ەرلىك داڭقى وشپەيدى

ۇلى وتان سوعىسىن جىلدار الىستاتقانمەن, وندا جاسالعان ەرلىكتەر ۇمىتىلماق ەمەس. اتالارى مەن اجەلەرى سوعىس قىرعىنىن كورگەن نەمەسە مايدان دالاسىندا قالعان بۇگىنگى ۇرپاق ولاردىڭ ەرلىگىن ماقتان ەتەتىنى قۋانتادى. بەلگىلى جۋرناليست, جازۋشى ءسالىم مەڭدىباەۆ قىزمەت ىستەيتىن «قوستاناي تاڭى» گازەتىنە جەڭىستىڭ 70 جىلدىعىن مەرەكەلەگەن وتكەن جىلى وبلىس وڭىرىنەن ەكى جۇزدەن اسا حات ءتۇستى. ولاردىڭ بارلىعىندا سوعىس ارداگەرلەرىنىڭ نەمەرەلەرى, شوبەرەلەرى, ءتىپتى, شوپشەكتەرى اتاسى مەن اجەسىنىڭ ۇلى وتان سوعىسى جىلدارىنداعى ەرلىگىن, تىلدا ىستەگەن ەڭبەگىن ماقتان ەتەتىنىن جازعان جانە ونى ءتاپ-ءتاۋىر باياندايدى. اۆتور ءوز قولىنان وتكەن جۇرەك تەبىرەنتەر, پاتريوتيزمگە تولى حاتتاردىڭ گازەت تىكپەسىمەن بىرگە شاڭ باسقان ارحيۆتەرگە جىبەرمەي, وقىرمانعا قايتا ۇسىنۋدى ءجون كورىپتى. – اتالاردىڭ وتان ءۇشىن توگىلگەن قانىن باعالاۋ, ولاردى ۇمىتپاۋ, ماقتان ەتۋ بۇگىنگى ۇرپاقتىڭ جاقسى تاربيەسى دەر ەدىم, تاۋەلسىز ەلىمىزدىڭ شۇعىلالى ەرتەڭىنە دەگەن سەنىم ۇيالاتادى. مەن وسى حاتتاردى, ولارمەن بىرگە جىبەرگەن مايدانداعى كونە سۋرەتتەردى كىتاپقا ەنگىزدىم. بۇلار كەلەر ۇرپاق ءۇشىن دە   قاجەت دۇنيە, – دەيدى كىتاپ اۆتورى ءسالىم اعا. ال كىتاپتىڭ العاشقى تاراۋلارىندا مايدانگەرلەر تۋرالى جازعان اۆتوردىڭ ءوز شىعارمالارى توپتاس­تىرىلىپتى. اسىرەسە, ەكىنشى تاراۋىندا بەس جىلعا تاياۋ سوزىلعان الاپات سوعىستىڭ لەنينگراد قورشاۋى, برەستى الۋ, ستالينگراد مايدانى, بەلورۋسسيانى ازات ەتۋ, بەرلينگە شابۋىل سەكىلدى نەگىزگى كەزەڭدەرىنە شولۋ جاسالادى دا, سول سۇراپىل كۇندەردىڭ كۋاگەرىندەي, قان كەشكەن قوستانايلىق جاۋىنگەر-ارداگەرلەر تۋرالى باياندايدى. مۇنىڭ دا وقىرمانعا تانىمدىق ماڭىزى زور. تۇساۋكەسەردە جازۋشى, وسى كەشتى جۇرگىزگەن عۇمار احمەتچين, وبلىستىق ارداگەرلەر كەڭەسىنىڭ توراعاسى كەنجەبەك ۋكين, كىتاپ­تىڭ شىعۋىنا دەمەۋشىلىك كور­سەتكەن ومىرزاق يحتيلياپوۆ, تاعى باسقالار كىتاپتىڭ جاس ۇرپاقتىڭ پاتريوتتىق تاربيەسىنە بەرەرى كوپ ەكەنىن تىلگە تيەك ەتتى. ءنازيرا جارىمبەتوۆا, «ەگەمەن قازاقستان». قوستاناي.