ەلباسى اقتوبە مۇناي جابدىقتارى زاۋىتىندا بولدى

اقتوبە. 10 ناۋرىز. ەلباسى اقتوبە وبلىسىنا جاساعان جۇمىس ساپارى اياسىندا بۇگىن اقتوبە مۇناي جابدىقتارى زاۋىتىندا بولدى. بۇل تۋرالى akorda.kz حابارلادى. قازاقستان پرەزيدەنتىنە زاۋىتتىڭ جاڭا ءونىم ۇلگىلەرى كورسەتىلىپ, مۇناي جابدىقتارىن شىعارۋدىڭ تەحنولوگيالىق ۇدەرىسى تانىستىرىلدى. سونداي-اق, نۇرسۇلتان نازارباەۆقا ءوڭىردىڭ الەۋمەتتىك-ەكونوميكالىق دامۋى مەن مەملەكەتتىك يندۋستريالىق-يننوۆاتسيالىق دامۋ باعدارلاماسىنىڭ جۇزەگە اسىرىلۋ بارىسى تۋرالى باياندالدى. مەملەكەت باسشىسى كاسىپورىن جۇمىسشىلارىمەن, وبلىستىڭ شاعىن جانە ورتا بيزنەس وكىلدەرىمەن اڭگىمەلەستى. اڭگىمە بارىسىندا قازاقستان پرەزيدەنتى ەلدى يندۋستريالاندىرۋعا بايلانىستى جۇمىسشى ماماندىقتارىنىڭ ماڭىزى ارتاتىنىن, سوعان وراي مەملەكەت بۇل باعىتتا ماقساتتى تۇردە جۇمىس جۇرگىزىپ جاتقانىن ايتتى. نۇرسۇلتان نازارباەۆ ءوڭىر كاسىپورىندارىندا جۇمىس ورىندارىن ساقتاۋدىڭ, وندىرىستىك ۇدەرىسكە يننوۆاتسيالار ەنگىزۋدىڭ ماڭىزدىلىعىن دا اتاپ ءوتتى. اقتوبە مۇناي جابدىقتارى زاۋىتى – ەلدەگى مۇناي كاسىپشىلىگىنە ارنالعان كەشەندى جابدىقتار شىعاراتىن مامانداندىرىلعان ماشينا جاساۋ كاسىپورنىنىڭ ءبىرى. قازاقستاندا ناسوس شتانگالارىن شىعاراتىن بىردەن-ءبىر زاۋىت سانالاتىن كاسىپورىن ەل نارىعىنىڭ 80 پايىزدان استامىن قامتاماسىز ەتەدى جانە وزبەكستان مۇناي كومپانيالارىنا جابدىقتار جەتكىزەدى. ساتىبالدى ءساۋىرباي. دەرەك, سۋرەت: akorda.kz.