«حابار» تەلەارناسىندا «زاۋرە» سەريالى باستالدى

الماتى. 22 اقپان. «حابار» اگەنتتىگى سەريالدار ءوندىرىسىنىڭ وتاندىق نارىعىنىڭ دامۋىنا ءوز ۇلەسىن قوسۋدا. تەلەارنادا كوكتەمگى تۇساۋكەسەردىڭ ءبىرى – «زاۋرە» تەلەسەريالى كورسەتىلە باستادى. بۇل تۋرالى egemen.kz ءتىلشىسى حابارلادى. «زاۋرە» – كۇلبيكە تۋرالى ەرتەگى تەلەحيكاياسىنىڭ جەلىسىمەن ۇشتاسادى. جاڭا تەلەسەريالدا وگەي شەشەنىڭ قىسپاعىنا ابدەن شىداپ كەلگەن قىز ءتۇپتىڭ تۇبىندە تاماشا ادامعا جولىعىپ, باقىتتى بولادى. تەلەحيكايادا اۋىلدا تۋىپ-وسكەن زاۋرە ەسىمدى جاس قىز تۋرالى باياندالادى. جۇرت جاقسى بىلەتىن «زولۋشكا» ەرتەگىسىنىڭ قازاقستاندىق نۇسقاسىنىڭ كەيىپكەرىن «ودني يز ناس», «نارحوز» جانە «ون ي ونا» سياقتى جوبالارعا قاتىسقان بەلگىلى دينارا باقتىباەۆا وينايدى. «ون ي ونا» فيلمىندەگى ءرولى ارقاسىندا دينارا جۇرتشىلىققا كەڭىنەن تانىلعان. «بۇل بارلىق قيىنشىلىقتاردان حانزادا قۇتقاراتىن كۇلبيكەنىڭ وقيعاسى ەمەس. ءبىزدىڭ وقيعادا مەنىڭ كەيىپكەرىم بارىنە ءوز كۇشىمەن, جىگەرلىگىمەن, تالانتىمەن قول جەتكىزەدى», – دەدى دينارا باقتىباەۆا. سونىمەن ستسەناري اۆتورى «سۇربويداق», «وستوروجنو, كوروۆا!», «تراكتورشىنىڭ ماحابباتى», «كوكتەيل دليا زۆەزدى», «ۆۋزەرى» سياقتى جوبالاردىڭ اۆتورى اسقار ۇزاباەۆ. ال رەجيسسەرى «ماحابباتىم جۇرەگىمدە 2» سەريالىن تۇسىرگەن ەرنار نۇرعاليەۆ. سونداي-اق تەلەحيكايادا نۇرلان تورەحانوۆ, ۆەنەرا نيگماتۋلينا, اينۇر نيازوۆا, جاندوس ايباسوۆ, ارتۋر تولەپوۆ, كاماليا بايتولەۋوۆا وينايدى. ايناش ەسالي. دەرەك: egemen.kz. سۋرەت: vk.com.