قاراعاندىدا دزيۋدودان الەم چەمپيوناتىنىڭ جۇلدەگەرى ۇستالدى

قاراعاندى. 29 اقپان. قاراعاندىدا بۋكمەكەرلىك كەڭسەلەرگە بىرنەشە رەت قاراقشىلىق شابۋىل جاساعان كۇدىكتىلەر قولعا ءتۇستى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. ۆەدومستۆونىڭ ءباسپاسوز قىزمەتىنىڭ اقپاراتىنا سايكەس, قاراقشىلىق شابۋىلدارعا قاتىسى بار ەكى كۇدىكتى ۇستالعان. ولاردىڭ ءبىرى – 24 جاستاعى حالىقارالىق دارەجەدەگى سپورت شەبەرى, دزيۋدودان جاسوسپىرىمدەر اراسىنداعى الەم چەمپيوناتىنىڭ جۇلدەگەرى بولسا, ەكىنشىسى 27 جاستاعى جۇمىسسىز ەر ادام. كۇدىكتىلەر بەتپەردە كيىپ, بۋكمەكەرلىك كەڭسەلەردىڭ قىزمەتكەرلەرىن قارۋمەن قورقىتىپ, اقشانى تارتىپ العاننان كەيىن, وقيعا ورنىنان بوي تاسالاپ وتىرعان. «ەكى كۇدىكتى دە بەس رەت قاراقشىلىق شابۋىل جاساعاندارىن مويىندارىنا الدى. زاتتاي ايعاقتار الىنىپ, ولاردىڭ وسىنداي باسقا قىلمىسقا قاتىستىلىقتارىنىڭ بار-جوعى تەكسەرىلۋدە. ۇستالعاندار ۋاقىتشا ۇستاۋ وقشاۋلاعىشىنا قامالدى, سوتقا دەيىنگى تەرگەۋ امالدارى جۇرگىزىلۋدە», – دەپ حابارلادى وبلىستىق ىشكى ىستەر دەپاراتامەنتنىڭ ءباسپاسوز قىزمەتى. قايرات ءابىلدينوۆ. دەرەك: قاراعاندى وبلىستىق ىشكى ىستەر دەپارتامەنتىنىڭ ءباسپاسوز قىزمەتى. سۋرەت: nur.kz.