ساپالىق قۇرامى قانداي؟

ورتالىق سايلاۋ كوميسسياسى قازاقستان حالقى اسسامبلەياسى كەڭەسى ۇسىنعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا تىركەلگەن كانديداتتاردىڭ ساپالىق قۇرامى جونىندە اقپاراتتاندىردى. ورتالىق سايلاۋ كوميسسياسىنىڭ حاتشىسى باقىت مەلدەشوۆتىڭ ءمالىم ەتۋىنشە, كانديداتتاردىڭ ساپالىق قۇرامى مىناداي بولىپ كەلەدى: كانديداتتاردىڭ 7-ەۋى ەر ادام نەمەسە 77,8 پايىز, ايەلدەر – 2 نەمەسە 22,2 پايىز. بارلىق 9 كانديداتتىڭ دا ءبىلىمى جوعارى. كانديداتتار اراسىندا ءۇش ديپلومدى ينجەنەر, 1 دارىگەر, 1 زاڭگەر, 1 وقىتۋشى, تاعى ۇشەۋى – باسقا ماماندىق يەلەرى. «قازاقستان حالقى اسسامبلەياسىنان پارلامەنت ءماجىلىسىنىڭ دەپۋتاتتىعىنا تىركەلگەن كانديداتتاردىڭ تورتەۋى عىلىم, مادەنيەت جانە ءبىلىم قىزمەتكەرلەرى بولسا, ۇشەۋى V شاقىرىلعان پارلامەنت ءماجىلىسىنىڭ دەپۋتاتتارى. ءبىر قىزمەتكەر مەملەكەتتىك ەمەس مەنشىك نىسانىنداعى ۇيىمنىڭ قىزمەتكەرى جانە بىرەۋى ورتالىق مەملەكەتتىك ورگاندا جۇمىس ىستەيدى», – دەدى ول وسى جونىندە. وسك حاتشىسىنىڭ اتاپ وتۋىنشە, قازاقستان حالقى اسسامبلەياسىنان پارلامەنت ءماجىلىسىنىڭ دەپۋتاتتىعىنا كانديداتتاردىڭ ورتاشا جاسى 57,5 جاستى قۇرايدى. ايتا كەتەيىك, 2016 جىلعى 21 ناۋرىزدا قازاقستان حالقى اسسامبلەياسىنىڭ سەسسياسىندا 9 ءماجىلىس دەپۋتاتىن سايلاۋ وتەدى.