ماقساتىمىز – سايلاۋدى ءادىل وتكىزۋ

سايلاۋدى بايقاۋ جونىندەگى رەس­پۋبليكالىق قوعامدىق كوميسسيانىڭ مۇشەسى كامال بۇرحانوۆتىڭ پىكىرىنىڭ توقەتەرى وسى. وڭتۇستىك قازاقستان وبلىسىنا جۇمىس ساپارىمەن كەلگەن كامال نيزام ۇلى مەملەكەتتىك ەمەس كوميسسيانىڭ ەشقانداي پارتياعا, ۇمىتكەرگە جاق تارتپايتىندىعىن, سايلاۋدىڭ ءادىل ءوتۋى ءۇشىن بارىنشا باقىلاۋ بولاتىندىعىن ايتتى. وبلىستىق سايلاۋ كوميسسياسى توراعاسىمەن ارنايى كەزدەسىپ, جاعدايمەن تانىسقانىن, بايقاۋشىلارمەن سەمينار-كەڭەس وتكىزگەندىگىن تىلگە تيەك ەتكەن ول ءتۇس اۋا قازىعۇرت اۋدانىنا جولعا شىعىپ, جەرگىلىكتى جەردەگى سەمينار جۇمىسىنا قاتىساتىنىن ايتتى. وبلىستىق سايلاۋدى بايقاۋ ءجونىن­دەگى كوميسسيانىڭ توراعاسى دوسىباي شەرىمقۇلوۆ 1047 سايلاۋ ۋچاسكەسىنىڭ 45-ىندە سايلاۋعا داۋىس بەرۋ جابىق جاعدايدا وتەتىندىكتەن, بايقاۋشىلاردىڭ قاتىسا المايتىندىعىن ايتتى. بۇلار اسكەري بولىمدەر, اۋرۋحانا, جازاسىن وتەپ جاتقان ازاماتتارعا ارنالعان سايلاۋ ۋچاسكەلەرى ەكەن. كوميسسيا بۇعان دەيىن 4 اۋداندا سەمينار-كەڭەس وتكىزگەن. «بايقاۋشىنىڭ مىندەتتەرى مەن قۇقىعى» مەتوديكالىق كىتاپشاسىنىڭ 1932 داناسى شىعارىلىپ, بايقاۋشىلارعا تاراتىلىپ بەرىلىپتى. بريفينگكە ارنايى قاتىسقان وبلىستىق سايلاۋ كوميسسياسىنىڭ مۇشەسى التىنبەك كاتتەبەكوۆ بۇگىنگە دەيىن تىركەلگەن ۇمىتكەرلەردىڭ 70-ءى دودادان شىعىپ قالعانىن ايتتى. ونىڭ 11-ءى وبلىستىق ءماسليحاتتان, 11-ءى قالالىق ءماسليحاتتان, قالعان 48-ءى اۋداندىق ءماسليحات دەپۋ­تات­تىعىنان ۇمىتكەرلەر ەكەن. ونىڭ ىشىندە ءوز وتىنىشىمەن كانديداتۋراسىن العان­داردان بولەك, تابىس سالىعىن دۇرىس كورسەتپەگەندەر دە بار ەكەن. ال ماقتاارالدا ۇمىتكەر سايلاۋ باس­تالماي جاتىپ, اقساقالدارعا شاي بەرىپ, شاپان جاپتى دەپ ارىزدانعان ازاماتشانىڭ شاعىمىن قاراعان كوميسسيا زاڭعا قايشى ولقىلىق تاپپاعان. سايلاۋالدى ناۋقانىن ەرتە باستاپ جىبەرگەن تاعى ءبىر ۇمىتكەردىڭ ءىسى سوتتا قارالىپ جاتىر. جيىندى قورىتقان دوسىباي ايتباي ۇلى سايلاۋدى بايقاۋشىلاردىڭ بارلىعى دەرلىك سەمينار-كەڭەستەن ءوتىپ جاتقاندىعىن تاعى دا ەسكە سالدى  باقتيار تايجان, «ەگەمەن قازاقستان». شىمكەنت.