كەشە ەلىمىزدىڭ بارلىق وڭىرىندە قازاقستاندىقتار العىس ايتۋ كۇنىن العاش رەت كەڭ كولەمدە ءسان-سالتاناتىمەن اتاپ ءوتتى. ءسويتىپ, بۇل كۇن ەندى ەلىمىزدەگى وزگە دە مەرەكەلەر قاتارىنان لايىقتى ورنىن الدى.
الاقاي قۋانىشتارعا تولى كۇن
اقمولا وبلىسىنىڭ اكىمى سەرگەي كۋلاگين دوستىق ۇيىندە العىس كۇنىنە ارنالعان شارالارعا قاتىسىپ, جۇرتشىلىقتى ىزگى مەرەكەمەن قۇتتىقتادى. شارا بارىسىندا ءوڭىر باسشىسى ەتنومادەني بىرلەستىكتەر دايىنداعان «قازاق ەلىنە تاعزىم» كورمەسىن تاماشالاپ, «التىن القا», «كۇمىس القا» مەدالدارىن تاپسىردى. سونداي-اق, كوپ بالالى وتباسىلارىنا سىيلىقتار ۇسىندى. بۇعان قوسا, 1 ناۋرىز كۇنى تاڭەرتەڭ تۋعان سابيلەردىڭ اتا-انالارىنا گۇل شوقتارىن سىيلادى.
وبلىس اكىمىنىڭ ورىنباسارى نۇرلان نۇركەنوۆ پەن ەلىمىزگە بەلگىلى مەتسەنات بولات وتەمۇراتوۆتىڭ «اسىل ميراس» قايىرىمدىلىق قورىنىڭ ديرەكتورى مارات ايتماعامبەتوۆپەن بىرگە كوكشەتاۋداعى مۇگەدەك بالالاردىڭ مەديتسينالىق-الەۋمەتتىك ساۋىقتىرۋ مەكەمەسىندە بولىپ, قور اتىنان ۇجىمعا اۆتوبۋس, ويىن الاڭىن جانە مەديتسينالىق جابدىقتار تاپسىردى.
ءدال وسىنداي شاتتىق شاراسى بۋراباي اۋدانىنىڭ ورتالىعى – ششۋچە قالاسىنداعى «سابيلەر ۇيىندە» دە وتكىزىلىپ, مەكەمەگە «اسىل ميراس» قورى مەن «Rixos Borovoe» بەس جۇلدىزدى قوناق ءۇيىنىڭ اتىنان شاعىن اۆتوبۋس پەن مەديتسينالىق جابدىقتار سىيعا بەرىلدى.
«اسىل ميراس» قورىنىڭ ديرەكتورى مارات ايتماعامبەتوۆ بۇل قارجىنىڭ 2015 جىلعى 30 تامىزدا «Rixos Borovoe» قوناق ۇيىندە وتكىزىلگەن قايىرىمدىلىق اكتسياسى شاراسىندا جينالعانىن جانە مۇنداي قولداۋ جۋىق كۇندەردە قىزىلوردا قالاسىنداعى ەكى بىردەي الەۋمەتتىك نىسان ۇجىمىنا دا كورسەتىلەتىنىن ايتتى.
باقبەرگەن امالبەك,
«ەگەمەن قازاقستان».
اقمولا وبلىسى.
سۋرەتتى تۇسىرگەن
ەرمۇرات دوسىموۆ.
قولتاڭبالارىن قالدىردى
كەشە قاراعاندى قالاسىندا وبلىستىڭ بەلگىلى سپورتشىلارى «العىس كىتابىنا» وزدەرىنىڭ قولتاڭبالارىن قالدىردى. بۇل يگى شارا ەلىمىزدە تۇڭعىش اتاپ وتىلگەن العىس ايتۋ كۇنى مەرەكەسىنە ارنالدى.
اق جۇرەكتەن العىس ايتقانداردىڭ قاتارىندا قازاق كسر-ءىنىڭ ەڭبەك سىڭىرگەن جاتتىقتىرۋشىسى, اتاقتى اباي بوكس مەكتەبىنىڭ نەگىزىن قالاۋشى اندرەي رايش, ميۋنحەندە وتكەن حح وليمپيا ويىندارىنا قاتىسۋشى ۆەلوشاباندوز اناتولي ستەپانەنكو, افينا وليمپياداسىنىڭ قولا ءجۇلدەگەرلەرى – بوكسشى سەرىك ەلەۋوۆ پەن جەڭىل اتلەت دميتري كارپوۆ جانە جاس تالانت, جاسوسپىرىمدەر اراسىنداعى وليمپيادا چەمپيونى ابىلايحان ءجۇسىپوۆ اتالعان كىتاپقا سپورت جاناشىرى, ەلىمىزدىڭ تۇڭعىش پرەزيدەنتى نۇرسۇلتان نازارباەۆقا دەگەن العىس سەزىمدەرىن جازىپ قالدىردى.
1 ناۋرىز – العىس ايتۋ كۇنىندە باستالعان ەستافەتانى ءوڭىردىڭ باسقا دا سپورتشىلارى جالعاستىرماق. بۇل ءۇردىس قازاقستان رەسپۋبليكاسى تاۋەلسىزدىگىنىڭ 25 جىلدىق مەرەيتويى اتاپ وتىلەتىن 16 جەلتوقسانعا دەيىن جالعاساتىن بولادى.
قايرات ءابىلدينوۆ,
«ەگەمەن قازاقستان».
قاراعاندى.
ىنتىماقتاستىقتىڭ ىستىق ىقىلاسى
وبلىس ورتالىعىنداعى قازاقستان حالقى اسسامبلەياسى عيماراتىندا 1 ناۋرىز – العىس ايتۋ كۇنىنە ارنالعان «قازاق ەلىنە تاعزىم» اتتى سالتاناتتى شارا ءوتتى. شاراعا وبلىستىق جانە قالالىق اكىمدىكتەردىڭ, ساياسي پارتيالاردىڭ وكىلدەرى, قازاقستان حالقى اسسامبلەياسىنىڭ مۇشەلەرى, وبلىستىق ەتنومادەني بىرلەستىكتەردىڭ, وبلىستىق جانە قالالىق مەكەمەلەردىڭ باسشىلارى, ستۋدەنت جاستار قاتىستى.
شارادا الدىمەن «مەنى قازاقستانعا اكەلگەن جول» اتتى قازاق جەرىنە ءتۇرلى ۇلتتار مەن ۇلىستار وكىلدەرىنىڭ كوشۋ تاريحىنىڭ مۇراعاتتىق قۇجاتتارى مەن ماتەريالدارىنىڭ كورمەسى اشىلدى. مەرەكەلىك شاراعا قاتىسۋشىلار قيىن كەزەڭدە وڭىرگە اتباسىن تىرەگەن ۇلتتاردىڭ مۇندا قالاي تۇراقتاعاندارى تۋرالى ماعلۇماتتارعا قانىعىپ, سارعايعان سۋرەتتەردەن سول كەزدىڭ ءومىر شىندىعىن كوز الدارىنا ەلەستەتتى دەسە بولعانداي. سونداي-اق, قۋعىن-سۇرگىن جىلدارى, ودان كەيىنگى كەزەڭدەردە جەر اۋدارىلعان ۇلتتار وكىلدەرىنىڭ بۇگىنگى ۇرپاقتارىنىڭ ەستەلىكتەرى مەن قازاق حالقىنا دەگەن العىس سەزىمى باياندالعان بەينەفيلم كورسەتىلدى.
العىس ايتۋ كۇنىنە ارنالعان سالتاناتتى جيىندى وبلىس اكىمى بەردىبەك ساپارباەۆ قىسقاشا ءسوز سويلەپ اشىپ, ەلباسى نۇرسۇلتان نازارباەۆتىڭ ۇلتارالىق قاتىناسقا سەلكەۋ تۇسپەۋىن ۇدايى نازاردا ۇستاپ, ايرىقشا ماڭىز بەرەتىنىنە توقتالدى. سونىڭ ايقىن كورىنىسى وزگە مەملەكەتتەردە جوق قازاقستان حالقى اسسامبلەياسى بولسا, ال ەلباسى جارلىعىمەن بەكىتىلگەن 1 ناۋرىز – العىس ايتۋ كۇنى وسى يگىلىكتى ءىستىڭ جۇيەلى جالعاسى ەكەنىن اتاپ ءوتتى. ول قازاق حالقىنىڭ قانداي قيىن جاعدايدا دا تاعدىردىڭ جازۋىمەن ەلگە كەلگەن ۇلتتار مەن ۇلىستارعا دوستىق قۇشاعىن ايقارا اشىپ, باۋىرىنا تارتقانىن, بارىمەن ءبولىسىپ, جۇرەك جىلۋىن بەرگەنىن تىلگە تيەك ەتە كەلىپ, وسى ىستىق ىقىلاسقا ءبولەنگەن وزگە ۇلت وكىلدەرىنىڭ ونى ەشقاشان ۇمىتپايتىنىن جادىدا جاڭعىرتتى. وسىنداي ىزگىلىكتەن تامىر تارتقان ەلىمىزدەگى تاتۋلىق پەن تۇراقتىلىق, بەرەكە-بىرلىك ەڭ باستى قۇندىلىعىمىز ەكەنىن جەتكىزدى. بىزدەگى قازاقستان حالقى اسسامبلەياسىنىڭ جۇمىس تاجىريبەسىن وزگە ەلدەردىڭ ونەگە تۇتىپ جاتقانىن دا اتاپ ءوتتى. ءوڭىردى مەكەندەيتىن 90-نان استام ۇلت وكىلدەرىنىڭ تاتۋلىعى مەن بىرلىگى نىعايا بەرەتىنىنە سەنىم ءبىلدىردى.
العىس ايتۋ كۇنى اياسىندا ءوڭىردەگى ەتنومادەني بىرلەستىكتەردىڭ قاتىسۋىمەن «ىنتىماعى جاراسقان قازاقستان» اتتى وبلىستىق ۇلتتار دوستىعى فەستيۆالى وتكىزىلدى.
العىس ايتۋ كۇنىنىڭ ەل تاۋەلسىزدىگىنىڭ 25 جىلدىق مەرەيتويى قارساڭىندا تۇڭعىش رەت تويلانۋى دا جاقسى نىشان بولىپ تابىلادى. سوعان وراي, وبلىس اۋماعىندا 50 مىڭعا جۋىق ادامنىڭ قاتىسۋىمەن 200 شارا ۇيىمداستىرىلدى. بارلىق اۋدانداردا قازاقستاندىق ءبىرەگەيلىك پەن ەل بىرلىگىن بەينەلەيتىن مەرەكەلىك شارالار وتكىزىلدى. بارلىق ءبىلىم بەرۋ مەكەمەلەرىندە «العىسىمىز شەكسىز» تاقىرىبىندا بالالار شىعارماشىلىعىنان سۋرەت كورمەلەرى ۇيىمداستىرىلدى. سونىمەن قاتار, اقتوبە قالاسى مەن اۋداندار ورتالىقتارىندا جاستاردىڭ قاتىسۋىمەن «مەن العىس ايتامىن!» اتتى فلەش-موب وتكىزىلدى. «باتامەن ەر كوگەرەدى», «العىس العان ارىماس» دەگەن تامسىلدەردى اتام قازاق تەگىن ايتپاسا كەرەك. العىس ايتۋ كۇنگى شارالار ەلىمىزدىڭ ەڭ باستى قۇندىلىعى – تۇراقتىلىق پەن ءوزارا تاتۋلىقتى, بەرەكە-بىرلىكتى نىعايتا تۇسكەنى ءسوزسىز.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.
اقجارما تىلەك اقتارىلدى
العىس ايتۋ كۇنى سىر وڭىرىندە كەڭ كولەمدە تويلاندى. ادامدار ءبىر-بىرىنە اقجارما تىلەگىن اقتارىپ, جۇرتشىلىق جاقسىلىق جاساۋعا, قامقورلىق تانىتۋعا اسىقتى. ايماق شەڭبەرىندە ءىس-شارالار ءوتىپ, حالىقتىق دەڭگەيدە اتاپ ءوتتى.
العىس ايتۋ كۇنىن مەرەكەلەۋگە ارنالعان سالتاناتتى ءىس-شارالاردىڭ ءبىرتۇتاس يدەيالىق-اقپاراتتىق الەۋمەتتىك ماڭىزدى ءمان-مازمۇنىن قامتاماسىز ەتۋ ماقساتىندا وبلىستىڭ ءبىلىم بەرۋ ۇيىمدارىندا ونكۇندىك جاريالاندى. 25 اقپان مەن 1 ناۋرىز كۇندەرى ارالىعىندا وبلىستىق ءىس-شارا جوسپارىنا سايكەس بارلىق ءبىلىم بەرۋ ۇيىمدارىندا وبلىستاعى ەتنوس ورتالىعى وكىلدەرىنىڭ قاتىسۋىمەن العىس ايتۋ تاقىرىبىنا ارنالعان «العىس ايتۋ – پارىزىم» تاربيە ساعاتتارى, سالتاناتتى جيىندار جانە «مەن العىس ايتامىن!» قوناقجاي قازاق حالقىنا تاعزىم ۇلگىسى ءوتتى. جالپى جانە ورتا ءبىلىم بەرۋ ۇيىمدارىندا دۋلات يسابەكوۆتىڭ «ءبىر اتانىڭ بالالارى» اڭگىمەسى جەلىسىندە پىكىرلەسۋ, « ۇلى دالا توسىندە – ۇلى مەرەكە» سۋرەت كورمەسى, «جاقسى ءسوز – جىلى تىلەك» ترەنينگتەرى, «مەن ريزامىن بارىنە» ءان بايقاۋى, «سىيلاسۋ سالەمنەن باستالادى» اتتى دوڭگەلەك ۇستەلدەر ۇيىمداستىرىلدى. مەكتەپكە دەيىنگى ءبىلىم بەرۋ ۇيىمدارىندا «انالارعا مىڭ العىس» تاقىرىبىندا سۋرەت سالۋ بايقاۋى وتكىزىلدى.
سونىمەن قاتار, تەحنيكالىق جانە كاسىپتىك وقۋ ورىندارىندا ونكۇندىك اياسىندا «تاعدىرىن تاريح توعىستىرعان» ادەبي-مۋزىكالىق كەش, «ءجۇزى باسقا – جۇرەگى ءبىر, ءتىلى باسقا – تىلەگى ءبىر» اتتى ەتنومادەني بىرلەستىكتەر وكىلدەرىمەن كەزدەسۋ, «انالارعا قۇرمەت – ادامزاتقا ىزەت» تاربيە ساعاتتارى, «بىرلىكتى تۋ ەتكەن انالارعا مىڭ العىس» رۋحاني-تانىمدىق شارالار, «دوستىق – ەل تىرەگى» كوركەمسوز وقۋ شەبەرلەرىنىڭ سايىسى, «ماقتانىشىم – ماڭگىلىك ۇلى وتان» پاتريوتتىق اندەر بايقاۋى, «قازاقستان – ورتاق ءۇيىمىز» تاقىرىبىندا ءۇش تىلدە شىعارمالار بايقاۋى وتكىزىلدى. اتالعان شارالارعا العىس ايتۋ فيلوسوفياسىنىڭ ءمانىن اشۋ ماقساتىندا ەتنومادەني بىرلەستىكتەرىنىڭ, ءدىن وكىلدەرى, قوعام قايراتكەرلەرى, عالىمدار, ونەگەلى وتباسىلار جانە ەل اعالارى شاقىرىلدى. وتباسى ۇلگىسىندەگى بالالار اۋىلىندا 1 ناۋرىز – العىس ايتۋ مەرەكەسىنە وراي «مىڭ العىس ايتامىز» تاقىرىبىندا اشىق ەسىك كۇنى وتكىزىلدى. وبلىستىڭ بارلىق ءبىلىم بەرۋ ۇيىمدارىندا ۇستازدارعا ريزاشىلىقتارىن ءبىلدىرۋ ماقساتىندا «ۇستازىما راحمەت!» اشىق حاتتار, پلاكاتتار سايىسى جانە ادەبي-مۋزىكالىق كەش ۇيىمداستىرىلدى. سونداي-اق, تەحنيكالىق جانە كاسىپتىك ءبىلىم بەرۋ ۇيىمدارىندا از قامتاماسىز ەتىلگەن وتباسى بالالارىنا ارنالعان مەرەكەلىك داستارقان جايىلدى.
وسىنداي ءماندى شارانىڭ ءبىرى اسقار توقماعامبەتوۆ اتىنداعى مادەنيەت ۇيىندە ءوتتى. «ىقىلاس, پەيىل ايقۇشاق» اتتى مەرەكەلىك شارا شات-شادىمان كوڭىل-كۇيدە ءوتتى. «ماڭگىلىك ەل» جالپىۇلتتىق پاتريوتتىق يدەياسىنىڭ, قازاقستاندىق بىرەگەيلىكتىڭ نەگىزگى ارقاۋى – ەلىمىزدەگى بارلىق ۇلت پەن ۇلىستى ءبىر شاڭىراق استىنا توپتاستىرعان تۇتاستىق تۋىن دارىپتەگەن جيىن ەلگە ەرەكشە اسەر سىيلادى.
شارا بارىسىندا قىزىلوردا قالاسى اكىمىنىڭ ورىنباسارى ايدىن قايروللاەۆ پەن كورەي ۇلتتىق بىرلەستىگىنىڭ اقساقالى ۆيلوري شين ايتۋلى مەرەكەمەن حالىقتى قۇتتىقتاپ, ەلدىك پەن بىرلىك تۇرعىسىندا اڭگىمەلەدى.
ەرجان بايتىلەس,
«ەگەمەن قازاقستان».
قىزىلوردا وبلىسى.
قازاقستان – باقىت مەكەنى
قانداي زامان, قانداي قوعام بولسا دا العىس ايتۋ العا باستايدى. ەلدىڭ العىسىنا بولەنۋدەن ارتىق باقىت جوق. سودان بولار, جامبىلدىقتار العىس ايتۋ كۇنىن ەرەكشە اتاپ ءوتتى.
بۇل كۇنى تاراز قالاسىنداعى ورتالىق الاڭدا «قازاقستان – باقىت مەكەنى» اتتى مەرەكەلىك ءىس-شارا ۇيىمداستىرىلىپ, ءبىر كەزدەرى وزگە ۇلت وكىلدەرىنىڭ قازاق جەرىنە قالاي قونىس تەپكەندەرى, ولاردى ەلدىڭ ىستىق ىقىلاسپەن قارسى العانى تۋرالى كورىنىستەر وتە كەرەمەت ساحنالاندى. بۇگىندە قازاقستاندى ءوز وتانى رەتىندە سانايتىن بۇل ۇلت وكىلدەرى ەلگە راحمەتتەرىن ايتىپ, العىستارىن ءبىلدىردى.
– مەن – ءبىر كەزدەرى وسى قازاقستانعا رەپرەسسيالانعان وتباسىنىڭ ۇرپاعىمىن. ۇلتىم – نەمىس. راس, ۇلى وتان سوعىسى جىلدارى نەمىس ۇلتىنا دەگەن باسقاشا كوزقاراس بولدى. ايتسە دە ءبىزدى قازاق ەلى جاتىرقاماي, قۇشاعىن جايا قارسى الدى. اتا-انامنىڭ ايتۋىنا قاراعاندا, سوعىس جىلدارى نەمىس وتباسىلارىن جان-جاققا بىتىراتىپ جىبەرگەن. سولاردىڭ كوبىسى اشتىق پەن قيىندىققا شىداماي, قىرىلىپ كەتىپتى. قازاقستانعا كەلگەن نەمىس وتباسىلارىنىڭ باعى بار ەكەن. «ءبىزدى امان الىپ قالعان قازاقتىڭ قوناقجاي پەيىلى مەن كەڭ داستارقانى بولدى. ءالى كۇنگە قازاقتاردىڭ قۇرت-مايىن اڭساپ تۇرامىن», دەيتىن اتا-اپالارىمىز. سوندىقتان وسىناۋ ۇلى دالا ەلىنە, سول كەڭ دالادا تاتۋ-ءتاتتى عۇمىر كەشىپ جاتقان قازاق حالقىنا ايتار العىسىم مول. ءوزىم قازىر كاسىپكەرلىكپەن اينالىسىپ, «التىن كەرۋەن» اتتى تۋريستىك ورتالىققا باسشىلىق ەتىپ ءجۇرمىن. كاسىپكەرلەرگە دە ەلىمىزدە كوپتەگەن جەڭىلدىكتەر جاسالعان. بۇل, ارينە, ەلباسىمىز ن.ءا.نازارباەۆتىڭ ساليقالى ساياساتىنىڭ ناتيجەسى. ەندەشە, ەلىمە جانە ەلباسىمىزعا مىڭ العىس, – دەيدى البينا ۆەيمەر اعىنان جارىلىپ.
كوكتەمنىڭ العاشقى كۇنىمەن تۇسپا-تۇس كەلگەن بۇل شۋاقتى مەرەكە كۇنى مۇمكىندىگى شەكتەۋلى جاندار, جۇبايلار, اتا-انالار مەن ولاردىڭ بالالارى ءبىر-بىرىنە العىستارىن ءبىلدىردى. بۇدان بولەك «اتا-انام – التىن تۇعىرىم», «اكەم مەن اناما مىڭ العىس» كورمە-بايقاۋى, «وتباسى – قوعام تىرەگى» قويىلىمى, «اتا-اناعا العىس» اكتسياسى ۇيىمداستىرىلدى. سونداي-اق, «تالانتتى جاستارعا العىس ايتامىن» اتتى جاستاردىڭ وليمپيادا چەمپيوندارىمەن, اتاقتى سپورتشىلارمەن كەزدەسۋى, وبلىستىق پەرزەنتحانادا 1 ناۋرىزدا تۋعان بالالارعا سىيلىق ۇسىناتىن «ءسۇيىنشى» اكتسياسى دا بۇل مەرەكەنىڭ شىرايىن اشا ءتۇستى.
جامبىل وبلىسىنىڭ بارلىق اۋدان-قالالارىندا ايتۋلى مەرەكە ءوز دەڭگەيىندە اتاپ ءوتىلدى.
ورالحان ءداۋىت,
«ەگەمەن قازاقستان».
جامبىل وبلىسى.
ۇلكەنگە – قۇرمەت, كىشىگە – ىزەت
قازاقستان پرەزيدەنتى نۇرسۇلتان نازارباەۆتىڭ جارلىعىمەن بەكىتىلگەن العىس ايتۋ كۇنى قىزىلجار ءوڭىرىنىڭ جەر-جەرلەرىندە كەڭىنەن اتاپ ءوتىلدى. وسىنداي يگى شارالاردىڭ ءبىرى اقجار اۋدانىنىڭ ورتالىعى تالشىق كەنتىندە ورنالاسقان ەڭسەلى مادەنيەت ۇيىندە ۇيىمداستىرىلىپ, ۇلى دالا ەلىندەگى بىرلىكتى نىعايتۋ, بەيبىتشىلىك پەن كەلىسىم, ءوزارا تۇسىنىستىك پەن سەنىم باستى تاقىرىپ ارقاۋىنا اينالدى.
جۇرتشىلىق الدىندا سويلەگەن سوزىندە اۋدان اكىمى سەرىكباي تۇرالينوۆ ايتۋلى مەرەكەمەن جينالعانداردى قۇتتىقتاپ, العىس ايتۋ كۇنىن مەرەكەلەۋ ءراسىمى «ماڭگىلىك ەل» جالپىۇلتتىق پاتريوتتىق يدەياسىنىڭ شەڭبەرىندە قازاقستاندىق قۇندىلىقتاردى, جالپى تاريح جانە تاريحي ەستەلىكتەر نەگىزىندە ەلدىك بىرەگەيلىك پەن بىرلىكتى, تىنىشتىق پەن باياندى ءومىر, ءوزارا سەنىم مەن سىيلاستىقتا ءجۇرىپ جاتقان بەيبىتشىلىك پەن كەلىسىم ساياساتىن جۇزەگە اسىرۋدىڭ ايتۋلى قۇرالى بولىپ تابىلاتىنىن اتاپ كورسەتتى. كۇشىمىز بەن ءۇيىمىزدىڭ باياندى دا كەمەلدى بولۋىنىڭ ارقاسىندا قازاقستان سەرپىندى دامىپ كەلەدى. وسكەلەڭ ۇرپاق بويىنا وتانسۇيگىشتىك, يماندىلىق, سىيلاسىمدىلىق قاسيەتتەردى دارىتۋ ءۇشىن وسى ءىس-شارا اياسىندا ءتالىمدى قۇندىلىقتار بارىنشا ناسيحاتتالىپ, تاراتىلاتىن بولادى.
ەڭبەك ارداگەرى, العاشقى تىڭ يگەرۋشىلەردىڭ ءبىرى ولگا شۋردانىڭ ەستەلىكتەرى وتە اسەرلى شىقتى. ولگا نيكولاەۆنا ءسوز باسىن قازاق حالقى مەن ەلباسىنا العىس ايتۋدان باستاپ, اتاجۇرتىنان ەرىكسىز كوشىرىلگەن كەزەڭدە قازاقستاندى پانالاپ, جاندارىنا دامىل تاپقانىن كوزىنە جاس الا وتىرىپ اڭگىمەلەدى. ومىرلىك باقىتىن تەرىسكەيدەن تاپقانىن ماقتانىشپەن ايتتى. سانالى عۇمىرىن اۋىلشارۋاشىلىق سالاسىنا ارناپ, كوپ جىل بويى اگرونوم قىزمەتىن ابىرويمەن اتقارعان. «قۇرمەت بەلگىسى» وردەنى مەن بىرنەشە مەدالدى كەۋدەسىنە جارقىراتا تاققان. ءتورت نەمەرە, ءۇش شوبەرە ءسۇيىپ, كەيۋانا جاسىنا جەتىپ وتىرعان ەڭبەك ارداگەرى تاۋەلسىزدىكتىڭ ارايلى تاڭىن كورگەنىنە شۇكىرشىلىك ەتىپ, جاستاردى ءبىرىن ءبىرى سىيلاۋعا, كەشىرىمدى بولۋعا شاقىردى.
– تاۋەلسىزدىگىمىزدىڭ شيرەك عاسىر مەرەيتويىمەن تۇسپا-تۇس كەلىپ, ءبىرىنشى رەت اتاپ ءوتىلىپ جاتقان بۇل مەرەكەنىڭ ءتالىمى وتە زور. اسىرەسە, جاستار ءۇشىن بەرەر عيبراتى مول. ساراتوۆ وبلىسىنان امالسىز الاستاتىلعاندا بۇرىنعى سەرگەەۆ اۋدانىنا تاپ بولدىق. اجەمىز اۋىر قۇسادان كوز جۇمعاندا انامىز شيەتتەي ەكى بالامەن قالعان ەدى. الايدا, كەڭپەيىلدى ادامداردىڭ ايالى قامقورلىعى ارقاسىندا ەش كەمدىك كورمەدى. تۋىستارىم گەرمانياعا كەتكەندە مەنىڭ تاڭداۋىم تەك قازاقستان بولدى. بۇل ءاز انامنىڭ اماناتى بولاتىن. ءبىر-بىرىمىزگە قولۇشىن بەرىپ, تىلەۋىمىزدى تىلەپ جۇرگەنگە نە جەتسىن!–دەپ مادەنيەت سالاسىنىڭ مايتالمانى مارينا مەلنيك اعىنان اقتارىلعاندا زال ءىشىن دۋ قول شاپالاق كومىپ كەتتى.
يگىلىكتى شارا بارىسىندا ۆالەنتينا گول, زەكەن قاجىمۇراتوۆ سەكىلدى قاريالارعا دا زور قۇرمەت كورسەتىلىپ, ۇلكەنگە قۇرمەتتىڭ, كىشىگە ىزەتتىڭ ينابات يىرىمدەرى سامال جەلدەي ەسىپ تۇردى.
العىس ايتۋ كۇنى مەرەكەسى جەرگىلىكتى كوركەمونەرپازداردىڭ كونتسەرتتىك باعدارلاماسىنا ۇلاسىپ, جۇرتشىلىق ءۇشىن اسەرلى كەشكە اينالدى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى,
اقجار اۋدانى.
سۋرەتتى تۇسىرگەن
دارحان سارسەنوۆ.
قايىرىمدى جىگىت يسلام
اقتاۋدا العاشقى العىس ايتۋ كۇنى مەرەكەسىنە وراي «ۆايناح» چەشەن-ينگۋش ەتنومادەني بىرلەستىگىنىڭ مۇشەسى, ونەرلى جاس جىگىت, تاۋەلسىزدىگىمىزدىڭ قۇرداسى يسلام مۋزاەۆتىڭ جەكە كونتسەرتى ءوتتى. يسلام العاشقى جەكە كونتسەرتىن قايىرىمدىلىق ماقساتتا ۇيىمداستىردى.
رەسەيدەن ءىىم اكادەمياسىن بىتىرگەن يسلام ساۋدا سالاسىندا قىزمەت ەتتى. بىراق, بويىنداعى تالانتى ونى ونەر سالاسىنا الىپ كەلدى, بۇرىن اتاۋلى مەيرامداردا, بايقاۋلاردا بولماسا, ساحنانى سيرەك كورەتىن جىگىت, قازىر اقتاۋ قالاسىنداعى «اباي» اتىنداعى مادەنيەت سارايىندا قىزمەت ەتەدى. سونداي-اق, ول – ماڭعىستاۋداعى قوعامدىق-الەۋمەتتىك ورتاعا بەلسەندى تۇردە اتسالىسىپ, دامۋ مەن دوستىقتىڭ نىعايا تۇسۋىنە زور ۇلەس قوسىپ كەلە جاتقان چەشەندەر مەن ينگۋشتەردىڭ ەتنومادەني بىرلەستىگىنىڭ مەرەيىن كوتەرىپ جۇرگەن جاس. العىس ايتۋ كۇنىنە ارناعان جەكە كونتسەرتىن ول «مەن – قازاقستاندىقپىن» دەپ اتاپ, قازاقستانداعى بىرلىك پەن ىنتىماققا ءوز ءۇنى مەن ۇلەسىن قوسۋعا ۇمتىلاتىندىعىن ءبىلدىردى.
2015 جىلدىڭ 27 قاراشاسىندا قازاقستان حالقى اسسامبلەياسىنىڭ ۇيىمداستىرۋىمەن استانادا وتكەن قايىرىمدىلىق ۇيىمدارىنىڭ, مەتسەناتتار مەن دونورلاردىڭ رەسپۋبليكالىق سەزىندە تاۋەلسىزدىكتىڭ 25 جىلدىعىنا ارنالعان «قايىرىمدىلىق كەرۋەنى» جالپىۇلتتىق اكتسياسى باستاۋ الدى. اكتسيانىڭ نىشانى – «قورجىن» جىل بويى قايىرىمدىلىق ىستەر مەن الەۋمەتتىك جوبالارعا تولتىرىلاتىن بولادى دەپ كەلىسىلگەن ەدى. بۇعان دەيىن دە بىرنەشە قايىرىمدى ىستەردىڭ «قۇجاتىمەن» ءبۇيىرىن قامپيتقان قورجىنعا ەندى يسلامنىڭ جەكە كونتسەرتى دە قوسىلدى.
قازاق, چەشەن, ورىس تىلدەرىندە ءان شىرقاعان ي.مۋزاەۆ كونتسەرتتەن تۇسكەن قارجىنى ماڭعىستاۋ اۋدانىنىڭ قوسبۇلاق اۋىلىندا تۇراتىن وتباسىنا اۋداردى. بۇل وتباسىنىڭ 2011 جىلى تۋعان ابىلاي جانە 2014 جىلى تۋعان جانمۇحامبەت – ءتۋابىتتى مۇگەدەك بالالارى بار. يسلام ۇسىنعان قاراجات قوس ۇلدىڭ ەمدەلۋىنە قوسىمشا كومەك بولماق. ابىلاي مەن جانمۇحامبەتتىڭ اناسى كۇنزيرا كەنباەۆا ءانشى يسلام مەن كونتسەرتتى ۇيىمداستىرۋشىلارعا العىسىن ءبىلدىردى.
العىس ايتۋ كۇنىندە قايىرىمدىلىق, ساۋاپتى ءىس جاساعان يسلامنىڭ قادامىنا ساتتىلىك تىلەيمىز. بۇل كۇنى ول قايىرىمدىلىق جاساۋمەن بىرگە, سىرقات بالالار مەن ولاردىڭ وتباسى تاراپىنان العىسقا يە بولۋ ارقىلى 1 ناۋرىزداعى مەرەكەنىڭ سيپاتىن اشا ءتۇستى.
گۇلايىم شىنتەمىرقىزى,
«ەگەمەن قازاقستان».
