بىلتىر جامبىل وبلىسىنداعى داعدارىس ورتالىعىنا 89 ايەل ءتۇستى

تاراز. 29 اقپان. ورتالىق كوممۋنيكاتسيا قىزمەتىنىڭ جامبىل وبلىسى وڭىرلىك فيليالىندا جامبىل وبلىسى اكىمى جانىنداعى ايەلدەر ىستەرى جانە وتباسى-دەموگرافيالىق ساياسات جونىندەگى كوميسسياسىنىڭ حاتشىسى ايمان كارىبەكوۆانىڭ قاتىسۋىمەن بريفينگ ءوتتى. بۇل تۋرالى egemen.kz ءتىلشىسى حابارلادى. وبلىستا اتالعان كوميسسيانىڭ ىقپالىمەن تۇرمىسى تومەن جانە كوپ بالالى انالارعا مەملەكەتتىك الەۋمەتتىك كومەك كورسەتۋ جانە جۇمىسقا ورنالاستىرۋ, جالعىز باستى جانە اۋرۋ زەينەتكەرلەردى ۇيلەرىندە كۇتۋ, الەۋمەتتىك جاردەم كورسەتۋ ورتالىقتارىن قۇرۋعا ىقپال ەتۋ جانە حالىق اراسىندا دارىگەرلىك كومەك كورسەتۋ ماقساتىندا اقپاراتتىق-ناسيحاتتىق جۇمىستار جۇرگىزىلۋدە. «جامبىل وبلىسىنىڭ ساياساتكەر ايەلدەرى كلۋبىمەن «ايەلدەردىڭ ساياسي كوشباسشىلىعى» جازعى مەكتەبى ۇيىمداستىرىلدى. اتالمىش مەكتەپ جۇمىسىنا بايزاق, جامبىل, جۋالى, تالاس, سارىسۋ اۋداندارىنان 30 ايەل قاتىستى. «ايەلدەردىڭ ساياسي كوشباسشىلىعى» جازعى مەكتەبىنىڭ نەگىزگى ماقساتى: مەملەكەتتىك جانە قوعامدىق-ساياسي جۇمىسقا ودان ءارى جوعارىلاتۋ ءۇشىن جاقسى دايىندالعان ايەلدەردەن كادرلىق رەزەرۆتى قالىپتاستىرۋ, كوشباسشىلىق قاسيەتتەرىن داعدىلاندىرۋ, ناتيجەلى كوممۋنيكاتسيالار مەن باسەكەگە قابىلەتتىلىك ادەتتەرىن قالىپتاستىرۋ, تۇرعىنداردى كەڭ كولەمدە گەندەرلىك اعارتۋعا بەلسەندى قاتىسۋ, ەلىمىزدىڭ وزەكتى الەۋمەتتىك-ەكونوميكالىق جانە قوعامدىق-ساياسي ماسەلەلەرىن شەشۋ بويىنشا پىكىرلەر, جوبالار جانە باستامالار بانكىن قۇرۋ, بيلىكتىڭ جەرگىلىكتى ورگاندارىنا بولاشاق ۇمىتكەرلەرگە تەوريالىق جانە تاجىريبەلىك كومەك كورسەتۋ, ايەل كوشباسشىلاردىڭ وزىق تاجىريبەسىن ناسيحاتتاۋ», – دەدى ايمان ومىرزاققىزى. سونداي-اق, جامبىل وبلىسىندا ايەلدەردى زورلىق-زومبىلىقتان قورعاۋ, مۇنداي قىلمىستاردىڭ الدىن-الۋ, قۇقىقتىق كومەك بەرۋ جۇمىستارى جەتىلدىرىلىپ كەلەدى. ءومىردىڭ قيىن جانە داعدارىس جاعدايلارىنا تۇسكەندەرگە ۋاقىتشا پانالاۋعا جاعداي جاساۋ ءۇشىن «جامبىل وبلىستىق قيىن ومىرلىك جاعدايعا تۇسكەن ايەلدەرگە ارنالعان داعدارىس ورتالىعىنا» 2015 جىلدىڭ 12 ايى ىشىندە 89 ايەل ورنالاستىرىلعان. ودان بولەك, بىلتىر شىلدە ايىنان بەرى تاراز قالاسىندا اشىلىپ جۇمىس ىستەيتىن «انا ۇيىنە» 34 ايەل ورنالاستىرىلعان. بۇل الەۋمەتتىك جوبانىڭ باستى ماقساتى – شارانا جەتىمدەر ۇيىنە تۇسپەۋى ءۇشىن بالاسىنان باس تارتپاق بولعان قىز-كەلىنشەكتەردى رايىنان قايتارىپ, ولاردىڭ اياعىنان تۇرىپ كەتۋىنە قولداۋ كورسەتۋ جۇمىستارىن جۇرگىزۋ. تۇرمىستىق قاتىناستا جانە ءومىردىڭ قيىن جاعدايىنا تۇسكەن نارەستەلى قىز كەلىنشەكتەر, جۇكتى ايەلدەر جانە ءسابيلى انالارعا وسى «انا ءۇيى» پانا بولۋدا, اياقتانعانشا كومەك كورسەتۋدە, سوداي-اق, مۇندا ەڭبەك بيرجاسى ارقىلى جۇمىس تابۋعا كومەك كورسەتىلەدى جانە بالالارى ءبىر جارىم جاسقا تولعانشا وسى «انا ۇيىندە» تۇرۋعا مۇمكىنشىلىك بەرىلۋدە. ورالحان ءداۋىت. دەرەك, سۋرەت: egemen.kz.