دەلدالدار نارىق تەڭدىگىن بۇزىپ ءجۇر

اۋىل شارۋاشىلىعى ءمينيسترى اسىلجان مامىتبەكوۆ وڭتۇستىكتە ەكى كۇندىك ءىسساپاردا بولدى. وڭتۇستىك قازاقستان وبلىسىنا رەسپۋبليكا بويىنشا جىلىجايدىڭ 87 پايىزى تيەسىلى. ياعني, مەملەكەتتىڭ كوكونىس ونىمدەرىنە قاجەتتىلىگىن وتەۋدە وڭتۇستىكتىڭ الەۋەتى ۇلكەن. مينيستر «قازاگرونوم» سەرىكتەستىگىنىڭ 3 گەكتارعا سالعان جىلىجايىنىڭ جۇ­مىسىمەن تانىستى. «بيزنەستىڭ جول كارتا­سى-2020» باعدارلاماسى بويىنشا 1 ملرد. تەڭگەگە سالىنعان جىلىجاي سوڭعى تەحنولوگيا جەتىستىكتەرىنىڭ جەمىسىن كورۋدە. سەرىكتەستىكتىڭ اكىمشىلىك ديرەكتورى توقسابا توقسانباەۆ 813,1 ملن. تەڭگەنى «قازاگروقارجى» اق-تان نەسيەگە العاندارىن ايتادى. ال, قالعان 237,5 ملن. تەڭگە وزدەرىنىڭ ۇلەسى. قىس, كوكتەم مەزگىلدەرىندە 540 توننا قيار جيناعان سەرىكتەستىك جاز, كۇز مەزگىلىندە 240 تونناعا دەيىن قىزاناق الىپتى. بيىلعى ءونىم­نىڭ باسى كەلىسى 400 تەڭگەدەن اي­نالعان. قايدا وتكىزەمىن دەي­تىن­دەي ەمەس, رەسەيدىڭ نوۆو­سىبىر قالاسىمەن كەلىسىمشارت بار. ال, قازاق­ستاندىق نارىقتا قارا­عاندى وبلىسىمەن بايلانىس ورناتىلعان. بۇدان كەيىن اسىلجان سارى­باي ۇلى كورشىلەس «يف­تيحاري» قوجالىعىنا تيەسىلى ەكى گەكتار القاپتى الىپ جاتقان جىلىجايدا بولدى. بۇل شارۋاشىلىق تا مەملەكەتتىك قولداۋدىڭ ار­قاسىندا شارۋاسىن تۇزەپ العان. جىلىجايعا سالىنعان 500 ملن. تەڭگەنىڭ 300 ميلليونى «قاز­اگروقارجى» اق-تان جەڭىلدە­تىلگەن نەسيەمەن الىنعان. يزرايل­دىڭ تەحنولوگياسىن پايدالانىپ وتىرعان شارۋاشىلىقتىڭ ءوندى­رىس­تىك قۋاتى 400 تونناعا دەيىن جەتەدى. مينيستر جىلدىڭ ءتورت مەز­گىلىندە دە جۇمىسىن دوعارماي جۇ­مىس جاساپ وتىرعان جىلىجاي­لار­دىڭ يەلەرىنە تابىس تىلەي وتىرىپ, كەيبىر تۇيتكىل جايتتاردى تىلگە تيەك ەتتى. جاڭا جىل الدىندا استانا مەن الماتىدا قيار مەن قىزاناقتىڭ كيلوسى 1200 تەڭگەگە دەيىن كوتەرىلىپ كەتكەن. سول كەزدە وڭتۇستىك جىلىجايلارى ءونىمىنىڭ ءار كيلوسىن 500 تەڭگەدەن وتكىزە الماي, سارساڭعا تۇسكەن. ياعني, ورتاداعى دەلدالداردىڭ جۇمىسى جاقسى جولعا قويىلعان. سوندىقتان, وندىرىستىك قاجەتتىلىكتەردەن بولەك ساۋدا لوگيستيكاسى, تاسىمالداۋ ماسەلەلەرىن شەشۋدىڭ تەتىگىن ويلاستىرۋ كەرەك. «ءبىز بۇل ماسەلەنى شارۋا مەن ساتىپ الۋشى ىڭعايىنا ساي شەشىپ, باعانى ءبىرشاما تۇراقتاندىرامىز», دەدى ول. سول كۇنى مينيستر «Rixos Khadisha Shymkent» قوناق ءۇيىنىڭ ءماجىلىس زالىندا وڭتۇستىكتىڭ فەرمەرلەرىمەن كەزدەسىپ, كوپتەگەن ساۋالدارىنا جاۋاپ بەردى. اۋىل شارۋاشىلىعىن دا­مى­تۋعا ەلەۋلى اسەرى بار, كەلەلى ءما­سە­لەلەر تالقىلانعان جيىنعا وبلىس اكىمى بەيبىت اتامقۇلوۆ تا قا­تىس­تى. باقتيار تايجان, «ەگەمەن قازاقستان». وڭتۇستىك قازاقستان وبلىسى.