ءتاڭىرى قالاعان دارىگەر

بىردە الماتى قالاسى دەن­ساۋلىق ساقتاۋ باسقارماسى جۋرناليستەر كۇنىنە وراي كۇنگەي­دەگى باس شاھارداعى بارلىق بۇقارالىق اقپارات قۇرالدارى قىزمەتكەرلەرىن مەديتسينالىق تەكسەرۋدەن وتكىزۋ ءۇشىن ارنايى اكتسيا ۇيىمداستىرعان-دى. ءوز دەنساۋلىقتارىنا كوڭىل بولۋگە ۋاقىتتارى بولا بەرمەيتىن قالام­گەرلەر جاناشىرلىق كورسەتىپ جاتقان سوڭ, تايلى-تاياعىمىز قالماي المالى اۋدانىنا قاراستى 53 مىڭ حالىققا مەديتسينالىق قىزمەت كورسەتىپ وتىرعان №5 ەمحاناعا وسىلاي جولىمىز ءتۇستى. بىزدەردى كۇندەلىكتى ەمحاناعا كەلەتىن قالا تۇرعىندارىنان بولە-جارماي, ءبارىمىز ءبىر دالىزدە ءجۇرمىز. ەشقانداي ىڭ-شىڭ جوق, ەمحانا ءىشى مۇنتازداي تازا, اركىم ءوز ىسىمەن اينالىسۋدا. سودان مەكەمە باسشىسى, دەنساۋلىق ساقتاۋ ءىسىنىڭ ۇزدىگى, جوعارى ساناتتاعى دارىگەر گۇلشاحيرا اجىمۇحانقىزى قامباروۆامەن سويلەسۋدىڭ ءساتى ءتۇستى. سابىرلى, داۋىسى بيازى, جۇزىنەن يماندىلىق پەن بەكزات بولمىس بايقالادى. وسى قاسيەتىنە اققۇبا, كوركەم كەلبەتى قوسىلىپ ادامدى وزىنە ەرىكسىز تارتا ءتۇستى. مەنىڭشە, مەكەمە باسشىسىنىڭ مىنەزىندەگى وسىنداي قاسيەتتەر ۇجىم مۇشەلەرىندە دە سەزىلەتىندەي. ويتكەنى, باسشى قول استىنداعى قىزمەتكەرلەرىمەن اقىرىپ ەمەس, اقىرىن ايتىپ, ءتىل تابىسسا – ولار دا سول جاعدايعا قالىپتاسادى عوي. ال مۇنداي قارىم-قاتىناس وسى تاقىلەتتەس ەمدەۋ ورىندارىنىڭ بارىندە بىردەي كەزدەسە بەرمەيدى. ياعني, ماماندىقپەن بىرگە كىسىلىكتى دە الىپ ءجۇرۋ اركىمنىڭ قولىنان كەلمەيدى. دارىگەر ادام الدىمەن سوزىمەن ەمدەپ, الدىنا كەلگەن ناۋقاس ۇلكەن ءبىر ۇمىتپەن ەمدەلەتىنىنە سەنىپ كەتۋى كەرەك. – 2010 جىلى دەنساۋلىق ساقتاۋ سالاسىندا ەنگىزىلگەن بىرىڭعاي ۇلتتىق دەنساۋلىق ساقتاۋ جۇيەسىنىڭ ورىندالۋى جامان ەمەس, – دەپ ءسوزىن جالعادى باس دارىگەر. – ويتكەنى, ناتيجە جاقسى. ءوزىڭىز بىلەسىز, ول جۇيەدە ءاربىر قازاقستاندىققا تۇرعان جەرىندە – تاۋەلسىز ەمدەۋ ورنىن جانە ەمدەۋشى دارىگەردى تاڭداۋ قۇقىعى بەرىلگەن. ياعني, ەمدەلۋشىگە جوعارى ساپالى دارىگەرلىك كومەك, ەم الۋىنا مۇمكىندىك تۋدى. ماسەلەن, 2015 جىلدىڭ 15 قىركۇيەگى مەن 15 قاراشا ارالىعىندا تىركەۋ كومپانياسىنا ەمحاناعا قوسىمشا 6 مىڭنان اسا ادام كەلىپ تىركەلدى. بۇل نەنى كورسەتەدى؟ ياعني, حالىق ءبىزدىڭ مامانداردىڭ جوعارى كاسىبيلىگىن باعالايدى دەگەن ءسوز. اتالمىش ەمدەۋ ورنىنىڭ ءبىر ەرەكشەلىگى, مۇندا ەمحانا جانىنان قالالىق گەپاتولوگيالىق ورتالىقتىڭ اشىلۋى. ونى مەدي­تسينالىق مۇمكىندىگى جاعىنان بىرەگەي ورتالىق دەسەك تە بولادى. بۇعان دەيىن ناۋقاس ادامدى قالانىڭ ءار بولىگىنە جىبەرىپ, اۋرە-سارساڭعا سالسا, قازىر مۇندا بارلىق دياگنوستيكالىق زەرتتەۋلەر ءبىر جەردە وتەدى. ەڭ باس­تىسى, باۋىرداعى كىناراتتى انىق­تاۋعا اسا قاجەت زاماناۋي فيبراسكان اپپاراتى قالا بويىنشا تەك وسى ورتالىقتا. فيبراسكان – باۋىردىڭ قابىنۋىنىڭ قا­لىڭدىعىن انىقتايدى. وعان جوعارى ساناتتاعى دارىگەر روزا ءجۇسىپوۆا جەتەكشىلىك ەتەدى. گۇلشاحيرا اجىمۇحانقىزى بۇگىندە ەمحاناداعى 280 قىزمەت­كەردىڭ 77-ءسى دارىگەر, ولاردىڭ 28-ءى ۋچاسكەلىك دارىگەر, 126 مەدبيكەنىڭ 58-ءى ۋچاسكەلىك مەدبيكە, 5 پسيحولوگ, 5 الەۋمەتتىك قىزمەتكەر جۇمىس ىستەيتىنىن, 2010 جىلدان رەسپۋبليكالىق بيۋدجەتتەن ۋچاسكەلىك ماماندارعا قوسىمشا جالاقى تاعايىندالعانىن دا تىلگە تيەك ەتە كەتتى. «ماسەلەن, ۋچاسكەلىك دارىگەر 70-200 مىڭ تەڭگە, مەدبيكەلەر 30-150 مىڭ تەڭگە ارالىعىندا ىنتالاندىرۋشى ۇستەماقى الادى. ال ەمحانا شارۋاشىلىق جۇرگىزۋ قۇقىعىنا كوشكەلى بەرى, جۇمىستارىن جاقسى كورسەتكەن, ەمحانانىڭ كورسەتكىشتەرىن كوتەرگەن, جاڭا يننوۆاتسيا ەنگىزگەن قىزمەتكەرگە اقىلى قىزمەتتەن تاباتىن تابىسىمىزدان قوسىمشا ۇستەمە اقى بەرەمىز, – دەدى ەمحانا باسشىسى. ومىرلىك تاجىريبە كورسەتىپ وتىرعانداي, كەز كەلگەن باسشى ادامدا قاراماعىنداعى قىزمەتكەرلەردى ءتۇسىنىپ, جاقسى­لىق جاساۋدا بولسىن, ءىستى ۇيىمداستىرۋدا بولسىن – مۇمكىندىك زور. گۇلشاحيرا اجىمۇحانقىزى سول مۇمكىندىكتى قاي جاعىنان بولسا دا ءتيىمدى, ءادىل پايدالانۋعا تىرىسادى. سول قاسيەتى بىزگە ۇنادى, ال مەديتسيناداعى «ءتاڭىرى قالاعان دارىگەر» دەگەن ۇعىمعا سالساق, ءوزى قالاعان ماماندىعىنا سۇيىسپەنشىلىكپەن, قۇرمەتپەن قارايتىن ءبىزدىڭ كەيىپكەرىمىز سول – «ءتاڭىرى قالاعان دارىگەر» ساناتىنان دەپ بىلەمىز. گۇلزەينەپ سادىرقىزى, «ەگەمەن قازاقستان».