«دارا كۇندەرىمنىڭ, نالا تۇندەرىمنىڭ, سەرىگى بولعانىڭ ءۇشىن, سەنىمى بولعانىڭ ءۇشىن, مەن سەنى ايالايمىن» دەپ قازاق پوەزياسىنا ادالدىعىنان تانباعان اقىن فاريزا وڭعارسىنوۆانىڭ ەسكەرتكىشى سومداۋ كونكۋرس ارقىلى تاڭدالدى. قازاقستان جوبالاۋشىلار ۇلتتىق قاۋىمداستىعىنىڭ ۆيتسە-پرەزيدەنتى, قازاقستان رەسپۋبليكاسىنىڭ ەڭبەك سىڭىرگەن ساۋلەتشىسى سەرىك رۇستامبەكوۆتىڭ ايتۋىنشا, كونكۋرسقا اقىننىڭ بەينەسى سومدالعان 12 جوبا ۇسىنىلعان. ونىڭ ىشىندە اقىننىڭ وتىرعان بەينەسى سومدالعان نۇسقا دا بولىپتى.
ارنايى كوميسسيانىڭ مۇشەلەرى بۇگىن تۇعىرعا ورناتىلعان نۇسقاسىنا تاڭداۋ جاساپتى. ەسكەرتكىش قولادان قۇيىلعان, تۇعىرىنىڭ بيىكتىگى – 4 مەتر 50 سم, ال اقىن بەينەسىنىڭ بيىكتىگى 4 مەتر 10 سم. تۇعىردىڭ سەگىز قابىرعاسى بار, ونىڭ بىرىندە اقىننىڭ اتى-ءجونى, قالعان جەتەۋىندە پوەزيا پاديشاسىنىڭ ولەڭدەرىنەن ءبىر شۋماقتان جازىلعان. «اقىننىڭ تۋىستارىمەن دە اقىلداستىق. ولار ءبىزدىڭ شەبەرحانامىزدا بولىپ, شاش ۇلگىسىنە قاتىستى ءوز ويلارىمەن ءبولىستى. ءمۇسىندى مۇرات مانسۇروۆ جاسادى.
اقىننىڭ شابىتتانىپ, جاڭا جىر جازۋعا ۇمتىلىپ تۇرعانىن بەينەلەدىك» – دەيدى ساۋلەتشى سەرىك رۇستامبەكوۆ. اقىن ەسكەرتكىشى اتىراۋ قالاسىنداعى قازاق عىلىمىنىڭ زاڭعار تۇلعاسى قانىش ساتباەۆ داڭعىلىندا بوي كوتەردى. ونىڭ اشىلۋىنا اتىراۋ وبلىسىنىڭ اكىمى باقتىقوجا ىزمۇحامبەتوۆ, ءوڭىردىڭ زيالى قاۋىم وكىلدەرى, اقىننىڭ تۋىستارى مەن جاستار بۋىنى قاتىستى.
«فاريزا وڭعارسىنوۆا تەك پوەزيانىڭ ءدۇلدۇل تۇلعاسى عانا ەمەس, سونىمەن بىرگە, ەلىمىزدىڭ تاۋەلسىزدىگىن نىعايتۋعا ءوز ۇلەسىن قوسقان مەملەكەت جانە قوعام قايراتكەرلىگىمەن تانىلدى», – دەدى اقىن ەسكەرتكىشىنىڭ اشىلۋ سالتاناتىندا وبلىس اكىمى باقتىقوجا ىزمۇحامبەتوۆ.
بۇگىنگى قازاق پروزاسىنىڭ تانىمال وكىلى, جازۋشى-دراماتۋرگ راحىمجان وتارباەۆ «كوپ ەلدى ارالاي جۇرەمىز. سول كەزدە قانداي تۇلعالارى بار, قانداي مادەنيەتى, قانداي ەسكەرتكىشتەرى بار؟» دەگەندى وي ەلەگىنەن وتكىزەمىز. ەلىمىزدىڭ مادەنيەتىنە قوسىلار تاڭداۋلى ەسكەرتكىشتەر – جۇمەكەن ناجىمەدەنوۆ پەن فاريزا وڭعارسىنوۆانىڭ بەينەلەرى اتىراۋدا بوي كوتەردى. فاريزا وڭعارسىنوۆا مىنەزدى اقىن ەدى.
ونىڭ مىنەزى پوەزياسىندا دا انىق بايقالىپ تۇراتىن», – دەدى. فاريزا وڭعارسىنوۆانىڭ ەسكەرتكىشىنىڭ اق جامىلعىسىن وبلىس اكىمى باقتىقوجا ىزمۇحامبەتوۆ پەن ەڭبەك ارداگەرى مەلليات سابىروۆا اشتى. اقىننىڭ تۋىستارى اتىنان ايبەك پەن الماگۇل وڭعارسىنوۆالار ءوز ويلارىمەن ءبولىسىپ, ەسكەرتكىشتىڭ كوڭىلدەن شىققانىنا توقتالدى. اقىن جىرلارى وقىلىپ, سوزىنە جازىلعان اندەرى شىرقالىپ تۇردى.
جولداسبەك شوپەعۇل.
دەرەك: egemen.kz. سۋرەتتەر: راحىم قويلىباەۆ.
