بايقاۋشىلار باس قوستى

بايقاۋشىلار د.ا.قوناەۆ اتىنداعى ەۋرازيالىق زاڭ اكادە­ميا­سىنىڭ كونفەرەنتس-زالىنا جينالدى. ءدارىس بارىسىندا ءاربىر بايقاۋ­شىنىڭ كونستيتۋتسيانى, «سايلاۋ تۋرالى» زاڭدى, سونداي-اق, باي­قاۋ­شىنىڭ تىكەلەي مىندەتتەرىن جەتە ءبىلۋ كەرەكتىگى قايتالاي ەسكەرتىلىپ, تىڭ­داۋ­شىلاردىڭ جادى شىڭدالدى. بايقاۋشى وزىنە تيەسىلى مىندەتىنە تەك سايلاۋ وتەتىن بيىلعى 20 ناۋرىز كۇنىن كۇتپەي, ءدال بۇگىننەن باستاپ كىرىسۋى كەرەكتىگى قايتا-قايتا ەسكەرتىلدى. سوندىقتان دا سەمينار-ترەنينگتەن شىققان بويدا ءاربىر بايقاۋشى وزدەرىنە بەكىتىلگەن سايلاۋ ۋچاسكەلەرىنە بارىپ, ءىس-شارانىڭ ءوتۋ بارىسىمەن تانىسۋى ءتيىس. ەڭ الدىمەن, سايلاۋشىلاردىڭ بارلىعى بىردەي تىزىمگە الىنعان-الىنباعانى تەكسەرىلەدى. – بۇگىن ءبىز سايلاۋ ناۋقانى باستالعالى الماتى بايقاۋشىلارىمەن ەكىنشى رەت سەمينار-ترەنينگ وتكىزىپ وتىرمىز, – دەدى كوميسسيا جەتەكشىسى, اكادەميا رەكتورى, پروفەسسور, قازاقستان پرەزيدەنتى جانىنداعى قۇقىقتىق ساياسات كەڭەسىنىڭ مۇشەسى ءومىرالى جالايري. – قالا بو­يىنشا بارلىعى 532 بايقاۋشى بار. كوميسسيا توراعاسى رەتىندە مەن بۇعان دەيىن ءاربىر پارتيانىڭ شتابىندا بولىپ, ولاردىڭ ناۋقانالدى جۇمىسىمەن تانىستىم. بۇگىنگى تاڭدا ءبىزدىڭ ءبىر عانا ماقساتىمىز بار, ول – قازاقستان رەسپۋبليكاسى پارلامەنتى ءماجىلىسى مەن جەرگىلىكتى ماسليحاتتارعا دەپۋتاتتار سايلاۋىن جوعارى دارەجەدە, زاڭ تالاپتارىنا سايكەس ويداعىداي ەتىپ وتكىزۋ. سايلاۋ – جەرگىلىكتى اكىمدىك بەلسەندىلەرىنىڭ ارالاسۋىنسىز اشىق تا تازا ءوتۋى ءتيىس. ەقىۇ بايقاۋشىلارىنىڭ جانە دە باسقا دا حالىقارالىق بايقاۋشى ۇيىمداردىڭ الدىندا ءجۇزىمىز اشىق بولعانى دۇرىس. ولاردىڭ تاراپىنان ەشقانداي دا ءبىر ەسكەرتۋلەر بولماعانى ماقۇل. قازىر قازاقستانداعى پارلامەنت سايلاۋىنا كۇللى الەم نازارى اۋىپ وتىر. وتكەن جىلعى ەلدەگى پرەزيدەنتتىك سايلاۋدا ءمىنسىز قىزمەت اتقارعان بارلىق بايقاۋشىلارعا بۇل جولى دا سونداي لەپپەن قىزمەت ىستەپ, تياناقتىلىق كورسەتۋ تاپسىرىلدى. الماتىدا «زاڭگەرلەر ءادىل سايلاۋ ءۇشىن!» رەسپۋبليكالىق قوعامدىق ۇيىمى بار. ۇيىمنىڭ قۇرىلعانىنا 10 جىلداي ۋاقىت ءوتتى. جاۋاپتى ناۋقاننىڭ نورماتيۆتىك زاڭ اكتىلەرىنە سايكەس بولۋىن وسى ۇيىمنىڭ بەلسەندىلەرى دە قاداعالاپ, ءبىر كىسىدەي اتسالىساتىن بولادى. جيىندا بايقاۋشىلاردىڭ وسىناۋ بەلسەندى ۇيىممەن بىرلەسە, ىنتىماقتاسا جۇمىس ىستەۋى تۋرالى دا ايتىلدى. تالعات ءسۇيىنباي, «ەگەمەن قازاقستان». الماتى.