سۇلۋلىق. نازىكتىك. تاعاتتىلىق. ىسكەرلىك

8 ناۋرىز – حالىقارالىق ايەلدەر كۇنى قۇرمەتىنە وراي قازاقستان رەسپۋبليكاسىنىڭ پرەزيدەنتى

ن.ءا.نازارباەۆپەن «كوكتەم شۋاعى» كەزدەسۋىنە قاتىسقان قازاقستاننىڭ ايەلدەر قوعامداستىعىنىڭ وكىلدەرى

بىرعانىم سارىقىزى ءايتىموۆا, قازاقستان رەسپۋبليكاسى پارلامەنتى سەناتىنىڭ دەپۋتاتى. 63 جاستا, قازاق, استانا قالاسىندا تۇرادى. ا.س.پۋشكين اتىنداعى ورال پەداگوگيكالىق ينستيتۋتىن «اعىلشىن ءتىلى مۇعالىمى» ماماندىعى بويىنشا, ءال-فارابي اتىنداعى قازاق ۇلتتىق ۋنيۆەرسيتەتىن «زاڭگەر» ماماندىعى بويىنشا تامامداعان. قازاقستان رەسپۋبليكاسىنىڭ بىرىككەن ۇلتتار ۇيىمى جانىنداعى تۇراقتى وكىلى (2007-2013), قازاقستان رەسپۋبليكاسىنىڭ ءبىلىم جانە عىلىم ءمينيسترى (2004-2007) لاۋازىمدارىندا جۇمىس ىستەدى. ورتا مەكتەپتىڭ مۇعالىمىنەن, كومسومولدار تالىمگەرىنەن باستاپ مينيستر, پرەمەر-ءمينيستردىڭ ورىنباسارى, ەلشى, قازاقستان رەسپۋبليكاسىنىڭ بۇۇ جانىنداعى تۇراقتى وكىلى, پارلامەنت سەناتىنىڭ دەپۋتاتى لاۋازىمدارىنا دەيىنگى ەڭبەك جولىنىڭ بارلىق قالىپتاسۋ كەزەڭدەرىنەن وتكەن. ءىى دارەجەلى «دوستىق», «پاراسات», «قۇرمەت» وردەندەرىمەن ناگرادتالعان, يتاليا رەسپۋبليكاسىنىڭ ۇلكەن كرەست كاۆالەرى. قازاقستان رەسپۋبليكاسىنىڭ توتەنشە جانە وكىلەتتى ەلشىسى ديپلوماتيالىق دارەجەسى بار. تۇرمىستا, 2 بالاسى بار. ءحوببيى: مۋزىكا, كينو, تەاتر, سپورت (شاڭعى, گولف, جاياۋ ءجۇرۋ). جانار سەيداحمەتقىزى ايتجانوۆا, قازاقستان رەسپۋبليكاسىنىڭ ەكونوميكالىق ينتەگراتسيا ىستەرى جونىندەگى ءمينيسترى. 50 جاستا, قازاق, استانا قالاسىندا تۇرادى. س.م.كيروۆ اتىنداعى قازاق مەملەكەتتىك ۋنيۆەرسيتەتىن «تاريح ءپانىنىڭ مۇعالىمى» ماماندىعى بويىنشا بىتىرگەن. ۆەنا بىرىككەن ينستيتۋتىندا, گارۆارد ۋنيۆەرسيتەتىنىڭ دج.كەننەدي اتىنداعى مەملەكەتتىك باسقارۋ مەكتەبىندە (اقش) ءبىلىم العان. ۋنيۆەرسيتەتتى بىتىرگەن سوڭ ممۋ, پراگاداعى ورتالىق ەۋروپا ۋنيۆەرسيتەتىندە تاعىلىمدامادان وتكەن. قازاقستاننىڭ بۇۇ-داعى وكىلدىگىندە باعدارلامالاردى ۇيلەستىرۋشى بولىپ ىستەگەن. نيۋ-يورك قالاسىنداعى بۇۇ دب شتاب-پاتەرىندە ەۋروپا مەن تمد وڭىرلىك بيۋروسى باعدارلامالارىنىڭ جەتەكشىسى بولعان. يندۋستريا جانە ساۋدا ۆيتسە-ءمينيسترى, قازاقستان رەسپۋبليكاسىنىڭ دۇنيەجۇزىلىك ساۋدا ۇيىمىنا كىرۋى بويىنشا كەلىسسوزدەردە قازاقستان رەسپۋبليكاسىنىڭ ارنايى وكىلى, قازاقستان رەسپۋبليكاسى ەكونوميكالىق دامۋ جانە ساۋدا ءمينيسترى قىزمەتتەرىن اتقارعان. «پاراسات», «قۇرمەت» وردەندەرىمەن, «ەرەن ەڭبەگى ءۇشىن», ءى دارەجەلى «ەۋرازيالىق ەكونوميكالىق وداقتى قۇرۋعا قوسقان ۇلەسى ءۇشىن» مەدالدارىمەن, مەرەيتويلىق مەدالدارمەن ناگرادتالعان. تۇرمىستا, 2 بالاسى بار. ءحوببيى: قىزىقتى نارسەنىڭ ءبارىن وقىعاندى ۇناتادى. مۋكارام سايداكيمقىزى ابۋباحريەۆا, «استانا بالەت» تەاترىنىڭ باس قويۋشى-رەجيسسەرى. 33 جاستا, ۇيعىر, استانا قالاسىندا تۇرادى. س.سەلەزنەۆ اتىنداعى الماتى حورەوگرافيالىق ۋچيليششەسىن جانە ت.جۇرگەنوۆ اتىنداعى قازاق ۇلتتىق ونەر اكادەمياسىن بىتىرگەن. ونەرتانۋ ماگيسترى. مادەنيەت جانە ونەر سالاسىنداعى مەملەكەتتىك شاكىرتاقىنىڭ يەگەرى (2015 جىل). «جۋسان» – جاس حورەوگرافتىڭ ەڭ العاشقى ۇلكەن تۋىندىسى. «جۋسان» سپەكتاكلىنىڭ پرەمەراسى قازاقستاننىڭ بالەت تاريحىنداعى اتاۋلى وقيعا بولدى. «استانا بالەت» تەاترى تۇڭعىش رەت ۇلتتىق تاريحىمىزعا ارنالعان ءبىر اكتىلى سپەكتاكل جاساپ شىعاردى. ون جىلدان استام ۋاقىت بويى – اباي اتىنداعى مەملەكەتتىك اكادەميالىق وپەرا جانە بالەت تەاترىندا, 2014 جىلدان باستاپ «استانا بالەت» تەاترىندا باس رەجيسسەر بولىپ جۇمىس ىستەپ كەلەدى. حالىقارالىق «ەۋرازيا-2005» كينوفەستيۆالىنىڭ اشىلۋ ءراسىمىن ۇيىمداستىرۋعا قاتىستى. تۇرمىستا, قىز تاربيەلەپ وتىر. ءحوببيى: سۋرەت سالۋ. قاراقات جاقسىلىققىزى ابدەن, «قازاق قىزى» قوعامدىق بىرلەستىگىنىڭ ءتورايىمى. 41 جاستا, قازاق, استانا قالاسىندا تۇرادى. الماتى قالاسىندا حالىق شارۋاشىلىعى ينستيتۋتىن «ەكونوميست-كوممەرسانت» ماماندىعى بويىنشا تامامداعان. «قازاق قىزى» مادەني-ادامگەرشىلىك قىزدار ينستيتۋتىنىڭ قۇرىلتايشىسى. ەلباسى ن.ءا.نازارباەۆتىڭ: «ەڭ الدىمەن ءبىزدىڭ قازاق قىزدارىمىزدىڭ تاربيەسىنە ءمان بەرۋىمىز كەرەك. ولار – بولاشاق جار, بولاشاق انا, شاڭىراعىمىزدىڭ بولاشاق وتاناسى», – دەگەن سوزدەرى «قازاق قىزى» اۆتورلىق جوباسىنىڭ جاسالۋىنا نەگىز بولدى. ينستيتۋت قازاقي جانە ەۋروپالىق وزىق ۇلگىدەگى قوعامدىق-ادامگەرشىلىك داستۇرلەر نەگىزىندە ءتۇرلى ۇلتتاردىڭ 100-دەن استام قىزىن وقىتىپ, تاربيەلەپ وتىر, قازاقستاندىق قىزداردىڭ جوعارى ءيميدجى مەن مارتەبەسىن الەمدىك قوعامداستىقتا پاش ەتۋگە ىقپالىن تيگىزۋدە. سونداي-اق, ينستيتۋت شەتەلدىك ديپلوماتتار تاراپىنان سۇرانىسقا يە, ولار ءوز قىزدارىن زور قۋانىشپەن وقۋعا بەرەدى. ەكونوميكا عىلىمدارىنىڭ كانديداتى, ءار جىلدارى مەملەكەتتىك ساياسات ۇلتتىق مەكتەبى ديرەكتورىنىڭ ورىنباسارى, «نۇر وتان» پارتياسى يننوۆاتسيالىق كوميتەتىنىڭ ينسپەكتورى قىزمەتتەرىن اتقارعان. تۇرمىستا, 3 بالاسى بار. ءحوببيى: كلاسسيكالىق ادەبيەت وقۋ, توعىزقۇمالاق, اتپەن سەرۋەندەۋ, مۇزويىققا ءتۇسۋ. جانار تالعاتبەكقىزى بايجولدينوۆا, 2 ءوزىنىڭ جانە 11 اسىراپ العان بالانىڭ اناسى. 40 جاستا, قازاق, استانا قالاسىندا تۇرادى. قازاق مەملەكەتتىك زاڭ ۋنيۆەرسيتەتىن «قۇقىقتانۋ» ماماندىعى بويىنشا بىتىرگەن. ونىڭ ۇلكەن تاتۋ وتباسىندا 6 ۇلت وكىلدەرىنەن 13 بالا تۇرىپ جاتىر: قازاق (5), ورىس (2), تاتار (2), نەمىس (2), باشقۇرت, ۋدمۋرد. مەملەكەتتىك قۇرىلىمدار مەن جەكە كومپانيالاردا جۇمىس ىستەگەن. «ارۋجان» جك-عا باسشىلىق ەتەدى, جەتىم بالالاردى اسىراپ الۋ سالاسىندا زاڭ, ەرىكتىلەر قىزمەتتەرىن ۇسىنۋمەن اينالىسادى. استانا جانە الماتى قالالارىندا اسىراپ الۋشى اتا-انالار كلۋبىن اشۋعا ىقپال ەتتى, جۇيەلى تۇردە بالا اسىراپ الۋ ماسەلەلەرى بويىنشا ترەنينگتەر وتكىزىپ تۇرادى. ماقساتى – جەتىمدىك پروبلەماسىنا بارىنشا كوپ قازاقستاندىقتىڭ نازارىن اۋدارۋ. «بالالار بالالار ۇيلەرىندە تۇرماۋى ءتيىس», – دەيدى ول. ءوزى ۇلگى كورسەتە وتىرىپ, ۇلداردى دا, قىزداردى دا اسىراپ الىپ, باقىتتى ەتۋگە بولاتىنىن دالەلدەدى. ءحوببيى: توقىما توقۋ, تاريحي ادەبيەتتەر وقۋ. دينارا راۋشانقىزى باقتىباەۆا, اكتريسا. 23 جاستا, قازاق, الماتى قالاسىندا تۇرادى. الماتىداعى ەنەرگەتيكا جانە بايلانىس ۋنيۆەرسيتەتىنىڭ راديوتەحنيكا, ەلەكترونيكا جانە تەلەكوممۋنيكاتسيا فاكۋلتەتىن «ينجەنەر-بايلانىسشى» ماماندىعى بويىنشا بىتىرگەن. جاس, دارىندى اكتريسا, «ون ي ونا», «نارحوز» فيلمدەرى ارقىلى جاستاردىڭ سۇيىكتى كەيىپكەرىنە اينالعان. دينارا اكتەرلىك قىزمەتپەن اينالىسۋدى جوسپارلاماعان ەدى, الايدا, «ون ي ونا» ءفيلمىنىڭ كاستينگىنە شاقىرىلعاننان كەيىن ول ءوز شەشىمىن وزگەرتەدى. فيلم ول ءۇشىن اكتريسالىقتىڭ العاشقى ساتىسى بولدى. بيۋدجەتى 300 مىڭ دوللار بولعان كارتينا ساتىلىمنىڭ العاشقى اپتاسىندا-اق ءوزىن ءوزى اقتاپ شىقتى. قازىرگى ۋاقىتتا ءتۇسىرىلىمى سانكت-پەتەربۋرگ قالاسىندا ءجۇرىپ جاتقان, قازاقستان رەسپۋبليكاسىنىڭ پرەزيدەنتى ن.ءا.نازارباەۆ تۋرالى «جۇلدىزدار وسىلاي تۋدى» ءفيلمىنىڭ بەسىنشى بولىمىندە مەملەكەت باسشىسىنىڭ ورتانشى قىزىنىڭ ءرولىن سومداۋدا. تۇرمىسقا شىقپاعان. ءحوببيى: مۋزىكا جانە كينو. ريزا زۇلقارنايقىزى بورانباەۆا, قازاقستان رەسپۋبليكاسى دەنساۋلىق ساقتاۋ جانە الەۋمەتتىك دامۋ مينيسترلىگىنىڭ پەدياتريا جانە بالالار حيرۋرگياسى عىلىمي ورتالىعىنىڭ ديرەكتورى. 52 جاستا, قازاق, الماتى قالاسىندا تۇرادى. قاراعاندى مەملەكەتتىك مەديتسينا ينستيتۋتىن «دارىگەر-پەدياتر» ماماندىعى, «ونكولوگيا جانە گەماتولوگياداعى پەدياتريا» بەيىنى بويىنشا تامامداعان. مەديتسينا عىلىمدارىنىڭ دوكتورى, رەسپۋبليكانىڭ باس شتاتتان تىس بالالار ونكولوگ-گەماتولوگى, «قازاقستان پەدياترلار وداعى» قب ءتورايىمى. ر.بورانباەۆانىڭ ەڭبەك جولى تاۋەلسىز قازاقستاننىڭ قالىپتاسۋ كەزەڭىمەن تۇسپا-تۇس كەلدى. قاراعاندى قالالىق بالالار اۋرۋحاناسىندا ۋچاسكەلىك پەدياتر, ودان كەيىن دەنساۋلىق ساقتاۋ سالاسىنىڭ ءتۇرلى باعىتىندا ەڭبەك ەتىپ, رەسپۋبليكالىق دەڭگەيدەگى باسشىلىق لاۋازىمدارعا دەيىن كوتەرىلدى. ماسكەۋ قالاسىنداعى بالالار گەماتولوگياسى, ونكولوگياسى جانە يممۋنولوگياسىنىڭ فەدەرالدى عىلىمي-كلينيكالىق ورتالىعىندا دوكتورلىق ديسسەرتاتسياسىن قورعادى. 2 عىلىمي-تەحنيكالىق باعدارلامانىڭ جەتەكشىسى, 120-دان استام عىلىمي جۇمىستاردىڭ اۆتورى, ونىڭ ىشىندە 10 ادىستەمەلىك ۇسىنىمدامالار جاساعانى جانە جۇرە پايدا بولعان اپلاستيكالىق انەميانى ەمدەۋ تاسىلدەرىن تاپقانى ءۇشىن 2 اۆتورلىق كۋالىگى بار. «قازاقستان رەسپۋبليكاسى دەنساۋلىق ساقتاۋ ءىسىنىڭ ۇزدىگى», «دەنساۋلىق ساقتاۋ ىسىنە قوسقان ۇلەسى ءۇشىن» ءتوس بەلگىلەرىمەن ناگرادتالعان. تۇرمىستا, 2 بالاسى بار. ءحوببيى: ءجۇزۋ, كونكيمەن سىرعاناۋ, باۋ-باقشامەن اينالىسۋ, گۇل ءوسىرۋ. جۇپار باقتىبەكقىزى عابدۋللينا, «استانا وپەرا» مەملەكەتتىك وپەرا جانە بالەت تەاترىنىڭ سوپرانوسى. 38 جاستا, قازاق, استانا قالاسىندا تۇرادى. قۇرمانعازى اتىنداعى قازاق ۇلتتىق كونسەرۆاتورياسىن «جەكە ءان ايتۋ» ماماندىعى بويىنشا تامامداعان. قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ گرانت يەگەرى (2009, 2014 جج.), ن.تىلەنديەۆ اتىنداعى رەسپۋبليكالىق بايقاۋدىڭ گران-پري يەگەرى (2013), «دارىن» مەملەكەتتىك جاستار سىيلىعىنىڭ لاۋرەاتى (2012), ۋكراينادا وتكەن «ءححى عاسىر ونەرى» حالىقارالىق ۆوكالشىلار كونكۋرسىنىڭ گران-پري يەگەرى (كيەۆ, 2010), ب.تولەگەنوۆا اتىنداعى ءىىى حالىقارالىق ۆوكالشىلار بايقاۋىنىڭ ءىىى جۇلدەلى لاۋرەاتى (2007), ع.جۇبانوۆا اتىنداعى رەسپۋبليكالىق بايقاۋدىڭ ءى جۇلدەلى لاۋرەاتى (2005), ە.حاسانعاليەۆ اتىنداعى رەسپۋبليكالىق ۆوكالشىلار بايقاۋىنىڭ ءى جۇلدەلى لاۋرەاتى (2003). يتالياداعى دج.ءپۋچچينيدىڭ «تۋراندوت» وپەرا انشىلەرى حالىقارالىق جوباسىنا قاتىسۋشى (ۆەرونا, 2009), ك.بايسەيىتوۆا اتىنداعى ءحىى رەسپۋبليكالىق ۆوكالشىلار بايقاۋىنىڭ ديپ­لومانتى (استانا, 2002). م.گلينكا اتىنداعى حالىقارالىق ۆوكالشىلار بايقاۋىنىڭ قۇرمەت گراموتاسىمەن ماراپاتتالعان (ماسكەۋ, 2009). ەلەنا سەرگەەۆنا دانيلوۆا, «جاستار باستامالارى ورتالىعىنىڭ» جەتەكشىسى. 27 جاستا, ورىس, قوستاناي وبلىسىندا تۇرادى. قوستاناي مەملەكەتتىك پەداگوگيكالىق ينستيتۋتىن «شەتەل تىلدەرى» ماماندىعى بويىنشا تامامداعان. پەداگوگتار اۋلەتىنىڭ ءتورتىنشى بۋىن وكىلى. «جاستارعا مەيىرىمدى مەكەن» قاناتقاقتى جوباسىنىڭ جەتەكشىسى. «جاس ۇلان» اۋداندىق فيليالىنىڭ اتقارۋشى حاتشىسى بولعان. ونىڭ باس­تاماسىمەن «راۋان» جاستار قوعامدىق بىرلەستىگى ۇيىمداستىرىلدى. 10 الەۋمەتتىك ماڭىزى بار جوبانىڭ ۇيلەستىرۋشىسى, ونىڭ ىشىندە جاستاردى جازدا ەڭبەكپەن قامتۋ, ۇلتارالىق كەلىسىمدى ناسيحاتتاۋ, ەرىكتىلەر قوزعالىسىن دامىتۋ جانە ت.ب. بار. «وتكەنسىز بولاشاق جوق» جوباسى جاستار اراسىنداعى رەسپۋبليكالىق بايقاۋدا «ەرىكتىلىك» اتالىمى بويىنشا جۇلدەگەر اتاندى. حالىقارالىق ەرىكتى جاستار سلەتىنە قاتىسۋشى ءارى وڭىرلىك جاستار سلەتىن ۇيىمداستىرۋشى. جاستاردىڭ «جاستار كوشباسشىسى» اتالىمىنداعى التىن كىتاپتىڭ لاۋرەاتى. رەسپۋبليكالىق «كوزىڭدى اش» بايقاۋى «ءبىلىم بەرۋ» اتالىمىنىڭ جەڭىمپازى, بۇۇ-نىڭ ارنايى سىيلىعىمەن اتاپ وتىلگەن. تۇرمىستا, 2 بالاسى بار. ءحوببيى: كيىمنىڭ ديزاينىن جاساۋ مەن تىگۋ. ءاليا بەكەجانقىزى داۋلەتباەۆا, اقىن. 39 جاستا, قازاق, اتىراۋ وبلىسىندا تۇرادى. ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىن «قازاق ءتىلى مەن ادەبيەتى پاندەرىنىڭ» مۇعالىمى ماماندىعى بويىنشا بىتىرگەن. رەسپۋبليكاعا تانىمال اقىن فاريزا وڭعارسىنوۆانىڭ شىعارماشىلىعىن ۇلگى تۇتقان جان. وبلىستىق امبەباپ كىتاپحانانىڭ عىلىمي حاتشىسى. 2014 جىلى ونىڭ وتباسى ۇلگىلى شاڭىراق رەتىندە قازاقستانداعى وتباسى كۇنىنە وراي اتىراۋ وبلىسىنىڭ اكىمىمەن سالتاناتتى كەزدەسۋگە شاقىرىلدى. حالىقارالىق «شابىت» فەستيۆالىنىڭ لاۋرەاتى, ب.مومىش ۇلىنىڭ 100 جىلدىعىنا جانە تولە ءبيدىڭ 350 جىلدىعىنا ارنالعان جىر ءمۇشايرالارىنىڭ جۇلدەگەرى. ت.ىسمايىلوۆ اتىنداعى «شىعىس شىنارى» حالىقارالىق جىر بايقاۋى سىيلىعىنىڭ يەگەرى. 2015 جىلى قازاق حاندىعىنىڭ 550 جىلدىعىنا ارنالعان «سالقام جاڭگىر» حالىقارالىق بايقاۋىنىڭ جۇلدەسىن جەڭىپ الدى. تۇرمىستا, 4 بالاسى بار. ءحوببيى: كىتاپ وقۋ, اسپازدىق. مايا ەربولاتقىزى ەگىمباەۆا, «استانا ەكسپو-2017» ۇك» باسقارۋشى ديرەكتورى. 38 جاستا, قازاق, استانا قالاسىندا تۇرادى. قازاق مەملەكەتتىك زاڭ ۋنيۆەرسيتەتىن «قۇقىقتانۋ» ماماندىعى بويىنشا بىتىرگەن. 1998 جىلدان 2012 جىلعا دەيىن قازاقستان رەسپۋبليكاسىنىڭ قارجى مينيسترلىگى زاڭ قىزمەتى دەپارتامەنتىندە, قازاقستاننىڭ مۇناي-گاز سەكتورىندا ءتۇرلى لاۋازىمداردا جۇمىس ىستەگەن. ءوزىنىڭ «استانا ەكسپو-2017» ۇك» اق-تاعى جۇمىسىن 2013 جىلى زاڭ دەپارتامەنتىنىڭ ديرەكتورى لاۋازىمىنان باستاعان. «استانا قالاسىندا ەكسپو-2017 حالىقارالىق مامانداندىرىلعان كورمەسىن ۇيىمداستىرۋ مەن وتكىزۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭ اكتىلەرىنە وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىن جاساۋعا بەلسەنە اتسالىستى. 2015 جىلى استانا قالاسىنداعى ايەلدەردىڭ ءتورتىنشى ەۋرازيالىق ءسامميتىنىڭ (EWS IV) سپيكەرى بولدى. «قازاقستان رەسپۋبليكاسىنىڭ كونستيتۋتسياسىنا – 20 جىل» مەرەيتويلىق مەدالىمەن ناگرادتالعان. تۇرمىستا, 2 بالاسى بار. ءحوببيى: سپورتتىڭ بەلسەندى تۇرلەرى, ادەبيەت جانە ونەر. تولعاناي پيونەرقىزى ەلەكباەۆا, «قازاق ويۋلارى» جشس ديرەكتورى. 41 جاستا, قازاق, استانا قالاسىندا تۇرادى. اباي اتىنداعى الماتى مەملەكەتتىك ۋنيۆەرسيتەتىن «قازاق ءتىلى مەن ادەبيەتى پاندەرىنىڭ مۇعالىمى» ماماندىعى بويىنشا, رەسەي فەدەراتسياسىنىڭ ۇلتتىق ءبىلىم ماسەلەلەرى ينستيتۋتىنىڭ اسپيرانتۋراسىن ءبىتىردى. ءار جىلدارى رەسەيدىڭ التاي رەسپۋبليكاسىنىڭ قوس-اعاش ورتا مەكتەبىندە, قازاقستان رەسپۋبليكاسىنىڭ رەسەي فەدەراتسياسىنداعى ەلشىلىگىنىڭ جانىنداعى مادەنيەت ورتالىعىندا قازاق ءتىلى مەن ادەبيەتىنىڭ وقىتۋشىسى; موريس تورەز اتىنداعى ماسكەۋ مەملەكەتتىك لينگۆيستيكالىق ۋنيۆەرسيتەتىندە قازاق ءتىلىنىڭ وقىتۋشىسى, رەسەي ءبىلىمدى دامىتۋ فەدەرالدىق ينستيتۋتىنىڭ جانىنداعى ۇلتتىق ءبىلىم ماسەلەلەرىنىڭ ورتالىعىندا اعا عىلىمي قىزمەتكەر, م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە قازاق ءتىلىنىڭ وقىتۋشىسى بولىپ جۇمىس ىستەدى. 2009 جىلى قازاقستانعا تۇراقتى تۇرۋ ءۇشىن كوشىپ كەلگەننەن بەرى قازاق ويۋلارىن پايدالانا وتىرىپ, كىلەمدەرگە ارنالعان ديزاينمەن اينالىسا باستادى. 2012 جىلى يتاليالىق تەحنولوگيا بويىنشا ءجۇن ش ۇلىقتاردى شىعارۋمەن اينالىساتىن استانا ش ۇلىق فابريكا­سى «بوتا» جشس-ءىن قۇردى. 2014 جىلدان بەرى «قازاق ويۋلارى» جشس-نە باسشىلىق ەتەدى, تۇيە جۇنىنەن جاسالعان سىرما كورپەلەر مەن جاستىقتاردى شىعارۋمەن اينالىسادى. تۇرمىستا, 3 بالانىڭ اناسى. ءحوببيى: كىتاپ وقۋ, ءجۇزۋ. تامارااسار قالنيازقىزى جانقۇل, ءانشى. 40 جاستا, قازاق, استانا قالاسىندا تۇرادى. الماتى قالاسىنداعى قىزدار پەداگوگيكالىق ينستيتۋتىنىڭ مۋزىكالىق فاكۋلتەتىن, سونداي-اق, رەسەي قازىرگى زامانعى ونەر ينستيتۋتىنىڭ ەسترادا جانە دجاز فاكۋلتەتىن تامامداعان. تامارااسار كوپتەگەن قازاقستاندىق ءۇشىن ەرىك-جىگەردىڭ, باتىلدىق پەن بەلسەندىلىكتىڭ ۇلگىسى, اۆتوموبيل اپاتىنان كەيىن جاپ-جاس ول – اياعىنان ايىرىلسا دا ساحناعا شىعۋعا جۇرەكسىنبەگەن ءانشى. ول قايتادان ءان سالىپ, حالىققا قۋانىش سىيلاۋ ءۇشىن جىگەرىن جاني ءبىلدى. قازىرگى كەزدە ماڭعىستاۋ وبلىستىق فيلارمونياسىندا حالىق اسپاپتار وركەسترىنىڭ ءانشىسى. «ماڭعىستاۋ داۋىسى» كونكۋرسىنىڭ لاۋرەاتى (1996 ج.), قىزدار پەداگوگيكالىق ينستيتۋتىندا وقىپ جۇرگەن كەزىندە «ايگۇل», «ۇلار» انسامبلدەرىنە قاتىستى. ش.ايمانوۆ اتىنداعى «قازاقفيلم» كينوستۋدياسىندا «ارماننىڭ اق جەلكەنى» دەرەكتى فيلمىنە ءتۇستى. 2000 جىلى «اريايداي» فولكلورلىق اۋديوجيناعىن شىعاردى. ماحامبەت وتەمىس ۇلىنىڭ 200 جىلدىعىنا ارنالعان رەسپۋبليكالىق بايقاۋدىڭ گران-پري يەگەرى. «قۇرمەت» وردەنىمەن ماراپاتتالعان, «سەرپەر» مەملەكەتتىك جاستار سىيلىعىنىڭ لاۋرەاتى. ەر بالا تاربيەلەپ وتىر. ءحوببيى: كەستە تىگۋ, جىلقى وسىرۋمەن دە اينالىسادى. جانار ەركىنقىزى ىبىراەۆا, زىمىراندى ارتيللەريالىق كەمەنىڭ اسكەري ءبولىمىنىڭ راديوبايلانىسشىسى. 27 جاستا, قازاق, ماڭعىستاۋ وبلىسىندا تۇرادى. استانا قالاسىندا قازاق مەملەكەتتىك زاڭ ۋنيۆەرسيتەتىن اياقتاعان. كاسپي ماڭى مەملەكەتتەرىنىڭ اسكەري-تەڭىز كۇشتەرىندە قىزمەت ەتەتىن ءبىرىنشى جانە جالعىز قىز بولىپ تابىلادى. رەسەي اۋماعىندا وتكەن «كاسپي تەڭىزى-2015» حالىقارالىق جارىستارىنا قاتىستى. ج.ىبىراەۆانىڭ شەبەرلىگى ارقاسىندا رەسەي فەدەراتسياسىنىڭ ماحاچكالا پورتىنان اقتاۋ قالاسىنداعى اسكەري-تەڭىز بازاسىمەن ۇزدىكسىز تۇراقتى بايلانىس قامتاماسىز ەتىلدى. كەمە ەكيپاجىنىڭ قۇرامىندا كەمەدە جاسالعان اسكەري اتىستاردى قامتاماسىز ەتە وتىرىپ, ەكى رەت كاسپي تەڭىزى بويىنشا شۇعىل جۇزۋلەرگە شىقتى. 2011 جىلى كۇشتىك قۇرىلىمدار اراسىندا ارمرەستلينگتەن وتكەن رەسپۋبليكالىق ۆەدومستۆوارالىق جارىستاردىڭ جەڭىمپازى اتاندى. قازاقستان تەلەارناسىنداعى «شىن جۇرەكتەن» تەلەباعدارلاماسىنا قاتىسقان. «تۇڭعىش بايلانىسشى جاۋىنگەر» اتالىمىنىڭ جەڭىمپازى. «قازاقستان رەسپۋبليكاسىنىڭ قارۋلى كۇشتەرىنە 20 جىل», «قازاقستان رەسپۋبليكاسىنداعى اسكەري-تەڭىز كۇشتەرىنە 20 جىل» مەرەيتويلىق مەدالدارمەن ماراپاتتالعان. سونداي-اق, قورعانىس مينيسترلىگى باسشىلىعىنىڭ جانە قر قك اتك باس قولباسشىسىنىڭ كوپتەگەن ماراپاتتاۋلارىنا يە. تۇرمىس قۇرماعان. ءحوببيى: سپورتتىق ويىن تۇرلەرى, قولونەر. داميرا اشىمحانقىزى قاناەۆا, بيولوگ عالىم. 32 جاستا, قازاق, استانا قالاسىندا تۇرادى. ءال-فارابي اتىنداعى قازاق ۇلتتىق ۋنيۆەرسيتەتىنىڭ بيولوگيا فاكۋلتەتىن تامامداعان. پرەزيدەنتتىڭ «بولاشاق» باعدارلاماسى بويىنشا امەريكانىڭ اركانزاس ۋنيۆەرسيتەتىندە مولەكۋلالىق جانە جاسۋشالىق بيولوگيا فاكۋلتەتىندە PhD دارەجەسىن العان. ەنەرگەتيكالىق زەرتتەۋلەر ورتالىعىندا عىلىمي قىزمەتكەر بولىپ ىستەدى, NURIS جم اعا عىلىمي قىزمەتكەرى. قازىرگى كەزدە نازارباەۆ ۋنيۆەرسيتەتتىڭ عىلىم جانە تەحنولوگيالار مەكتەبىنىڭ اسسيستەنت-پروفەسسورى, سونداي-اق, NURIS/NLا جم پانارالىق اسپاپتىق ورتالىعى ديرەكتورىنىڭ مىندەتىن قوسا اتقارادى. تۋبەركۋلەز جانە وبىر اۋرۋلارىن ەرتە دياگنوستيكالاۋ ادىستەرىن زەرتتەۋمەن اينالىسادى. بيوسەنسورلار مەن بيواسپاپتار, ميكروبيولوگيا, يممۋنوبيولوگيا, فلۋورەستسەنتتى ادىستەر مەن تەحنولوگيالارعا ارنالعان زەرتحانالاردى قۇرۋدى ۇيلەستىردى. حالىقارالىق عىلىمي جۋرنالدارداعى جوعارى يمپاكت فاكتورى بار عىلىمي جاريالانىمداردىڭ اۆتورى. ونىڭ ستۋدەنتتەرى ەكى جىل بويى سينتەتيكالىق بيولوگيا بويىنشا بوستون قالاسىنداعى (اقش) «iGEM» (International Genetically Engineered Machine) حالىقارالىق جارىستاردا جۇلدەلى ورىنداردى يەلەنىپ كەلدى. ءبىلىم جانە عىلىم مينيسترلىگى عىلىمي-تەحنيكالىق باعدارلامالارى مەن گرانتتارىنىڭ جەتەكشىسى جانە قوسىمشا جەتەكشىسى بولىپ تابىلادى. تۇرمىس قۇرعان, ءبىر قىز تاربيەلەپ وتىر. ءحوببيى: سپورتتىق جۇگىرۋ. اينا جولامانقىزى كەنەسارينا, اقتوبە فەرروقورىتپا زاۋىتىنىڭ مەحانيكالىق جوندەۋ تسەحىنىڭ توكارى 29 جاستا, قازاق, اقتوبە وبلىسىندا تۇرادى. تاۋ-كەن كوللەدجىن توكار ماماندىعى بويىنشا بىتىرگەن. ءدوڭ تاۋ-كەن بايىتۋ كومبيناتىندا جۇمىس ىستەگەن. 3 رازريادتى توكار ءارى فرەزەرشى. ەكپىندى توكار تۋرالى «توكار قىز» اتتى ماقالا 2014 جىلى «ەگەمەن قازاقستان» گازەتىندە جارىق كوردى. وقىرماندار كوپ بالالى وتباسىنان شىعىپ, ەر ادامنىڭ ماماندىعىن تاڭداعان قايسار توكار قىزدىڭ ءومىرى تۋرالى وسى كەزدە وقىپ ءبىلدى, قىز بالانىڭ قاراپايىم جۇمىسشى ماماندىعىن تاباندىلىقپەن يگەرگەنىنە ءسۇيسىنىس ءبىلدىردى. ۇلكەن دە ىنتىماقتى وتباسىندا, اينادان باسقا 5 اعاسى مەن 4 اپكەسى بار. 2003 جىلى اينا­نىڭ اناسى گۇلسارا قاباقايقىزى كەنەسارينا «التىن القا» يەگەرى اتاندى. تۇرمىس قۇرماعان. ءحوببيى: سپورت جانە مۋزىكا. تولەۋ كوكوشقىزى قۇشمانوۆا, شارۋا قوجالىعىنىڭ باسشىسى. 55 جاستا, قازاق, پاۆلودار وبلىسىندا تۇرادى. اۋىلشارۋاشىلىق تەحنيكۋمىن ۆەتەرينار ماماندىعى بويىنشا تامامداعان. 2012 جىلى نازارباەۆ ۋنيۆەرسيتەتتە بيزنەس-كۋرستان وتكەن. استانا قالاسىندا بولعان «قاراوتكەل» كورمەسى التىن مەدالىنىڭ يەگەرى (2012 ج.), ياكۋتياداعى «قىمىز – قۇدايلار سۋسىنى» حالىقارالىق بايقاۋىنىڭ جەڭىمپازى (2015 ج.), 2013 جىلى «قازاقستاننىڭ ەڭ ۇزدىك تا­ۋارى» كونكۋرسىندا 3-ءشى ورىندى ەنشىلەگەن. وتاندىق تاۋار وندىرۋشىلەر اراسىندا وتكەن «حالىق ماركاسى» بايقاۋىنا قاتىسۋشى, 2015 جىلى اۋىلشارۋاشىلىق تاۋارلارىن ساتاتىن باۋىرساق دۇكەنىن اشتى. ونىڭ «ساعىپ» شارۋا قوجالىعىندا 36 ادام جۇمىس ىستەيدى. مۇندا تاۋلىك سايىن وندىرىلەتىن بيە ءسۇتىنىڭ كولەمى 1,2 توننانى قۇرايدى. رەسەيگە قىمىز تاسىمالداۋ ءۇشىن «رۋسترەيد» رەسەيلىك كومپانياسىمەن مەموراندۋمعا قول قويدى. الداعى ۋاقىتتا قىتايعا قىمىز بەن قۇرت جەتكىزۋ ءۇشىن كەلىسىمشارتقا قول قويىلماق. 2006 جىلدان 2011 جىلعا دەيىن «كۋشمانوۆا» جەكە كاسىپكەرلىگىنە باسشىلىق ەتتى. قازىرگى ۋاقىتتا «ساعىپ» شارۋا قوجالىعىنىڭ باسشىسى. «بيزنەستىڭ جول كارتاسى-2020» باعدارلاماسىنا قاتىسۋدا. تۇرمىس قۇرعان, 3 بالاسى بار. ءحوببيى: جىلقى وسىرۋمەن اينالىسادى. ەلەنا ۆلاديميروۆنا لەۆينا, جيھاز فابريكاسىنىڭ باسشىسى. 43 جاستا, ورىس, سولتۇستىك قازاقستان وبلىسىندا تۇرادى. ماسكەۋ گۋمانيتارلىق اكادەمياسىن اۋەلى «مەنەدجمەنت» ماماندىعى بويىنشا, كەيىن «يۋريسپرۋدەنتسيا» ماماندىعى بويىنشا تامامداعان. ول قايىڭ اعاشىنان جيھاز جاساپ شىعارۋمەن جانە ساتۋمەن اينالىساتىن وتباسى بيزنەسىن قۇردى. لەۆيندەردىڭ وتباسىلىق بيزنەسى جاقسى دامىپ كەلەدى. كاسىپورىندا 160 ادام جۇمىس ىستەيدى. ءونىم ەلىمىزدە كەڭىنەن تانىمال, رەسەيگە دە جەتكىزىلىپ تۇرادى, اتاقتى «يكەا» جيھاز فابريكاسىنا تاۋاردىڭ العاشقى پارتياسىن جەتكىزۋ بويىنشا كەلىسىمشارتقا قول قويىلدى. «لەۆين» كاسىپورنى كوپتەگەن رەسپۋبليكالىق جانە وبلىستىق كونكۋرستاردىڭ جەڭىمپازى. اتاپ ايتقاندا, «التىن ساپا», «قازاقستاننىڭ ۇزدىك تاۋارى», «پارىز», «جىلدىڭ ۇزدىك كاسىپكەرى». سونداي-اق, «اجار» قازاقستان ايەلدەرىن قوعامدىق مويىنداۋ ۇلتتىق سىيلىعىنىڭ لاۋرەاتى (2012, 2015 جج.). شىعارىلعان ءونىم ساپاسى ءۇشىن كومپانيا 5 مەدالمەن (3 كۇمىس, 2 قولا) ماراپاتتالعان. تۇرمىس قۇرعان, 4 بالاسى بار. ءحوببيى: پوە­زيا (ەكى ولەڭ جيناعىن شىعارعان), سۋرەت سالۋ, قولونەر, مونشاقپەن كەستەلەۋ. لاريسا سەرگەەۆنا ميتروحينا, ستۋدەنت, قازاق ءتىلى بويىنشا بايقاۋلاردىڭ جۇلدەگەرى 19 جاستا, ورىس, الماتى وبلىسىندا تۇرادى. ءى.جانسۇگىروۆ اتىنداعى جەتىسۋ مەملە­كەتتىك ۋنيۆەرسيتەتىنىڭ «ەسەپ جانە اۋديت» ماماندىعى بويىنشا 1 كۋرس ستۋدەنتى. كوكسۋ اۋىلشارۋاشىلىق كوللەدجىن بىتىرگەن. «نۇر وتان» پارتياسى جاستار قاناتىنىڭ مۇشەسى, «نۇر وتان» پارتياسى تالدىقورعان قالالىق فيليالى ساياسي مەكتەبىنىڭ 2014 جىلعى تۇلەگى. لاريسا ميتروحينا قازاق ءتىلىن دە جەتىك مەڭگەرگەن, اباي ولەڭدەرىن جاتقا وقيدى. مەكتەپ پەن كوللەدجدە وليمپيادالارعا, مانەرلەپ وقۋ بايقاۋلارىنا جانە باسقا دا مەملەكەتتىك ءتىل شارالارىنا قاتىسىپ, جۇلدەلى ورىندارعا يە بولعان. جاستار ءىسى جونىندەگى كوميتەتتىڭ مۇشەسى بولا ءجۇرىپ, لاريسا ۋنيۆەرسيتەتتىڭ قوعامدىق ومىرىنە بەلسەنە اتسالىسادى. ستۋدەنتتەر مەن قالا جۇرتشىلىعى الدىندا ءجيى ءسوز سويلەيدى. سونداي-اق, ستۋدەنتتەر اسسامبلەياسىنىڭ مۇشەسى, قازاقستان مەن باسقا ەلدەردىڭ تاريحىنا, مادەنيەتىنە, سالت-داستۇرلەرى مەن ادەت-عۇرىپتارىنا قىزىعۋشىلىق تانىتادى. لاريسا ەلگەزەك ءارى جۇرەگى جۇمساق جان. ونىڭ باستاماسىمەن ستۋدەنتتەر اراسىندا بالالار ءۇيىنىڭ تاربيەلەنۋشىلەرىنە كومەك كورسەتۋ ءۇشىن «جۇرەكتەن جۇرەككە...» قايىرىمدىلىق اكتسياسى ۇيىمداستىرىلدى. تۇرمىس قۇرماعان. ءحوببيى: سپورتپەن شۇعىلدانۋ (ۆولەيبول, باسكەتبول). مارگاريتا تاۋكەنقىزى نۇرماعانبەتوۆا, «مۇراگەر» مامانداندىرىلعان مەكتەپ-ينتەرناتىنىڭ ديرەكتورى. 42 جاستا, قازاق, قاراعاندى وبلىسىندا تۇرادى. ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتىن «حيميا» ماماندىعى بويىنشا بىتىرگەن. حيميا عىلىمدارىنىڭ كانديداتى. پروفەسسور و.ش.قۇرماناليەۆ اتىنداعى سىيلىقتىڭ لاۋرەاتى. م.نۇرماعانبەتوۆانىڭ باسشىلىعىمەن «مۇراگەر» مەكتەبى 2013-2015 جىلدارى عىلىم نەگىزدەرى بويىنشا وتكەن رەسپۋبليكالىق وليمپيادانىڭ وبلىستىق كەزەڭىندە «ۇزدىك وليمپيادالىق كوماندا» بولىپ تانىلدى. وليمپيادالىق قوزعالىسقا ادالدىعى ءۇشىن مەكتەپ «دارىن» رەسپۋبليكالىق عىلىمي-پراكتيكالىق ورتالىعىنىڭ گراموتاسىمەن ماراپاتتالدى. م.نۇرماعانبەتوۆانىڭ عىلىمي زەرتتەۋلەرىنىڭ نەگىزگى ناتيجەلەرى رەسەيلىك «جالپى حيميا», «ورگانيكالىق حيميا» جۋرنالدارىندا, سونداي-اق «Russian Jornal of General Chemistry» جۋرنالىندا جاريالاندى. جىل سايىن رەسپۋبليكالىق جانە حالىقارالىق كونفەرەنتسيالارعا قاتىسىپ تۇرادى. ەڭبەكتەرىنىڭ ءتىزىمى 70 جاريالانىمنان اسادى, ولاردىڭ ىشىندە 1 اۆتورلىق كۋالىگى دە بار. ۇل تاربيەلەپ وتىر. ءحوببيى: مۋزىكا, ءجۇزۋ, ۆولەيبول, ۇستەل تەننيسى. پەريزات ەربولاتقىزى ورالباەۆا, سەلولىق وكرۋگ اكىمى 30 جاستا, قازاق, شىعىس قازاقستان وبلىسىندا تۇرادى. شاكارىم اتىنداعى سەمەي مەملەكەتتىك ۋنيۆەرسيتەتىن «جەرگە ورنالاستىرۋ جانە جەر رەسۋرستارى» ماماندىعى بويىنشا, «كوكشە» اكادەمياسىن «زاڭگەر» ماماندىعى بويىنشا تامامداعان. ەڭبەك جولىن «اياگوز اۋدانىنىڭ جەر قاتىناستارى ءبولىمى» مەملەكەتتىك مەكەمەسىندە باس مامان بولىپ باستاعان. كەيىن ءۇرجار اۋداندىق ستاتيستيكا ءبولىمىنىڭ جەتەكشى مامانى, 2013 جىلدىڭ قازانىنان اقتوعاي كەنتى اكىمىنىڭ ورىنباسارى قىزمەتتەرىن اتقارعان. 2014 جىلدىڭ شىلدەسىنەن باستاپ بۇگىنگى كۇنگە دەيىن شىعىس قازاقستان وبلىسى جارما اۋدانى ۇشبيىك سەلولىق وكرۋگىنىڭ اكىمى بولىپ تابىلادى. اكىم لاۋازىمىندا جۇمىس ىستەگەننەن بەرى 2014 جىلى اۋىلدىق كلۋبتىڭ اعىمداعى جوندەۋى, 2015 جىلى سۋ قۇبىرلارى جۇرگىزىلىپ, كوشە جارىقتاندىرىلدى. بىلىكتى باسشى بەدەلىنە, جوعارى ۇيىمداستىرۋشىلىق ءارى كوشباسشىلىق قاسيەتتەرگە يە, اۋىل تۇرعىندارىنىڭ قۇرمەتىنە بولەنگەن جان. تۇرمىس قۇرعان, 1 ۇل تاربيەلەپ وتىر. ءحوببيى: كىتاپ وقۋ, شاحمات ويناۋ, ۆولەيبول جانە باسكەتبول. شولپان ۆيكتورقىزى سىزدىقوۆا, «دەلوۆوي مير استانا» باسپاسىنىڭ ديرەكتورى, باس رەداكتورى. 39 جاستا, قازاق, استانا قالاسىندا تۇرادى. «وتباسىم» جۋرنالىنىڭ باس رەداكتورى, «وتباسىم» ۇلتتىق قۇندىلىقتار ورتالىعىنىڭ ءتورايىمى. قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ حاتشىسى بولىپ تابىلادى. وتاندىق كىتاپ باسىپ شىعارۋ يندۋسترياسىن دامىتۋعا ايتارلىقتاي ۇلەس قوسىپ كەلەدى. ونىڭ باسشىلىعىمەن 130-دان اسا كىتاپتار باسىلىپ شىعارىلدى. ولاردىڭ تۇساۋكەسەر راسىمدەرى حالىقارالىق كورمەلەر مەن قازاقستاننىڭ شەتەلدەگى ەلشىلىكتەرىندە وتكىزىلدى. ولاردىڭ ىشىندە: قازاقستان رەسپۋبليكاسى تۇڭعىش پرەزيدەنتىنىڭ 1991-2014 جىلدارداعى قىزمەت حرونيكاسى (20 تومدىق), «جاڭا قازاقستان» سەرياسى (12 كىتاپ), ەكى تىلدەگى «ن.ءا.نازارباەۆتىڭ ءومىربايانى», «ماڭگىلىك ەل», «نۇرلى جول – بولاشاققا باس­تار جول», «2050 ستراتەگياسى» ءۇش تومدىعى جانە باسقالارى بار. «ەرەن ەڭبەگى ءۇشىن» مەدالىمەن, قازاقستان رەسپۋبليكاسىنىڭ تاۋەلسىزدىگىنە 10 جىل» مەرەيتويلىق مەدالىمەن, «كىتاپ مادەنيەتىنە قوسقان زور ۇلەسى ءۇشىن» جانە «اقپارات سالاسىنىڭ ۇزدىگى» ۆەدومستۆولىق مەدالدارىمەن ماراپاتتالعان. تۇرمىس قۇرعان, 4 بالاسى بار. ءحوببيى: كىتاپ وقۋ, سۋرەت سالۋ, قازاقستاندىق پوشتا ماركالارى مەن مونەتالار كوللەكتسياسىن جيناۋشى. ءدىنزۋحرا نۇرعيساقىزى تىلەنديەۆا, اكتريسا, وركەستردىڭ باس ديريجەرى. 31 جاستا, قازاق, الماتى قالاسىندا تۇرادى. قۇرمانعازى اتىنداعى قازاق ۇلتتىق كونسەرۆاتورياسىنىڭ سيمفونيالىق وركەستر ديريجەرى فاكۋلتەتىن تامامداعان. «وتىرار سازى» مەملەكەتتىك اكادەميالىق فولكلورلىق-ەتنوگرافيالىق وركەسترىنىڭ ديريجەرى بولىپ جۇمىس ىستەيدى, قازاقستان رەسپۋبليكاسىنىڭ ەڭبەك سىڭىرگەن قايراتكەرى. كسرو حالىق ءارتىسى, دارىندى كومپوزيتور نۇرعيسا تىلەنديەۆتىڭ قىزى. ءدىنزۋحرا – تمد-داعى ەڭ جاس ديريجەر قىز. جاستايىنان مۋزىكامەن اۋەستەنگەن. اكەسى جازعان 500-دەن استام تۋىندىنى جاتقا بىلەدى ءارى كوپتەگەن قازاق ۇلتتىق اسپاپتارىندا ويناي الادى. ءدىنزۋحرا 4-سىنىپتا ءجۇرىپ-اق «وتىرار سازى» وركەسترىمەن بىرگە موتسارتتىڭ 8-ءشى كونتسەرتىن تاماشا ورىنداپ شىققان. ول كەزدەرى بۇل وركەسترگە نۇرعيسا تىلەنديەۆتىڭ ءوزى ديريجەرلىك ەتەتىن. 2009 جىلدىڭ شىلدەسىنەن باستاپ ءدىنزۋحرا نۇرعيساقىزى «وتىرار سازى» مەملەكەتتىك اكادەميالىق فولكلورلىق-ەتنوگرافيالىق وركەسترىنىڭ باس ديريجەرى بولىپ تابىلادى. تۇرمىس قۇرعان, 1 قىز تاربيەلەپ وتىر. ءحوببيى: ات سپورتى, اسپازدىق. التىناي قانادىلقىزى توقپانوۆا, كوپ بالالى انا. 41 جاستا, قازاق, جامبىل وبلىسىندا تۇرادى. «كۇمىس القا» يەگەرى, «التىن القامەن» ماراپاتتاۋعا ۇسىنىلعان. التىناي قازىرگى ۋاقىتتا ءۇي شارۋاسىمەن جانە 7 بالانى تاربيەلەۋمەن اينالىسادى. ۇلگىلى وتباسىنىڭ وتاناسى. مەكتەپ جاسىنداعى 4 بالاسى «وتە جاقسى» جانە «جاقسى» وقيدى. ءتۇرلى بايقاۋلارعا قاتىسادى. سپورتتىق جارىستاردىڭ جۇلدەگەرلەرى. 3 بالاسى بالاباقشاعا بارىپ ءجۇر. جۇبايى جامبىل تەمىرجول بولىمشەسىندە پويىز ديسپەتچەرى بولىپ جۇمىس ىستەيدى. تەمىرجول سالاسىنداعى جالپى ەڭبەك ءوتىلى 16 جىل. التىنايدىڭ ايتۋىنشا, ولاردىڭ وتباسىندا تەمىرجولشىلار اۋلەتى قالىپتاسىپ كەلەدى, سەبەبى, ول ءوزى مەن جۇبايى ەكەۋى عانا ەمەس, وعان قوسا, قايىن اعاسى دا بالالارىمەن وسى سالادا ەڭبەك ەتەدى ەكەن. سونىمەن قاتار, ونىڭ اكەسى 30 جىلدان استام ۋاقىت قازاقستان تەمىرجولىندا جۇمىس ىستەپتى. وتباسىنىڭ كوپ بالالى بولۋ ءداستۇرى دە ۇرپاقتان ۇرپاققا جالعاسىپ كەلەدى. التىنايدىڭ قايىن ەنەسى دە 10 بالا تاۋىپ وسىرگەن باتىر انا بولىپ تابىلادى. ءحوببيى: بي, اسپازدىق, كىتاپ وقۋ, اعىلشىن ءتىلى. جازيرا ابدىراحمانقىزى جاپپارقۇل, اۋىر اتلەتشى, قازاقستان رەسپۋبليكاسىنىڭ ەڭبەك سىڭىرگەن سپورت شەبەرى. 23 جاستا, قازاق, وڭتۇستىك قازاقستان وبلىسىندا تۇرادى. شىمكەنتتەگى م.اۋەزوۆ اتىنداعى مەملەكەتتىك ۋنيۆەرسيتەتتىڭ دەنە شىنىقتىرۋ جانە سپورت فاكۋلتەتىنىڭ 2-كۋرسىندا وقيدى. كوپ بالالى وتباسىندا تۋعان. بالا كەزىندە فۋتبول ويناۋدى جاقسى كورەدى ەكەن. 8 جاسىنان باس­تاپ زىلتەمىر كوتەرۋمەن اۋەستەنگەن. 2010 جىلى العاشقى زور جەتىستىكتەرىن كورسەتە باستادى. ازيانىڭ جاسوسپىرىمدەر چەمپيوناتىندا 2-ءشى ورىندى يەلەندى. وسى جىلى ول جاسوسپىرىمدەر وليمپياداسىنىڭ چەمپيونى اتاندى. 69 كيلوعا دەيىنگى ساناتتا جاسوسپىرىمدەر اراسىندا 2012 جىلعى الەم چەمپيونى, الماتى جانە حيۋستون قالالارىنداعى (2014) الەم چەمپيوناتىنىڭ ەكى مارتە كۇمىس جۇلدەگەرى. قازىرگى ۋاقىتتا شىمكەنت قالاسىندا تۇرىپ, جاتتىعۋدا. تۇرمىس قۇرماعان. ءحوببيى: مۋزىكا, سالت اتپەن ءجۇرۋ.