ميانما پارلامەنتى ەل پرەزيدەنتتىگىنەن ۇمىتكەرلەرىن ۇسىندى

استانا. 10 ناۋرىز. ميانما پارلامەنتىنىڭ تومەنگى جانە جوعارى پالاتالارى پرەزيدەنتتىككە ءوز ۇمىتكەرلەرىن ۇسىندى. بۇل تۋرالى euronews.com اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. ميانما ەلىندە قاراشا ايىندا وتكەن سايلاۋدا جەڭىسكە جەتكەن دەموكراتيا ءۇشىن ۇلتتىق ليگاسى پرەزيدەنتتىككە ۇمىتكەر رەتىندە ۋ حتينا چجونى ۇسىندى. 70 جاستاعى ۋنيۆەرسيتەت پروفەسسورى تالاي جىل ۇلتتىق ليگا كوشباسشىلىعى ءۇشىن كۇرەسكەن اۋن سان سۋ ءچجيدىڭ جەكە كولىك جۇرگىزۋشىسى جانە سەرىگى بولعان. پارتيا حتين چجو كانديداتتىعىن نەيپيدودا وتكەن پارلامەنت وتىرىسى كەزىندە تومەنگى پالاتادان ۇمىتكەر رەتىندە ۇسىنعان. ال, نوبەل سىيلىعىنىڭ لاۋرەاتى اۋن سان سۋ ءچجيدىڭ ءوزى پرەزيدەنت بولا المايدى. سەبەبى, ميانما كونستيتۋتسياسىندا ءتۋىستارىنىڭ ءبىرى وزگە ەلدەردىڭ ازاماتى بولسا, ونداي ۇمىتكەرلەردى جوعارى مەملەكەتتىك لاۋازىمدارعا قويۋعا تىيىم سالىنعان. ال بۇگىندە اۋن سان سۋ ءچجيدىڭ ەكى ۇلى ۇلىبريتانيا ازاماتتىعىن الىپ, لوندوندا ءومىر ءسۇرىپ جاتىر. بۇدان كەيىن پارلامەنتتىڭ جوعارى پالاتاسىنىڭ ۇمىتكەر رەتىندە چين ۇلتتىق شتاتىنىڭ توراعاسى گەنري ۆان تحي يۋدى ۇسىنعانى بەلگىلى بولدى. وسى ەلدىڭ كونستيتۋتسياسىنا سايكەس, پارلامەنتتىڭ جوعارى جانە تومەنگى پالاتالارى ءبىر-ءبىر كانديداتتان ۇسىنا الادى. ال ءۇشىنشى ۇمىتكەردى ميانمانىڭ قارۋلى كۇشتەرى ۇسىنادى. جەڭىمپاز قاراپايىم جولمەن – ەڭ كوپ داۋىس جيناۋمەن انىقتالادى. سونداي-اق, مەملەكەتتىڭ جاڭا باسشىسى قىزمەتىنە تەك 1 ساۋىردەن باستاپ كىرىسەدى. سەبەبى, ءدال وسى ۋاقىتتا قازىرگى پرەزيدەنت تەين سەيننىڭ وكىلەتتىلىك مەرزىمى اياقتالادى. ەلامان قوڭىر. دەرەك, سۋرەت: euronews.com.