شەتەلدىكتەر قىزىعۋشىلىق تانىتۋدا

كەشە ەلىمىزدىڭ ورتالىق سايلاۋ كوميسسيا­سى 2016 جىلعى 20 ناۋرىزعا تاعايىندالعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارىن سايلاۋعا حالىق­ارالىق ۇيىمنان جانە شەت مەملەكەتتەن تاعى 133 بايقاۋشىنى اككرەديتتەدى. وسك مۇشەسى تاتيانا وحلوپكوۆانىڭ حاباردار ەتكەنىندەي, 4 ناۋرىزدا ورتالىق سايلاۋ كوميسسياسى «2016 جىلعى 20 ناۋرىزعا تاعايىندالعان قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىنا جانە ءماسليحاتتارى دەپۋ­تاتتارىنىڭ كەزەكتى سايلاۋىنا حالىقارالىق ۇيىم مەن شەت مەملەكەتتىڭ بايقاۋشىلارىن اككرەديت­تەۋ تۋرالى» قاۋلى قابىلدادى. وسى قاۋلىعا سايكەس ورتسايلاۋكوم قازاقستان رەسپۋبليكاسى سىرتقى ىستەر مينيسترلىگىنىڭ ۇسىنۋى بويىنشا ءبىر حالىقارالىق ۇيىمنان جانە ءبىر شەت مەملەكەتتەن تاعى 133 بايقاۋشىنى اككرەديتتەدى. «ولاردىڭ ىشىندە 130 بايقاۋشى تمد-دان بايقاۋشىلار ميسسياسىنان جانە 3 بايقاۋشى كورەيا رەسپۋبليكاسىنان, – دەدى ت.وحلوپكوۆا وسى جونىندە. – وسىلايشا, 2016 جىلعى 4 ناۋرىزداعى جاعداي بويىنشا ورتسايلاۋكوم ەكى حالىقارالىق ۇيىمنىڭ ميسسيالارىنان (ەقىۇ/دياقب جانە تمد), ءبىر حالىقارالىق ۇيىمنان (يسلام ىنتى­ماقتاستىعى ۇيىمى) جانە توعىز شەت مەملەكەتتەن 308 بايقاۋشىنى اككرەديتتەدى. سونىمەن قاتار, قازاقستان رەسپۋبليكاسىنىڭ سىرتقى ىستەر مينيسترلىگى 2016 جىلعى 2 ناۋرىزداعى جاعداي بويىنشا 28 مەملەكەتتەن شەتەلدىك بۇقارالىق اقپارات قۇرالدارىنىڭ 116 وكىلىن اككرەديتتەدى». شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋدى ورتسايلاۋكوم 2016 جىلعى 14 ناۋرىزعا دەيىن جۇزەگە اسىرادى. سونداي-اق, «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ 46-بابىنا سايكەس ورتالىق سايلاۋ كوميسسياسى قازاقستان رەسپۋبليكاسى ءماسليحاتىنىڭ دەپۋتاتى كۋالىگىنىڭ ۇلگىسىن بەكىتتى. ءاليسۇلتان قۇلانباي, «ەگەمەن قازاقستان».