ەلشىلىكتەگى بريفينگ

20 اقپان كۇنى ماسكەۋ قالاسىندا قازاقستان رەسپۋبليكاسىنىڭ رەسەي فەدەراتسياسىنداعى ەلشىلىگىنىڭ ءباسپاسوز ورتالىعىندا بۇقارالىق اقپارات قۇرالدارى ءۇشىن 2016 جىلدىڭ 20 ناۋرىزىندا وتەتىن قازاقستان رەسپۋبليكاسى پارلامەنتى ءماجىلىسىنىڭ كەزەكتەن تىس سايلاۋىن ۇيىمداستىرۋ ماسەلەلەرىنە ارنالعان بريفينگ بولىپ ءوتتى. بريفينگ بارىسىندا قازاقستان رەسپۋبليكاسىنىڭ رەسەي فە­دە­را­تسياسىنداعى ەلشىلىگىنىڭ كەڭەس­شى-ەلشىسى مارات سىزدىقوۆ قازاق­ستان رەسپۋبليكاسى سايلاۋ زاڭ­ناماسىنىڭ جەكەلەگەن ەرەجەلەرىن, سونداي-اق, ەلەكتوراتتىق ناۋقان مەن سايلاۋ­دى بايقاۋ ۇدەرىستەرىنىڭ نەگىزگى قىرلارىن ءتۇسىندىرىپ بەردى. قازاقستانداعى پارلامەنتتىك سايلاۋ بارىسىن بايقاۋعا حالىق­ارالىق بايقاۋشىلاردىڭ ءتۇرلى ميسسيالارىنىڭ قۇرامىندا شامامەن 700 ادام كەلەدى دەپ جوسپارلانىپ وتىرعانى اتاپ كورسەتىلدى. ال قازاقستان رەسپۋبليكاسىنىڭ ورتالىق سايلاۋ كوميسسياسى شەت مەملەكەتتەر مەن حالىقارالىق ۇيىمداردان بايقاۋشىلار تىركەۋدى 14 ناۋرىزعا دەيىن جالعاستىراتىنى دا قاپەرگە سالىندى. رەسەيلىك جەتەكشى بۇقارالىق اقپارات قۇرالدارى داۋىس بەرۋ بارىسىن كورسەتۋگە بەلسەندى قاتى­سۋ ءۇشىن شاقىرىلىپ, جۋر­نا­ليس­تەردى اككرەديتتەۋدىڭ ءتارتىبى تۋرالى قۇلاقتاندىرىلدى. م.سىزدىقوۆ 19 اقپاندا ساي­لاۋعا قاتىساتىن 6 ساياسي پارتيانىڭ پارتيالىق تىزىمدەرىن تىركەۋ ءراسىمى اياقتالعانىن ايتتى. ول پارتيالار مىنالار: «نۇر وتان» پارتياسى, قازاقستان كوممۋنيستىك حالىق پارتيا­سى, قازاقستاننىڭ «اق جول» دەموكراتيالىق پارتياسى, «بىرلىك» ساياسي پارتياسى, جالپىۇلتتىق سوتسيال-دەموكراتيالىق پارتيا جانە «اۋىل» حالىقتىق-دەمو­كراتيالىق پاتريوتتىق پارتياسى. تۇتاستاي العاندا, ولارعا 234 كانديدات ەنىپ وتىر. – بۇگىنگى كۇننەن, ياعني 20 اق­پاننان باستاپ ەلەكتوراتتىق ناۋ­قاننىڭ ۇگىت-ناسيحات كەزەڭى باس­تالادى. ول 18 ناۋرىزدى قوسا ال­عان ۋاقىتقا دەيىن جالعاسادى. 19 ناۋرىز – «تىنىشتىق» كۇنى, – دەدى م.سىزدىقوۆ. پارلامەنت ماجىلىسىنە بارلىعى 107 دەپۋتات سايلانسا, ولاردىڭ ىشىندە 98-ءى پارتيالىق ءتىزىم بو­يىن­شا, 9-ى قازاقستان حالقى اسسام­بلەياسىنان سايلاناتىن بولادى. باق وكىلدەرى قازاقستان حالقى اس­سامبلەياسى سايلايتىن قازاقستان رەسپۋبليكاسى پارلامەنتى ءماجى­لى­سىنىڭ دەپۋتاتتىعىنا كانديداتتاردى تىركەۋ تارتىبىمەن دە تانىستىرىلدى. قازاقستاندىق ديپلومات, سون­داي-اق, رەسەي فەدەراتسياسىنىڭ اۋما­عىنداعى قازاقستان رەسپۋب­ليكاسى ازاماتتارىنىڭ داۋىس بەرۋ ءتارتىبى مەن ءراسىمى تۋرالى دا جان-جاقتى ايتىپ بەردى. قازاقستان رەسپۋبليكاسى پار­لامەنتىنىڭ ماجىلىسىندەگى ورىنعا تالاساتىن ءبىر ساياسي پارتياعا قازاقستاندىقتار داۋىس بەرە الاتىن سايلاۋ ۋچاسكەلەرى ماسكەۋدە, سانكت-پەتەربۋرگتە, قازاندا, استراحاندا جانە ومبىدا جەرگىلىكتى ۋاقىت بويىنشا 07.00-دەن 20.00-گە دەيىن جۇمىس ىستەيدى. ساۋلەبەك ءبىرجان.