مەرەكەمەن قۇتتىقتادى

حالىقارالىق ايەلدەر كۇنى مەيرامى قارساڭىندا, ياعني ناۋرىزدىڭ 7-8-ءى كۇندەرى قازاقستاننىڭ «اق جول» دەموكراتيالىق پارتياسى بىرقاتار بەلسەندى جۇمىستار اتقاردى. ماسەلەن, استانادا «اق جولمەن» جولىمىز ءبىر» دەگەن ۇران اياسىندا اۆتوشەرۋ ۇيىمداستىرىلىپ, پارتيا توراعاسى نازىك جانداردى ارناۋلى مەرەكەمەن قۇتتىقتادى. ەستەرىڭىزگە سالا كەتسەك, وتكەن اپتادا سايلاۋالدى ناۋقان كەزىندەگى ۇگىت-ناسيحات جۇمىستارى اياسىندا «اق جول» پارتياسىنىڭ وكىلدەرى ا.تۇرتاەۆ پەن ا.قوجامبەتوۆ قىزىلوردا قالاسىنداعى ءىرى ساۋدا ورىندارىنىڭ ءبىرى – «جاينا» ساۋدا ۇيىندە بولىپ, كاسىپتەرىن دوڭگەلەتىپ وتىرعان جەكە كاسىپكەرلەرمەن جانە ساۋدا جاساۋعا كەلگەن تۇتىنۋشىلارمەن جۇزدەسكەن ەدى. كەزدەسۋدە اقجولدىقتاردىڭ قوعام ءۇشىن جاڭا مۇمكىندىكتەردى قالىپتاستىرۋ جونىندەگى باعدارلاماسى ءسوز بولدى. اتاپ ايتقاندا, ا.تۇرتاەۆ V شاقىرىلىمداعى پارلامەنتتەگى «اق جول» پارتياسى فراكتسياسىنىڭ اتقارعان جۇمىستارىنا قىسقاشا شولۋ جاساپ, پارتيانىڭ جەكە كاسىپكەرلەر ءۇشىن سالىقتىق ەسەپتىلىك بويىنشا, ەگەر دە اتالعان ەسەپتىلىك مەملەكەت بيۋدجەتىنە تىكەلەي زالال كەلتىرمەسە, ايىپپۇلدى جويۋ سياقتى سايلاۋالدى ۇستانىمدارىن كەزدەسۋگە جيىلعان كوپشىلىككە جەتكىزدى. سونىمەن قاتار, جۇمىسپەن قامتۋ جۇيەسىن دامىتۋ جانە جۇمىسسىزدىقتى ازايتۋ تۋرالى تولىققاندى مالىمەت بەرگەن بولاتىن. ال وسى اپتانىڭ باسىندا «اق جولدىڭ» تۋىن جەلبىرەتكەن 30 شاقتى اۆتوكولىك تىزبەگى پارتيانىڭ ورتالىق كەڭسەسىنەن شىعىپ, ەلوردا كوشەلەرىندە شەرۋ جاسادى. اتالعان شەرۋ پارتيانىڭ سايلاۋالدى شتابىنىڭ ۇگىت-ناسيحات شارالارى بارىسىندا بولىپ ءوتتى. وعان پارلامەنت ءماجىلىسى دەپۋتاتتىعىنان ۇمىتكەرلەر قازىبەك يسا, سەرىكباي تاشەنوۆ, بەرىك دۇيسەمبينوۆ, ماقسات رامانقۇلوۆ, اسقار سماعۇلوۆ, مەرۋەرت قازبەكوۆا, ابدىرازاق سۇلتانوۆ جانە «اق جول» قدپ استانا قالالىق فيليالىنىڭ بەلسەندىلەرى مەن پارتيا توراعاسى قاتىستى. «مۇنداي اۆتوشەرۋدى ءبىز وتكەن سايلاۋ ناۋقانىندا دا ۇيىمداستىرعان ەدىك. بۇل ۇدەرىس بۇگىندە داستۇرگە اينالىپ كەلەدى. ءبىز حالقىمىزدىڭ كەلەشەگى جارقىن بولعانىن قالايمىز. سوندىقتان دا «اق جولمەن» جولىمىز ءبىر» دەپ اتالاتىن اۆتوشەرۋىمىزدى قازاقستاندىقتارعا ارنالعان يگى تىلەكپەن باستاپ وتىرمىز», – دەدى پارتيا توراعاسى ازات پەرۋاشەۆ. سونىمەن قاتار, پارتيا توراعاسى ايەلدەردى كوكتەم مەرەكەسىمەن قۇتتىقتاپ, جۇزدەگەن قازاقستاندىق نازىكجاندىلارعا مۋزىكالىق بەينەروليك جولدادى. وندا ن.الىمقۇلوۆتىڭ ولەڭىنە جازىلعان م.ساعاتوۆتىڭ «الماتىم مەنىڭ» ءانىن ازات پەرۋاشەۆ پەن جەڭىس سەيدوللا ۇلى ورىندايدى. «اق جول» پارتياسىنىڭ ورتالىق كەڭسەسىنىڭ سايلاۋالدى شتابىندا بەينەروليكتىڭ تۇساۋكەسەر ءراسىمى ءوتىپ, اقجولدىقتار ايەلدەر قاۋىمىنا مول باقىت, زور دەنساۋلىق تىلەدى. ەلميرا ماتىباەۆا, «ەگەمەن قازاقستان». استانا.