بارلىق كەزەڭدى بايقايدى

شىعىس وڭىرىندە الداعى سايلاۋلاردىڭ اشىقتىعى مەن ادىلدىگىن ارنايى اشىلعان ورتالىق قاداعالايدى. بۇل تۋرالى وبلىستىق اقپارات ورتالىعىندا وتكەن بريفينگ بارىسىندا سايلاۋدىڭ ءوتۋ كەزەڭدەرىن بايقاۋ جونىندەگى وڭىرلىك ورتالىعىنىڭ جەتەكشىسى ليۋدميلا گەيتسمان مالىمدەدى. ءباسپاسوز ءماسليحاتى بارىسىندا جاڭادان قۇرىلعان ورتالىقتىڭ قىزمەتى مەن مىندەتتەرى تانىستى­رىلدى. سايلاۋدى بايقاۋ ءجونىن­دەگى رەسپۋبليكالىق قوعامدىق كو­ميس­سيانىڭ فيليالى بولىپ تابىلاتىن بۇل ورتالىق شىعىس قازاق­ستان وبلىسى اۋما­عىنداعى ەلەكتوراتتى ناۋقاندا اشىق­تىقتىڭ ساقتالۋىن, كەز كەلگەن سايلاۋ ۇدەرىسىنىڭ بۇزىلۋىنا جول بەرىلمەۋىن جانە قاتەلىكتەردىڭ دەر كەزىندە تۇزەتىلۋىن قاداعالاماق. ورتالىق قۇرامىنا ۇكىمەتتىك ەمەس ۇيىمدار وكىلدەرى, قوعام قايراتكەرلەرى مەن عىلىمي قىز­مەت­كەرلەر ەندى. سايلاۋدىڭ ءوتۋ كەزەڭدەرىن بايقاۋ ورتالىعىنىڭ جەتەكشىسى ليۋدميلا گەيتسماننىڭ ايتۋىنشا, وڭىرلىك ورتالىقتىڭ قۇرىلۋى مەن قىزمەت ەتۋى – دەمو­كراتيالىق ينستيتۋتتاردى دامىتۋ مەن ازاماتتىق قوعام وكىلدەرىنىڭ ەل ومىرىندەگى ماڭىزدى قوعامدىق-ساياسي وقيعاعا بەلسەنە قاتىسۋىنىڭ جارقىن ۇلگىسى بولماق. ياعني, سايلاۋدى وتكىزۋدىڭ بارلىق كەزەڭىندە, داۋىس بەرۋ كۇنىندە دە قوعامدىق بايقاۋ جۇيەسى جۇزەگە اسىرىلادى. ءوڭىردىڭ ءار سايلاۋ ۋچاسكەسىندە ورتالىق وكىلدەرى, تاۋەلسىز بايقاۋشىلار جۇمىس ءىس­تەيدى. ولاردىڭ نەگىزگى ماقساتى – ەلەك­توراتتىق ۇدەرىسكە قاتىسۋشى بار­لىق كانديداتتارعا تەڭ جاعداي جاساۋ, سايلاۋ ۇدەرىسىندەگى زاڭ بۇزۋ­شى­لىقتاردىڭ جولىن كەسۋ ءجا­نە ونى دەر ۋاقىتىندا تۇزەۋ, اكىم­شىلىك رەسۋرستاردىڭ قولدا­نى­لۋىنىڭ الدىن الۋ بولماق. – شىعىس قازاقستان وبلى­سىن­داعى سايلاۋدىڭ ءوتۋ كەزەڭدەرىن بايقاۋ جونىندەگى وڭىرلىك ورتالىق سايلاۋ زاڭناماسىنىڭ ساقتالۋى ءۇشىن قوعام تاراپىنان ىشكى تەكسەرۋ جۇمىستارىن جۇرگىزەدى. ال­دىمىزداعى پارلامەنت ءماجى­لىسى مەن بارلىق دەڭگەيدەگى ءماس­ليحاتتار سايلاۋلارى ازامات­تارىمىزدىڭ بەلسەندىلىگىن كوتەرىپ, حالىقتىڭ جوعارى ساياسي ءما­­دەنيەتى مەن دەموكراتيالىق ءداس­­تۇر­لەردى دامىتۋدىڭ كەپىلى بولا­دى دەپ سەنەمىز, – دەدى ل.گەيتس­مان. ايتا كەتكەن ابزال, كوميسسيا مۇشەلەرى حالىقارالىق باي­قاۋ­شىلار ميسسياسىمەن, وبلىس­تىق سايلاۋ كوميسسياسىمەن, كان­ديداتتاردىڭ سايلاۋالدى شتابتارىمەن, بۇقارالىق اقپارات قۇرال­دارىمەن جانە ازاماتتىق سەكتور وكىلدەرىمەن تىعىز ارىپتەستىك ورنا­تا وتىرىپ, قىزمەت ەتەدى. ور­تا­لىقتىڭ وبلىستىق شتابى ءوس­كە­مەن قالاسىندا ا.پۋشكين اتىن­داعى وبلىستىق كىتاپحانادا ورنالاسقان. دۋمان اناش, «ەگەمەن قازاقستان». وسكەمەن.