قازاقستاندا «تاعا» ەسكەرتكىش مونەتالارى اينالىمعا شىقتى

الماتى. 4 ناۋرىز. ۇلتتىق بانك 2016 جىلعى 4 ناۋرىزدان باستاپ «سيقىرلى نىشاندار» مونەتالار سەرياسىنان proof ساپالى كۇمىستەن نومينالى 100 تەڭگەلىك «تاعا» ەسكەرتكىش كۇمىس مونەتاسىن اينالىمعا شىعاردى. بۇل تۋرالى ۇلتتىق بانكتىڭ باسپاسوز قىزمەتىنە سىلتەمە جاساعان egemen.kz ءتىلشىسى حابارلادى. مونەتانىڭ بەت جاعىنىڭ (اۆەرسىندە) ورتالىق بولىگىندە مونەتانىڭ نومينالىن بىلدىرەتىن «100 تەڭگە» دەگەن جازۋ جانە مونەتا دايىندالعان مەتالدى, ونىڭ سىنامى مەن ماسساسىن بىلدىرەتىن Ag 925 31.1 g دەگەن جازۋ بار. جازۋلاردى اينالدىرا ۇلتتىق ورنەك سالىنعان, مەملەكەتتىك تىلدە «قازاقستان ۇلتتىق بانكى»,  اعىلشىن تىلىندە NATIONAL BANK OF KAZAKHSTAN دەپ جازىلعان جانە مونشاق تارىزدەس تىزبەك جۇرگىزىلگەن. مونەتانىڭ جوعارعى بولىگىندە ستيلدەندىرىلگەن تاعانىڭ ۇشىندا ۇلتتىق بانكتىڭ لوگوتيپى جانە قازاقستان تەڭگە سارايىنىڭ تاۋار بەلگىسى ورنالاسقان. مونەتانىڭ سىرت جاعىندا (رەۆەرسىندە) التىن جالاتىلعان تاعا بەينەسى ورناتىلعان, ورتاسىندا سپيرال ورنالاسقان, ونى اينالدىرا اعىلشىن تىلىندە FOR LUCK, مەملەكەتتىك تىلدە «ىسكە ءسات» جانە ورىس تىلىندە «نا سچاستە» دەگەن جازۋلار بار. جوعارعى بولىگىندە سوعىلعان جىلىن بىلدىرەتىن «2016» دەگەن سان بەرىلگەن. مونەتالاردىڭ بەت جانە سىرت جاقتارىنداعى بەينەلەر مەن جازبالار بەدەرلەنگەن. قىرى تەگىس, بەدەرسىز جانە جازبالارسىز. مونەتا 925 سىنامدى كۇمىستەن دايىندالعان, ماسساسى – 31,1 گرامم, سيپاتتالعان دوڭگەلەك ديامەترى – 38,61 ميلليمەتر,  دايىنداۋ ساپاسى – proof, ەڭ كوپ تارالىمى – 6 مىڭ دانا. نومينالدىق قۇنى 100 تەڭگەلىك ەسكەرتكىش مونەتالار قازاقستان رەسپۋبليكاسىنىڭ بۇكىل اۋماعىندا كورسەتىلگەن قۇنىمەن تولەمنىڭ بارلىق تۇرلەرى بويىنشا, سونداي-اق, بانك شوتتارىنا ەسەپتەۋ ءۇشىن جانە اۋدارىم جاساۋ ءۇشىن قابىلدانۋعا مىندەتتى, قازاقستان رەسپۋبليكاسىنىڭ بارلىق بانكتەرىندە شەكتەۋسىز ۇساقتالادى جانە ايىرباستالادى. «سيقىرلى نىشاندار» مونەتالار سەرياسىنان نومينالى 100 تەڭگەلىك «تاعا» ەسكەرتكىش كۇمىس مونەتالارى قازاقستان رەسپۋبليكاسىنىڭ ۇلتتىق بانكى, SKARBIEC KORONNY SA اكتسيونەرلىك قوعامى جانە «قازاقستان رەسپۋبليكاسى ۇلتتىق بانكىنىڭ قازاقستان تەڭگە سارايى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنى اراسىنداعى مونەتالار شىعارۋ جانە ساتۋ تۋرالى كەلىسىمگە سايكەس دايىندالدى. Proof ساپاسىمەن جاسالعان ەسكەرتكىش كۇمىس مونەتالار كوللەكتسيالىق قۇنى بويىنشا ساتۋعا ارنالعان. ولار كادەسىيلىق وراۋمەن شىعارىلادى جانە ۇلتتىق بانكتىڭ مەملەكەتتىك, ورىس جانە اعىلشىن تىلدەرىندەگى نومىرلىك ساپا سەرتيفيكاتىمەن جابدىقتالعان. تالعات ءسۇيىنباي. دەرەك, سۋرەت: ۇلتتىق بانكتىڭ ءباسپاسوز قىزمەتى.