ۇرلانعان بالا

ءۇش كۇندە وتباسىنا امان-ەسەن قايتا ورالدى بۇكىل ەل الاڭداعان وقيعانىڭ سوڭى جاقسىلىقپەن اياقتالىپ, مۇحاممەد امان-ەسەن تابىلدى. ارىس قالاسىنان تابىلعان بالا بۇگىندە ءوز ۇيىنە جەتكىزىلدى. اتا-انا­سى, باۋىرلارىنىڭ قۋانى­شىندا شەك جوق. «وزىمدەگى قۋانىش سەزىمدى جەتكىزۋگە ەشقانداي ءسوز تاپپايمىن, – دەيدى ۇلىن قۇشاعىنان ايىرماي جۇرگەن اناسى جاننا اعابەكوۆا. – مۇحاممەد جوعا­لىپ كەتكەندە, بارلىق قازاق­ستاندىقتاردان قولداۋ كوردىك. اعايىن-تۋىس, ەرىكتى ازاماتتار پوليتسەيلەرمەن بىرىگىپ, ىزدەۋگە شىقتى. بارىنە, بارىنە مىڭ العىس ايتامىز. بالام وسى ۋاقىتتا ۇرلاعان ايەل جانە ونىڭ ەرىمەن بىرگە تۇرىپتى. ەشقانداي ءزابىر كورمەگەن. بىراق ازداپ قورقىپ قالعاندىعى بايقالادى. بالانى مەكتەپتەن شىققان بەتىندە الداۋسىراتىپ الىپ كەت­­­كەن ايەلدىڭ جاڭا دەرەكتەرى شى­عىپ جاتىر. – كەشە ارىس قالاسىنىڭ تۇر­عىنى قوڭىراۋ شالىپ, فوتوروبوتتا كورسەتىلگەن ايەلدىڭ تۇرعىن جايىن حابارلادى, – دەدى وسى وقيعاعا وراي ۇيىمداستىرىلعان بريفينگتە كريمينالدى پولي­تسيانىڭ باسقارما باسشىسى كەنجەبەك وڭداسىنوۆ. – نۇسقاۋ بويىنشا, بالا مەن ونى ۇرلاعان ازاماتشانى تەز تاپتىق. بالانى قالاي الاڭسىز ەرتىپ كەتكەنى بەلگىسىز, ويتكەنى, ۇرلاعانعا دەيىن اتىن بىلمەگەن. 1956 جىلى تۋعان كۇدىكتى ايەل بۇرىن سوتتالماعان ەكەن. بىراق تەرگەۋ كەزىندە ونىڭ تاعى ءبىر بالا ۇرلىعىنا قاتىسى بو­ل­عانى انىقتالعان. ول 2013 جىلى شىمكەنت قالاسى اباي اۋدا­نىن­داعى مەكتەپتەن التى جاسار قىزدى الداپ اكەتىپ, ۇستالىپ قالارىن بىلگەن سوڭ ون كۇننەن كەيىن قايتا اكەلىپ تاستاعان. ءومىرالى نۇراي ەسىمدى ءبۇلدىرشىن كوشە كەزىپ ءجۇر­گەن جەرىنەن تابىلعان. تەرگەۋ كەزىندە كۇدىكتى ايەل­دىڭ وتباسى, بالالارى, ءتىپتى, نەمە­رەلەرى بارى انىقتالعان. ول ءوزىنىڭ ۇرلىعىن بالالاردى جاقسى كورەتىندىگىمەن تۇسىندىرگىسى كەلەدى. قازىرگى تاڭدا وبلىستىق ىشكى ىستەر دەپارتامەنتى وعان اقىل-ەسىنىڭ دۇرىستىعى ءجو­نىنەن ساراپتاما تاعايىندادى. بۇ­رىن پسيحيكالىق اۋىتقۋ ەسەبىندە جوق ايەل كۇيەۋى­مەن جەكە ۇيدە تۇ­را­دى ەكەن. ەرجەتكەن ۇل-قىزى شىم­كەنتتە ءۇيلى-جايلى. قازىر ول كىناسىن تولىق مويىنداپ وتىر. ەكى رەت بالا ۇرلى­عىنا قاتىستى ايەلدىڭ ۇستىنەن قىلمىستىق كودەكستىڭ «ادام ۇرلاۋ» 125-بابى, 2-ءبولىمى بويىنشا قىلمىستىق ءىس قوزعالدى. ەگەر قىلمىسى تولىق دالەلدەنسە, ول كەمىندە 7-12 جىلعا دەيىن باس بوستاندىعىنان ايىرىلۋى مۇمكىن. باقتيار تايجان, «ەگەمەن قازاقستان». وڭتۇستىك قازاقستان وبلىسى.