قۇس بوپ ۇشۋ قولدان كەلمەيتىن تىرلىك ەكەنىن اڭعارعانىڭدا ۇشقىش بولۋدى ارماندايسىڭ. ادامنىڭ اسپانعا وسىنشاما قۇشتار, ىڭكار بولاتىن سەبەبى نەدە ەكەن؟ ايتەۋىر جاس كۇنىندە اسپانعا اۋەس بولمايتىن بالا جوق. ەسەيە كەلە, ەسىڭ كىرە مۇنىڭ ءبارى جونىنە قالىپ, تىرشىلىكتىڭ قامىتىن مويىنعا مىقتاپ سالىپ, تاعدىر ايداعان سوقپاقپەن جەلىپ كەتە بەرەتىنىڭ تاعى بار.
دەگەنمەن و باستاعى ارمانىن اداسپاي تاپقان ادامدار دا جەتكىلىكتى ارامىزدا. بالا كۇنىنەن عارىشقا ساپار شەگۋدى الدىنا مۇرات ەتىپ قويعان ايدىن ايىمبەتوۆتىڭ ءوزى ءسوزىمىزدىڭ دالەلى. جىگىتتەن ۇشقىش نە عارىشكەر شىعار-اۋ. ال ءتاي-ءتاي باسقان شاعىنان تاۋداي ارمانعا قۇلاش سەرمەگەن قىزدار قاۋىمى قايتپەك؟ ارينە, ايەل زاتىنىڭ اراسىنان عارىشتى باعىندىرعاندار از ەمەس. قازىردىڭ وزىندە قازاقتىڭ قاراكوز توتى ءامىروۆا ۇشاقتى ۇرشىقشا ءيىرىپ ءجۇر. بىراق بۇل بارشا قىزدىڭ قولىنان كەلە بەرمەسى انىق. ايتكەنمەن قىزداردىڭ دا بالا قيالىنىڭ ورىندالۋى مۇمكىن. ول – ستيۋاردەسسا بولۋ.
ستيۋاردەسسا دەگەنىڭىزدىڭ ءوزى ەكىنىڭ بىرىنە, ەگىزدىڭ سىڭارىنا بۇيىرمايتىن ماماندىق دەپ بىلگەن ەك. ءالى كۇنگە دەيىن سونداي ويدا بولار ما ەدىك, كىم ءبىلسىن؟ دەيتۇرعانمەن, قىزىلوردا وبلىسى, شيەلى اۋدانى, ەڭبەكشى اۋىلىندا دۇنيەگە كەلگەن اقبىلەك ءجۇسىپوۆا وسى ماماندىقتى يگەرگەندە ويىمىزدىڭ قاتە ەكەنىن تۇسىنگەندەيمىز. اقبىلەك – تاۋەلسىزدىكتىڭ ءتول قۇرداسى. بۇل ۇرپاق ازاتتىقتىڭ اق تاڭىمەن قاتار ومىرگە كەلىپ, ەگەمەن ەلدە تاربيەلەنۋىنىڭ ءوزى ۇلكەن تاريحي وقيعا دەپ ۇعامىز. ستيۋاردەسسا قىز اۋىل مەكتەبىندە ءبىلىم الدى. سونان سوڭ ارمانىن ۇكىلەپ الماتى باردى. وندا شەت تىلدەر جانە ىسكەرلىك كارەرا ۋنيۆەرسيتەتىنە ءتۇستى. وقۋىن وتە جاقسى وقىپ, تۋريزم ماماندىعى بويىنشا قىزىل ديپلوم يەگەرى اتاندى. ءبىلىمدى جاسقا ارقاشان جول اشىق بولسا كەرەك. وقۋىن اياقتاعان سوڭ بىرنەشە مەكەمەدەن ۇسىنىس تۇسكەن. بىراق ول جۇمىستاردىڭ ەشقايسىسى اقبىلەكتىڭ كوڭىلىندەگىدەي بولمادى. زامان دامىپ, جاڭا تەحنولوگيالار ومىرىمىزگە دەندەپ ەنگەن كەزەڭ عوي. ينتەرنەتتەن ءوزى ارمانداعان ءىستى ىزدەپ جۇرەتىن. كۇندەردىڭ ءبىر كۇنىندە «Air Astana» كومپانياسى ستيۋاردەسسا جيناپ جاتقانى تۋرالى اقپاراتقا جولىقتى. «ىزدەگەنگە – سۇراعان» دەگەن وسى ەمەس پە؟!
ستيۋاردەسسا بولۋ وڭاي ەمەس ەكەن. ول ءۇشىن بىرنەشە ساتىدان تۇراتىن سىناقتان وتۋگە ءتيىس بولدى. ەڭ الدىمەن ءتىل ءبىلۋى قاجەت. قازاقشا مەن ورىسشانى بىلاي قويعاندا, اعىلشىن مەن تۇرىك ءتىلىن ەركىن بىلەتىن بويجەتكەنگە بۇل سىناق قيىن بولعان جوق. دەنساۋلىق جاعدايى تۇپكىلىكتى تەكسەرىلدى. كىنارات تابىلمادى. ونان سوڭ ءتۇرى مەن سىمباتى, بويى مەن ويى سايكەس كەلۋى كەرەك ەكەن. بۇل جەردە دە اسا قيىندىق تۋىندامادى. ال ودان كەيىنگى بورت سەرىككە باۋليتىن مەكتەپتى ۇزدىكتەردىڭ قاتارىندا ءبىتىردى. ۇشاقتاعى ءاربىر ءسات پەن ىقتيمال قيىندىقتاردىڭ ءبارىن مەڭگەردى. سولايشا, قازاقستانداعى سىناقتاردان سۇرىنبەي ءوتتى. ەندى ماماندىقتى تولىققاندى يگەرۋ ءۇشىن شەتەلگە بارىپ تاجىريبەدەن ءوتۋى كەرەك. ول ءۇشىن گەرمانياعا جىبەرىلدى. ون كۇن بويىنا قازاقستاندا يگەرگەن ءبىلىمى سىنالدى. اقىرىندا, بارلىعىنان كەدەرگىسىز ءوتىپ, ستيۋرادەسسا ماماندىعىن الىپ شىقتى.
مىنە, سودان بەرى «Air Astana» كومپانياسىندا قىزمەت ەتىپ كەلەدى. العاشىندا جالپى سالوندا, اۋە كومپانياسىنىڭ تىلىندە ايتقاندا «ەكونومكلاسستا» جۇمىس ىستەدى. ءاربىر جولاۋشىنىڭ ىڭعايىنا قاراپ, جاعدايىن جاسادى. كوپشىلىككە قىزمەت ەتۋ وڭاي ەمەس. ادام دەگەنىڭىز ءارتۇرلى بولادى. ولاردىڭ بارلىعىنا شىداپ, قاباق شىتپاي قىزمەت ەتۋ دە جەڭىل جۇمىستىڭ قاتارىنان ەمەس. دەگەنمەن, جۇمىسىنىڭ قىزىعى كۇن ساناپ وزىنە باۋراپ, تاجىريبەسى جەتىلە بەردى. ارادا بىرنەشە جىل وتكەندە اقبىلەك ءجۇسىپوۆانى بيزنەس كلاسس جولاۋشىلارىنا قىزمەت كورسەتەتىن جۇمىسقا اۋىستىردى. بۇل ونىڭ بىلىكتىلىگىن دالەلدەسە كەرەك.
اقبىلەك بۇگىندە الەمنىڭ تۇكپىر-تۇكپىرىن ەركىن شارلاپ ءجۇر. ىستامبۇلعا ەكى كۇننىڭ بىرىندە بارادى دەسەك, ارتىق ايتقاندىق ەمەس شىعار. تمد مەملەكەتتەرىنىڭ بارىندە بولدى. ەۋروپا ەلدەرىن تولىق كوردى, تانىدى. الىستاعى اۋىلدان شىعىپ, ارمانىنا اداسپاي جەتكەن بويجەتكەننىڭ بولاشاعىنا ءبىز دە ساتتىلىك تىلەيمىز.
ەلجاس ءابدىلدا, جۋرناليست. قىزىلوردا وبلىسى.
