تاجىريبە الماسادى

سايلاۋدى بايقاۋ جونىندەگى رەس­پۋبليكالىق قوعامدىق كوميس­سيانىڭ شتابىندا وسى كوميسسيا مۇشەلەرىنىڭ تمد بايقاۋشىلار ميسسياسى شتابى وكىلدەرى ەۆگەني سلوبودامەن جانە ەۆگەني كوزياكوۆپەن كەزدەسۋى ءوتتى. كەزدەسۋ بارىسىندا سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ توراعاسى نۇرلان ەرىمبەتوۆ شەتەلدىك ارىپتەستەرگە اتالعان كوميسسيانىڭ قىزمەتى, بايقاۋشىلاردى وقىتۋ بويىنشا قولعا الىنعان جۇمىستار, ساياسي ناۋقاندى ساراپتاۋدىڭ اعىمداعى ناتيجەلەرى جايلى باياندادى. نۇرلان ەرىمبەتوۆ كوميسسيا قىزمەتى بارىسىندا ورتالىق سايلاۋ كوميسسياسى, بايقاۋشىلاردىڭ حالىقارالىق ميسسيالارمەن, پارتيالاردىڭ سايلاۋالدى شتابتارىمەن, باق-پەن بەلسەندى تۇردە ءىس-ارەكەت ەتەتىنىنە توقتالدى. «بۇگىنگى كەزدەسۋگە تمد ەلدەرىنىڭ بايقاۋشىلارى, ياعني تاجىريبەلى ازاماتتار كەلىپ وتىر. ولار سايلاۋالدى ماسەلەلەرگە قاتىستى ساراپتاما جۇرگىزەدى. سەبەبى, ولار – سىرتكوز. بىزگە ولاردىڭ, ولارعا ءبىزدىڭ تاجىريبەمىز كەرەك. ولار سايلاۋعا زاڭناماسىنا قاتىستى ساۋالدار قويىپ جاتىر. وسى ماسەلە توڭىرەگىندە زەرتتەۋ جۇرگىزىپ, حالقىمىزدىڭ جاعدايىمەن تانىسىپ كەتەدى», – دەدى ن. ەرىمبەتوۆ. ونىڭ ايتۋىنشا, بۇگىندە بايقاۋشىلاردى دايىنداۋ ۇدەرىستەرى باستالىپ كەتكەن. «ەلىمىزدە 10 مىڭنان استام بايقاۋشى بولادى. ولار بارلىق ەلدى مەكەندەردەگى سايلاۋ ۋچاسكەلەرىندە جۇمىس ىستەيدى. بارلىق جۇمىس زاڭعا سايكەس بولۋى كەرەك», – دەدى كوميسسيا توراعاسى. ءوز كەزەگىندە تمد بايقاۋشىلار ميسسياسى شتابىنىڭ جەتەكشىسى ەۆگەني سلوبودا سايلاۋدى بايقاۋ جونىندەگى رەسپۋبليكالىق كوميسسيامەن ءوزارا ارەكەت ەتۋگە, اقپاراتپەن جانە تاجىريبەمەن الماسۋعا ازىرلىگىن ءبىلدىرىپ, سايلاۋ ناۋقانىنىڭ قارقىندىلىعىن ەرەكشە اتاپ ءوتتى. ول سونداي-اق, قازاقستانداعى اشىق سايلاۋ ۇدەرىسىنە بايقاۋشىلاردىڭ, ونىڭ ىشىندە حالىقارالىق بايقاۋشىلاردىڭ قىزمەتى سەپتىگىن تيگىزەتىنىنە سەنىمدى ەكەنىن جەتكىزدى. ءلايلا ەدىلقىزى, «ەگەمەن قازاقستان».