انالارعا ارنالعان توسبەلگى

بيىل بارقىتبەل باۋىرىندا انا­لارعا ايرىقشا قۇرمەت كورسەتىلىپ, «تارباعاتايدىڭ التىن اناسى» توسبەلگىسى تاپ­سىرىلدى. شى­عىستىڭ شەكا­رالىق شالعاي وڭىرىندە ەلگە ەڭبەگى سىڭگەن, تاربيەلى ۇل مەن ونەگەلى قىز وسىرگەن انالار قاۋىمىنا ارنالعان ايرىقشا توسبەلگىنى اۋدان اكىمى دىلدابەك ورازباەۆ تابىس ەتتى. باتىر انالاردىڭ بالالارى «تۋعان جەرگە – تاعزىم!» اكتسياسى بويىنشا وزدەرى وسكەن ءوڭىردىڭ وركەندەۋىنە ۇلەس قوسىپ كەلەدى. ەرەكشە ماراپاتتى وسى ءوڭىردىڭ ىستىعىنا كۇيىپ, سۋىعىنا توڭىپ, شىڭدالىپ وسكەن ازاماتتاردى تاربيەلەگەن انالارعا دەگەن قۇرمەت رەتىندە قابىلداسا بولادى. انانىڭ ايالى الاقانىمەن العاداي ازاماتقا اينالعان ولار تۋعان جەرلەرىن ۇمىتپاي, ءبىرى اۋىل كوشەلەرىن اسفالتتاسا, تاعى ءبىرى جارىقتاندىرۋ جۇمىستارىن جۇرگىزىپ, باسقا دا الەۋمەتتىك ماسەلەلەردىڭ شەشىمىن تابۋعا كومەك قولدارىن سوزىپ ءجۇر. وسىنىڭ ارقاسىندا اۋداندىق بيۋدجەتتەن 22 ميلليون تەڭگە ۇنەمدەلدى. – الىپ تا, اقىن دا, عالىم دا انادان تۋادى. ءبىز اۋدانىمىزداعى انالار مەن اجەلەرىمىزگە قۇرمەت كورسەتۋ ماقساتىندا اتالعان توسبەل­گىنى ۇسىنىپ وتىرمىز, – دەدى اۋدان اكىمى دىلدابەك ورازباەۆ. جانتىكەي اۋىلىنىڭ تۇرعىنى تىنىشتىق ايتجانوۆا 33 جىل بويى فيزيكا پانىنەن ساباق بەردى. قازىر 8 بالا ءوسىرىپ, 14 نەمەرە ءسۇيىپ وتىر. – بالالاردىڭ بوس ۋاقىتىن ءتيىمدى پايدالانۋعا, كوڭىلى سۇيگەن ىسىمەن اينالىسۋىنا مۇمكىندىك بەردىك, – دەيدى «التىن القا» يەگەرى. بۇل اۋلەتتىڭ بالالارى 1,5 ميلليون تەڭگەگە مەكتەپتىڭ ءبىر سىنىبىن جوندەۋدەن وتكىزىپ, جاڭا قۇرال-جابدىقتار الىپ بەرگەن ەكەن. دۋمان اناش, «ەگەمەن قازاقستان». شىعىس قازاقستان وبلىسى, تارباعاتاي اۋدانى.