ەسكىرمەيتىن ەستەلىك

« ۇلى جامبىل – قازاقتىڭ ءداس­تۇرلى ادەبيەتىنىڭ اسا دارىندى اس­قاق جا­راتىلعان الىپ وكىلى». بۇل – ەل پرەزيدەنتى ن.ءا.نازارباەۆتىڭ جامبىل جاباەۆ جايلى پايىمدى پىكىرى. شىنىمەن, ايتىس ونەرىنىڭ اقتاڭگەرى اسا دارىندى بولماسا, ەل ەسىندە قالۋى ەكىتالاي ەدى. ونىڭ جالىندى جىرلارى ۇلت جادىندا جاتتالىپ, سانا­سىندا ساقتالىپ تۇرعالى قاشان. ايشىقتى ايتىستارىنىڭ دا الار ورنى ايرىقشا. جامبىل تۋرالى كىتاپتار دا از ەمەس, ماقالالار دا بارشىلىق, وي-تولعامدار دا جەتەرلىك. ال قازاقستان رەسپۋبليكاسىنىڭ مادەنيەت قايراتكەرى, جۋرناليستەر وداعىنىڭ مۇشەسى, فوتو­تىلشى جاقسىلىق تۇرلىبەكوۆتىڭ ۇلى اقىننىڭ 170 جىلدىعىنا ار­ناعان فو­توالبومىنىڭ وزىنە ءتان ەرەكشەلىگى بار دەسەك, ارتىق ايتقاندىق بولماس, ءسىرا. ونىڭ ەرەكشەلىگى نەدە دەپ سۇرايتىن بولساڭىز, وندا اۆتوردىڭ 20 جىل بويى تىرنەكتەپ جيناقتاعان ەڭبەكتەرى ەنگىزىلگەن. «حح عاسىردىڭ گومەرى» اتانعان عالامات تۇلعانىڭ 150 جىلدىعى ماسكەۋدە, فرانتسيا, تۇركيا ەلدەرىندە تويلانعانى بەلگىلى. سول جيىنداعى ءساۋ­لەلى ساتتەردەن سىر شەرتەتىن سۋرەتتەر البومنىڭ اجا­رىن ەسەلەي تۇسكەن. اينالاسى ون بەس بەتتەن تۇراتىن فوتو­البومنىڭ ىشىنە 200-دەن استام سۋرەت قام­تىلعان. جىراۋعا ارنالعان شاراپاتتى شارالار مەن يگىلىككە تولى ىستەردىڭ ءىزىن وسى جيناقتان قينالماي تاباسىز. ولاردىڭ قاتارىندا 1996 جىلى ەلباسى ن.ءا.نازارباەۆتىڭ جامبىل مۋزەيىن اشۋ ءساتى, رەسپۋبليكالىق اقىن­دار ايتىسى, ساحنا ساڭلاقتارىنىڭ قاتى­سۋىمەن وتكەن ءارتۇرلى ءان كەشتەرى بار. مىزعىماس تىرشىلىكتە مىڭداعان, ميلليونداعان جاقسى جاندار تۋرالى ەستەلىكتەر ەستۋگە بولادى. بىراق, ولاردى كوزبەن كورۋ كەز كەلگەننىڭ ەنشىسىنە بۇيىرا بەرمەيتىن باق. ال وسىنداي جاقسى جانداردىڭ بەينەسىن بەتپە-بەت كورىپ, كەلبەتىن كەلەشەك ۇرپاققا سۋ­رەت ارقىلى جەتكىزۋ جاقسىلىقتىڭ تاع­­­­­­­­دىرىنا جازىلعان ەكەن. الاشتىڭ باعىنا بىتكەن اسىل ازاماتتاردىڭ ويىپ تۇرىپ ورىن الۋى اتالمىش البومنىڭ قادىر-قاسيەتىن ارتتىرا تۇسكەندەي. اۆ­تور­دىڭ بۇدان بولەك اباي قۇنانباەۆ, دىنمۇحامەد قوناەۆ تۋرالى جانە قازاق حاندىعىنىڭ 550 جىلدىعىنا ارنالعان فوتوالبومدارى بار ەكەنىن ەستەرىڭىزگە سالامىز. بابالارىن باعالايتىن, ءوت­كەنىن سارالايتىن جاندار ءۇشىن مۇنداي فوتوالبومدار قۇندى قۇجات, تاپتىرماس بايلىق, ەسكىرمەس ەستەلىك بولارى داۋسىز. راۋان قايدار, «ەگەمەن قازاقستان».