ونەرىمەن ورلەگەن

جاس مامانداردى اۋىلدىق جەرلەرگە ورنالاستىرۋ, تۇراق­تاندىرۋ ارقىلى كادر تاپشىلىعى ماسەلەسىن شەشۋدە ءوزىن-ءوزى اقتاپ وتىرعان مەملەكەتتىك جوبالاردىڭ ءبىرى «ديپلوممەن – اۋىلعا!» جوباسى ەكەنىن ۇلكەن سەنىممەن ايتۋعا بولادى. اۋدان اكىمدىكتەرى مەن «اۋىل شارۋاشىلىعىن قارجىلاي قولداۋ قورى» اق وڭىرلىك فيليالى اتالمىش شارا اياسىندا بەس جىلدا 2,1 ميلليارد تەڭگەنىڭ ءبىر رەتتىك جاردەماقىسى مەن تۇرعىن ءۇي ساتىپ الۋ قىزمەتىن كور­سەتكەن. وتكەن جىلى 416 ميل­ليون تەڭگەنىڭ 157 زايمى بە­رىلسە, بيىل 318 ميلليون تەڭگە قاراس­تىرىلعان. – ءبىزدىڭ اۋداندا دا جاس كادر­­لارعا جان-جاقتى قولداۋ كور­سەتىلەدى. ءما­سەلەن, داريا تور­چەۆ­سكايا باسپانامەن, جۇمىس­پەن قامتاماسىز ەتىلگەن. كون­سەر­ۆاتوريانى بىتىرگەن ەركەبۇلان كاريپوۆ دەگەن ديپلومدى مامان مادەنيەت ۇيىنە ءانشى بولىپ ورنالاستى. كەلە سالىسىمەن «پاراسات» مەكتەپ-ليتسەيىندە ءداستۇرلى ءان ۇيىرمەسىن اشتى. جارى – حورەوگراف. جۋىق ارادا بۇل وتباسىنىڭ الەۋمەتتىك ماسەلەلەرى تولىعىمەن شەشىلەدى, – دەيدى اۋداندىق مادەنيەت ءبولىمىنىڭ باسشىسى سارا التاەۆا. مارگاريتا كۋزنەتسوۆا – اتالمىش باعدارلامانىڭ يگىلىگىن كورۋشىلەردىڭ ءبىرى. ول بەسكول كەنتىندەگى مادەنيەت ۇيىنە مامان رەتىندە ورنالاسىپ, تۇراقتى جۇمىس تاپقان. 2012 جىلى پەتروپاۆلداعى ونەر كوللەدجىن بىتىرگەن سوڭ مەيرامحانالاردا وتەتىن توي-دۋمانداردا تامىلجىتا ءان شىرقاپ, ناپاقاسىن تاۋىپ جۇرگەن. الايدا, شىعارماشىل ورتامەن جۇمىس ىستەگەندى ۇناتاتىن ونى بۇل قارەكەتى قاناعاتتاندىرا قويماعان. ءوز ءومىرىن باسقاشا قالىپتاستىرۋعا بەل بۋعان ونەرپاز قىز بەسكولدەگى مادەنيەت ۇيىندە بوس شتات بارىن ەستىپ, باعىن سىناپ كورۋدى ۇيعارعان. كونكۋرس سىناقتارىنان ويداعىداي ءوتىپ, رەجيسسەرلىك قىزمەتكە قابىل­دانعان. بىرەر جىلداي وبلىس ورتالىعىندا تۇراتىن اتا-انا­سىنىڭ ۇيىنەن قاتىناپ جۇرگەن. اراقاشىقتىق ونشا الىس بولماسا دا, ەداۋىر قيىندىقتار كەلتىرەتىن. تىعىرىقتان شىعۋدىڭ جولدارىن ءارلى-بەرلى ىزدەستىرىپ, اقىرىندا «ديپلوممەن – اۋىلعا!» جوباسى بويىنشا ءتيىستى ورىندارعا قايىرىلۋدى ءجون كورگەن. ءوتىنىشى ماقۇلدانىپ, ءتيىستى شەشىم الىن­عاندا توبەسى كوككە جەتكەندەي قۋان­عان. مەملەكەتتىك قوردان ءۇي ساتىپ الۋعا 12 مىڭ اقش دول­لارى جانە 138 مىڭ تەڭگە كوتەر­مەاقى بەرىلگەن. نەسيەنى اي سايىن 12500 تەڭگە تولەممەن 15 جىلدا وتەيتىن بولىپ كەلىسكەن. مارگاريتا – سەگىز قىرلى, ءبىر سىرلى ونەرپاز جاستاردىڭ ءبىرى. ونىڭ كۇمىس كومەي انشىلىگى ەشكىمگە ۇقسامايدى. اعىلشىن, يتاليان, يسپان تىلدەرىندە اۋەلەتە شىرقاعاندا تىڭدارماندارىن بىردەن ەلىكتىرەدى. ونەر كوللەد­جىنىڭ وقۋشىسى بۇركىت جانايمەن «سەزىم» اتتى دۋەت قۇرىپ, قازاق اندەرىن تالماي ناسيحاتتاپ ءجۇر. بۇدان تىسقارى داريا, نارقىز دەگەن قۇربىلارىمەن بىرلەسىپ «ىڭكار» توبىن قۇرۋى دا قولداۋعا تۇراتىن باستامالاردىڭ ءبىرى ەكەنى داۋسىز. ءسۇيىپ ايتاتىن اندە­رىنىڭ ءبىرى – «دۋدار-اي». قازىر وبلىس ورتالىعىندا وتەتىن باي­قاۋ دايىندىعىنا قىزۋ كىرىسىپ, اباي­دىڭ «كوزىمنىڭ قاراسى» ءانىن ۇسىنباق نيەتتە. جان-جاقتى بولۋعا تالپىنعان ونىڭ ءبىر ارمانى – ءبىلىمىن ودان ءارى جالعاستىرۋ, شەبەرلىك شىڭىنا كوتەرىلۋ. ونەر كوللەدجىنىڭ ۆو­كال توبىن ءتامامداسا دا, ءما­دەنيەت سالاسىنىڭ باسقا دا با­عىت­تارىندا باعىن سىناپ كورۋدى يگى ماقسات تۇتقان. تالان­تى مەن تالابىن ۇشتاستىرا وتى­رىپ, بىردە-ءبىر كون­تسەرتتىك باعدار­لا­مالاردان شەت قالعان ەمەس. جاقىندا ۇجىمنىڭ قۇرا­مىندا سوكولوۆكا, ياكور اۋىلدارىنا با­رىپ, ونەرىمەن كورەر­مەندەرىن تامساندىرىپ قايتتى. گۇلگۇل قۋاتقىزى. سولتۇستىك قازاقستان وبلىسى, بەسكول اۋدانى. سۋرەتتى تۇسىرگەن امانگەلدى بەكمۇراتوۆ.