ۇسىنىس-تىلەكتەر ەسكەرىلەدى

«بىرلىك» پارتياسىنىڭ مۇشەلەرى قاراعاندىداعى «قۇرىلىس مەت» جشس-ىندە بولدى. كاسىپورىن تاۋ-كەن-شاحتا جابدىقتارىنا قىزمەت كورسەتۋمەن جانە ولاردى جوندەۋمەن اينالىسادى, ءوڭىردىڭ بارلىق ءوندىرۋشى كاسىپورىندارىنىڭ قاجەتتىلىگىن قامتاماسىز ەتەدى. پارتيا وكىلدەرى وندىرىسپەن تانىسىپ, 20 ناۋرىزدا بولاتىن قازاقستان پارلامەنتى ءماجىلىسىنىڭ كەزەكتەن تىس سايلاۋىنا بەلسەنە قاتىسۋعا دايىندالىپ جاتقان ەڭبەك ۇجىمىنىڭ مۇشەلەرىمەن كەزدەسۋ وتكىزدى. كەزدەسۋ بارىسىندا «بىرلىك» پارتياسى توراعاسىنىڭ ورىنباسارلارى بولات بايقاداموۆ پەن باۋىرجان بورىبەك كاسىپورىننىڭ جۇمىسشى-قىزمەتكەرلەرىن پارتيانىڭ سايلاۋالدى باعدارلاماسىنىڭ نەگىزگى ەرەجەلەرى تۋرالى حاباردار ەتتى, قويىلعان سۇراقتارعا جاۋاپ بەرىپ, ۇسىنىستار مەن تىلەكتەردى قابىلدادى. سونداي-اق, جيىندا پارتيا توراعاسىنىڭ ورىنباسارى باۋىرجان بورىبەك «بىرلىك» پارتياسى بولاشاق «تازا قازاقستان ءۇشىن» ەكولوگيالىق قوزعالىسىنىڭ باستاماشىسى سانالاتىنىن جانە ءوزىنىڭ تابيعاتتى قورعاۋ جونىندەگى قىزمەتىن قاراعاندى سەكىلدى ءىرى ونەركاسىپ وڭىرلەرىنەن باستاۋعا نيەتتى ەكەنىن مالىمدەدى. ونىڭ ايتۋىنشا, پارتيا وسىندا جانە بۇكىل ەلىمىز بويىنشا زاماناۋي, ەكولوگيالىق تازا تەحنولوگيالاردى ەندىرۋ تەك رەسۋرستاردى ۇنەمدەۋگە عانا كومەكتەسىپ قويماي, سونداي-اق, وندىرىستەگى جۇمىسشىلاردىڭ جۇمىسىن قامتاماسىز ەتەدى, بۇكىل حالىق ءۇشىن مەيلىنشە قولايلى ءومىر ءسۇرۋ جاعدايلارىن ورنىقتىرادى دەپ ەسەپتەيدى. «بىرلىك» پارتياسى قاراعاندى وبلىستىق فيليالىنىڭ توراعاسى سەرىكبول ءابجانوۆ قازاقستاننىڭ كەڭەس ۋاقىتىندا سالىنعان كوپتەگەن ونەركاسىپتىك كاسىپورىندارى ەكولو­گيالىق نورمالاردى ساقتاۋعا ەسەپتەل­مەگەنىن ايتتى. ول, سونداي-اق, مەم­لەكەت باسشىسىنىڭ ەكونوميكاعا اۋقىمدى يندۋستريالىق-يننوۆا­تسيالىق رەفورما جۇرگىزۋ بويىنشا تاپسىرعان باعىت ۇدەرىسىندە ەلىمىزدىڭ بارلىق ونەركاسىپتىك كاسىپورىندارى تابيعاتتى ۇنەمدەيتىن جۇمىس رەجىمىنە كوشەتىنىن اتاپ ءوتتى. سول سەبەپتى, «بىرلىك» پارتياسى ءوزىنىڭ الدىنا ەكونوميكانى جاپپاي ەكولوگيالاندىرۋعا جۇيەلى ءارى جان-جاقتى ىقپال ەتۋ, كاسىپورىنداردا قالدىقسىز جانە باسقا «جاسىل» تەحنولوگيالاردى ەندىرۋ ماقساتىن قويادى. كەزدەسۋدەن سوڭ پارتيا بەلسەندىلەرى پارتيانىڭ ءوز ساياساتىنا تۇزەتۋلەر ەنگىزۋ مەن اتقارۋشى جانە زاڭ شىعارۋشى مەملەكەتتىك بيلىك ءۇشىن ۇسىنىمدىق جانە قۇقىقتىق اكتىلەر دايىنداۋمەن بارىنشا ناقتى اينالىسۋ ءۇشىن سايلاۋشىلاردىڭ ناقتى ءارى كوكەيكەستى مۇقتاجدىقتارى مەن پروبلەمالارىن انىقتايتىن مۇنداي جيىنداردىڭ ماڭىزدى ەكەنىن جەتكىزدى. ءلايلا ەدىلقىزى, «ەگەمەن قازاقستان». قاراعاندى.