استانا كوشەلەرىنە جاڭا بەينەتىركەۋ قۇرالدارى ورناتىلادى

استانا. 24 اقپان. استانا قالاسىندا 25 اقپاننان باستاپ «ۆوكورد-تسيكلوپ» اپپاراتتىق-باعدارلامالىق كەشەندەرى ونەركاسىپتىك پايدالانۋعا ەنگىزىلەدى. بۇل تۋرالى استانا قالاسى اكىمدىگىنىڭ رەسمي سايتى – astana.gov.kz-كە سىلتەمە جاساعان egemen.kz ءتىلشىسى حابارلادى. «قاۋىپسىز قالا» جوباسى اياسىندا 21 اپپاراتتىق كەشەن ىسكە قوسىلادى. مۇنداي جىلدامدىق ولشەۋىشتەر كولىك قۇرالدارىنىڭ جىلدامدىق رەجىمىن بۇزۋ بويىنشا جول قوزعالىسى ەرەجەلەرىن بۇزۋدى اۆتوماتتى تۇردە تىركەۋگە مۇمكىندىك بەرەدى. «ۆوكورد» كەشەندەرى قالانىڭ اپاتتى-قاۋىپتى ۋچاسكەلەرىن تالداۋ ناتيجەلەرىن ەسكەرە وتىرىپ, ورناتىلادى. جاڭا قوندىرعىلاردىڭ ەرەكشەلىگى نىساننىڭ جىلدامدىعىن رادارلىق جانە وپتيكالىق ادىسپەن انىقتاۋ قابىلەتتىلىگى بولىپ تابىلادى. بۇل رەتتە ونىڭ جۇمىس ىستەپ تۇرعانى سىرتتان كورىنبەيدى. جۇرگىزۋشىلەردى ەسكەرتۋ ماقساتىندا اقپاراتتاندىرۋ بەلگىلەرى قويىلدى. «ۆوككورد» كەشەنى تۇندە مەملەكەتتىك نومەرلەردى تانۋعا مۇمكىندىك بەرەتىن يق-پروجەكتورلارمەن جابدىقتالعان, انىقتاۋ ناقتىلىعى 98 پايىزدى قۇرايدى. كولىك قۇرالىن تىركەۋ تۋرالى مالىمەتتەر بىرىڭعاي ەلەكتروندى فايلمەن ۇسىنىلادى, وعان كولىك قوزعالىسىنىڭ ولشەنگەن جىلدامدىعى, كولىكتىڭ مەملەكەتتىك تىركەۋ نومەرى كورسەتىلگەن فوتوسۋرەت, ولشەۋ قوندىرعىسىنىڭ ورنالاسقان ورنى تۋرالى مالىمەت, كولىك قۇرالى قوزعالىسىنىڭ باعىتى, كولىكتىڭ ناقتى جىلدامدىعىن تىركەۋ ۋاقىتى مەن كۇنى, اۆتوجولدىڭ وسى بولىگىندە رۇقسات ەتىلگەن جىلدامدىق, تىركەلگەن جول قوزعالىسى ەرەجەسىن بۇزۋ تۋرالى اقپارات كىرەدى. بۇزۋشىلىقتار تۋرالى مالىمەتتەر ۇيعارىم تۇرىندە كولىك يەسىنىڭ مەكەنجايىنا جىبەرىلەدى. ايتا كەتەيىك, جىل باسىنان بەرى استانا قالاسىندا بەينەباقىلاۋ جۇيەلەرىنىڭ كومەگىمەن جىلدامدىق رەجىمىن بۇزۋ بويىنشا 3 مىڭعا جۋىق اكىمشىلىك قۇقىق بۇزۋشىلىق انىقتالدى. ەلامان قوڭىر. دەرەك, سۋرەت: astana.gov.kz.