يتاليادا ۋمبەرتو ەكونىڭ كىتابى جارىق كوردى

استانا. 28 اقپان. يتاليان جازۋشىسى ۋمبەرتو ەكونىڭ ءوزى دۇنيەدەن وتكەننەن كەيىن «Pape Satan Aleppe» اتتى كىتابى جارىق كوردى. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. كىتاپ «تەسەيدىڭ كەمەسى» دەگەن باسپادان شىقتى. جازۋشى ءارى فيلوسوف ۋمبەرتو ەكو بۇل مەكەمەنىڭ قۇرىلۋىنا ۇلكەن ۇلەسىن قوسقان. العاشىندا كىتاپتىڭ شىعۋ مەرزىمى ناۋرىز ايىنا جوسپارلانعانىمەن, ۋمبەرتو ەكونىڭ قازاسىنان كەيىن وسى ايدىڭ سوڭىنا جوسپارلاندى. ۋمبەرتو ەكو وسى جىلدىڭ 19 اقپان كۇنى ميلان قالاسىندا 85 جاسىنا قاراعان شاعىندا قايتىس بولدى. دارىگەرلەر شامامەن ەكى جىل بۇرىن ۇيقى بەزىنىڭ ىسىگىنە شالدىققانى تۋرالى دياگنوز قويعان. الايدا, وسىعان قاراماستان ءومىرىنىڭ سوڭىنا دەيىن تىنباي قىزمەت ەتىپ كەلدى. ۋمبەرتو ەكونىڭ ايگىلى اقىن دانتەنىڭ شىعارماسىمەن اتتاس كىتابىنا ەسسەلەرى مەن وزەكتى قوعامدىق تاقىرىپتار بويىنشا جاسالعان باياندامالارى توپتاستىرىلعان. اتالعان باسپانىڭ باس ديرەكتورى ەليزابەتتا زگاربيدىڭ ايتۋىنشا, جازۋشى بۇل كىتابىن تولىعىمەن وڭدەپ, باسپاعا بەرىپ ۇلگەرگەن. جازۋشىنىڭ كىتابى وقىرماندار اراسىندا ۇلكەن سۇرانىسقا يە بولدى. «تەسەيدىڭ كەمەسى» 75 مىڭ داناسىن شىعاردى. ايان ءابدۋالي. دەرەك, سۋرەت: ريا «نوۆوستي».