ايەل كاسىپكەرلەر كوبەيۋدە

قازاقستاندا كاسىپورىن باسشىلارىنىڭ جالپى سانىندا ايەلدەردىڭ ۇلەسى 39 پايىزعا جەتتى. بۇل تۋرالى كەشە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا «اتامەكەن» ۇلتتىق كاسىپكەرلەر پالاتاسى ىسكەر ايەلدەر كەڭەسىنىڭ ءتورايىمى ءلاززات رامازانوۆا ءمالىم ەتتى. «اتامەكەن» ۇلتتىق كاسىپكەرلەر پالاتاسى ىسكەر ايەلدەر كەڭەسى سوڭعى كەزدەرى ايەلدەر اراسىندا كاسىپكەرلىكتى دامىتۋعا بارىنشا ىقپال ەتۋدە. ستاتيستيكاعا سۇيەنسەك, بۇگىندە بىزدە 1 ملن. 656 مىڭعا تارتا كاسىپورىن باسشىلارى بار. ونىڭ ىشىندە 656 216-سى ايەلدەر. استانا مەن الماتى قالالارىندا بۇل كورسەتكىش 50 پايىزدان استى. ياعني, ەلىمىزدە بيزنەسكە نازىك جاندىلار بەلسەندى تارتىلۋدا. ل.رامازانوۆانىڭ ايتۋىنشا, وسى ماقسات ءۇشىن قازاقستاننىڭ كوپتەگەن وڭىرىندە ايەلدەر كاسىپكەرلىگىن دامىتۋعا ارنايى كۋرستار مەن ترەنينگتەر جۇرگىزىلۋدە. «ايەلدەرگە ءوزىنىڭ ءىسىن باستاۋ ءۇشىن ءاردايىم كومەك پەن قولداۋ كەرەك. ولارعا قارجىلىق كومەكتەن بولەك, ىشكى كۇش-جىگەرىن قولداۋ قاجەت. وسى ىشكى جىگەرىنە ارنايى سەمينارلار مەن دارىستەر ەلەۋلى كۇش بەرەدى. بۇل باعىتتا ءبىز اۋدانداردا جانە اۋىلدىق جەرلەردە بەلسەندى جۇمىستار جۇرگىزۋدەمىز», دەدى ل.رامازانوۆا. ل.رامازانوۆانىڭ حابارلاۋىنشا, ايەلدەر كاسىپكەرلىگىن ىنتالاندىرۋعا 1,5 ملرد. تەڭگە ينۆەستيتسيا تارتىلعان. «ەلىمىزدەگى جاعدايعا توقتالاتىن بولساق, شىنىمەن دە ايەلدەر كاسىپ­كەر­لىگىن دامىتۋ ءۇشىن تارتىلىپ جاتقان قارجىلىق اعىمدار بار. بۇل تۇرعىدا ەۋروپالىق, ازيالىق بانكتەر جانە «دا­مۋ» جەلىلەرى قامتىلعان», دەدى. ونىڭ ايتۋىنشا, بۇل قارجى ىسكەر ايەلدەردى قولداۋعا ەلەۋلى كومەك بولدى. «بۇگىندە 54-كە تارتا ايەل وسى كومەكتى الدى, ياعني بۇل سىرتقى قولداۋ شارالارى بولىپ تابىلادى. الايدا, «اتامەكەن» ايەلدەرگە اقىسىز نەگىزدە قولداۋ جاساۋدا. اتاپ ايتقاندا, جوبالاردى قارجىلىق سۇيەمەلدەۋ, بيزنەس-جوسپارلاردى دايارلاۋ جانە ماركەتينگتىك قىزمەت كورسەتۋ شارالارى قامتىلعان. قازاقستاننىڭ ءاربىر وڭىرىندە ءبىز وسى كومەكتى اقىسىز جاساپ جاتىرمىز», دەدى ول. دينارا بىتىكوۆا, «ەگەمەن قازاقستان».