مەكسيكادا زيكا بەزگەگىن جۇقتىرعاندار سانى ارتىپ بارادى

استانا. 1 ناۋرىز. مەكسيكادا زيكا بەزگەگىن جۇقتىرعاندار سانى 120 ادامنان استى . ونىڭ 11-ءى جۇكتى ايەلدەر. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. مەكسيكادا بۇل ىندەت كۇن ساناپ جايىلىپ بارادى. وتكەن اپتامەن سالىستىرعاندا زيكا بەزگەگىن جۇقتىرعاندار 28 ادامعا ارتقان. ال جۇكتى ايەلدەر قاتارى سوڭعى ەكى اپتانىڭ ىشىندە ەكى ەسەگە كوبەيدى. مەكسيكانىڭ دەنساۋلىق ساقتاۋ مينيسترلىگىنىڭ حابارلاۋىنشا, مەملەكەتتىڭ وڭتۇستىك-شىعىسىندا ورنالاسقان چياپاسە شتاتىندا 57 ادام, واحاكا شتاتىندا 52 ادام, نۋەۆو-لەوندا 4 ادام, گەررەرودا 3 ادام جانە تاعى بەس شتاتتىڭ ارقايسىسىندا ءبىر ادامنان قاتەرلى ىندەتكە شالدىققان. زيكا – مايمىلدار اراسىنداعى جۇقپالى اۋرۋ. ال ادامدار اراسىندا تاراۋىنا نەگىزىنەن Aedes aegypti تۇرىندەگى ماسالار سەبەپشى بولادى. ىندەتتى العاش رەت جۇقتىرعان ادام 1947 جىلى ۋگاندا مەملەكەتىنىڭ تۇرعىنى بولاتىن. وسىدان سوڭ افريكا ەلدەرىنە تارادى. اۋرۋدى العاشقى كەزەڭىندە انىقتاپ ءبىلۋ مۇمكىن ەمەس. سەبەبى, بەلگىلەرى اشىق تۇردە بىلىنبەيدى. دەنە قىزۋى ازداپ كوتەرىلىپ, باس اۋرۋى, بۋىن جانە بەل اۋرۋلارى, شارشاۋ بەلگىلەرى پايدا بولادى. ايان ءابدۋالي. دەرەك, سۋرەت: ريا «نوۆوستي».