كوممۋنيستەر قاتارى تولىقتى

قازاقستان كوممۋنيستىك حالىق پارتياسىنىڭ (قكحپ) سايلاۋالدى ۇگىت-ناسيحات شتابىنىڭ بەلسەندىلەرى حالىقارالىق ايەلدەر كۇنى مەرەكەسى كۇندەرى دە تىنىمسىز جۇمىس ىستەدى. سونىڭ ىشىندە جاستار قاناتىنىڭ بەلسەندىلەرى ارداگەر انالاردى اشىق اسپان استىندا قۇتتىقتاپ, ولارعا قۋانىش سىيلادى. بۇل قۇتتىقتاۋ الماتىنىڭ «سارى­ارقا» كينوتەاترى ماڭىنداعى ساياباقتا بولدى. جاستار وسى جەرگە شاقىرىلعان ارداگەر انالارعا ءوز ونەرلەرىن كورسەتتى, ءان ايتىپ, بي بيلەدى جانە شاحماتتان جارىس ۇيىمداستىردى. شاعىن كونتسەرتتە ارداگەرلەرگە تانىمال اندەر شىرقالىپ, ولاردىڭ جاستىق شاقتارىن ەسكە ءتۇسىردى. قۇرمەتتى قوناقتاردى قكحپ رەس­پۋب­ليكالىق سايلاۋالدى شتابىنىڭ مۇشە­لەرى گالينا بايماحانوۆا مەن ماگەررام ماگەرراموۆ تا قۇتتىقتادى. پارتيانىڭ الماتى قالالىق كوميتەتىنىڭ جەتەكشىسى ماگەررام ماگەرراموۆ ارداگەرلەردىڭ ارقاسىندا جەر بەتىندە بەيبىتشىلىك پەن تىنىشتىق ورناپ وتىرعانىن ايتتى. سوندىقتان جاستار ارداگەرلەردىڭ سوعىس تىلىنداعى جانە ودان كەيىنگى ەڭبەكتەگى ەرلىكتەرىنە ءتانتى ەكەنىن اتاپ كورسەتىپ, ولارعا دەنساۋلىق, مەيىرىم جانە تۋعان-تۋىسقاندارىنىڭ ماحابباتىن تىلەدى. «قۇرمەتتى ارداگەرلەر, سىزدەردى كوك­تەمنىڭ شۋاقتى مەرەكەسىمەن قۇتتىق­تاي وتىرىپ, وزدەرىڭىزگە ۇلى وتان سوعىسى كەزىندەگى ەرلىك­تەرىڭىز بەن ەرەن ەڭبەكتەرىڭىز ءۇشىن ريزا­شى­لى­ع­ى­مىز­دى بىلدىرەمىز. سىزدەردىڭ قاھار­مان­دىق­تارىڭىز­دىڭ ارقاسىندا ءبىز قازىرگى بەي­بىت­شىلىك پەن تىنىشتىقتا ءومىر ءسۇرىپ جاتىرمىز», – دەدى ول. دەپۋتاتتىقتان ۇمىتكەر گالينا باي­ماحانوۆا پارتيالاس ارىپتەسىنىڭ ءسوزىن قوستاي كەلىپ, ارداگەرلەردىڭ الەۋ­مەتتىك ماسەلەلەرىن شەشۋگە باسىم­دىق بەرىلەتىنىن باياندادى. «سىزدەر­دىڭ كوممۋنيستىك يدەيانىڭ جالعاستى­رۋشىلارى رەتىندە بىزگە دەگەن كوڭىل­دەر­ىڭىز­دى جوعارى باعالايمىز. سىزدەر ءبىز ءۇشىن قاھارماندار جانە وتان قورعاۋ­شى­لار عانا ەمەس, بۇگىنگى تاڭدا ءبىز ناسيحات­تاپ جۇرگەن قۇندىلىقتار مەن كوممۋ­نيستىك پارتيا قۇرعان سوتسياليستىك ءداۋىردىڭ ءتىرى كۋاگەرىسىزدەر. سىزدەرگە ءوز­دەرىڭىزدى تولعاندىراتىن ماسەلەلەردى شە­شۋگە ىجداعاتتىلىق تانىتۋعا جانە جاق­سى ءومىر سۇرۋگە جايلى جاعداي جاساۋعا ۋادە بەرەمىز», – دەدى گالينا بايماحانوۆا. ال مەرەكە كۇنىنىڭ قارساڭىندا استانا قالاسىندا جاڭا جاستار توبى قكحپ قاتارىنا قابىلداندى. ولارعا پار­تيالىق بيلەتتەر سالتاناتتى جاع­دايدا رەسپۋبليكالىق سايلاۋالدى شتابىنىڭ ۇيىندە تاپسىرىلدى. شتاب جەتەكشىسى, V سايلانعان ءماجىلىس دەپۋتاتى ايقىن قوڭىروۆ بۇگىنگى سالتانات جاس كوممۋنيستەردىڭ ەسىندە ماڭگى قالاتىنىنا ءۇمىت بىلدىرەتىنىن ايتتى. بۇگىن جاستار ادامزات ءۇشىن ەڭ وزىق گۋمانيتارلىق يدەيالاردى تاراتۋشى جانە ونى ىسكە اسىرۋعا تىرىسۋشى پارتيانىڭ قاتارىنا ءوتىپ وتىر. سوندىقتان بۇل كۇن ولاردىڭ ەسىندە ماڭگىلىك قالۋعا ءتيىس, دەدى ول. جاقسىباي سامرات, «ەگەمەن قازاقستان».