سەگىز اي ۋاقىتىن وسىندا قاريانىڭ جانىندا وتكىزىپ, قالعان ۋاقىتىندا دۇنيەگە ۇرپاق اكەلۋ ءۇشىن چيلي جاققا قاراي كەتەدى. دين-ديم وسىلايشا ءوزىنىڭ دوسىمەن كەزدەسۋ ءۇشىن جىل سايىن الدەنەشە مىڭداعان ميل جەردەن كەلىپ تۇراتىن بولىپتى. ماماندار بەس مىڭ ميل (سەگىز مىڭ شاقىرىمنان استام) جەردى ءجۇزىپ ءوتۋ سۋدا جۇزەتىن قۇس ءۇشىن دە رەكورد بولىپ تابىلاتىنىن ايتىپ وتىر. مۇرات ايتقوجا. پينگۆين مەن قۇتقارۋشىسىنىڭ كەزدەسۋلەرى تۋرالى ۆيدەونى حاباردىڭ سايتتاعى نۇسقاسىنان كورە الاسىزدار. https://youtu.be/MWC5qeV-7ZU